لو "أول مرة تحرير".. اسمع نصائح "تويتر"

قبيل بدء فاعليات مليونية "للثورة شعب يحميها"، والتى دعت إليها العديد من القوى السياسية اليوم، قدم مجموعة من نشطاء موقع "تويتر" مجموعة من النصائح لمن يذهبون إلى الميدان للمرة الأولى للمشاركة في المليونية في هاشتاج "#أول_مرة_تحرير".
لو أنت كمان "أول مرة تحرير" اتبع الآتي:
خد معاك بالطو مطر (ضد المياه لتفريق المتظاهرين). لو ماعندكش استعمل كيس بلاستيك كبير واثقب به فتحتين للذراعين وفتحة للرأس
أوعى تتكسف تهتف، لازم تهتف.. إنت بتهتف من أجل الوطن مش من أجل حد
أوعى تنفصل عن مجموعتك مهما كان السبب واشحن موبايلك على آخره وياريت لو معاك بطارية تانية مشحونة.
ما تعتمدش على الاتصال سواء بالموبايل أو النت لأن الشبكة مع تجمهر الناس بتضيع، الأفضل أنه يكون فيه نقط للالتقاء متفق عليها
ما تشيلش غير علم مصر ..لا أعلام أحزاب ولا حركات
لا تستفز العساكر ولا تهينهم أو تعتدي عليهم بالضرب أو الأذى، هم أكثر ناس غلابة في هذه المأساة، وهم أيضا لهم أسر تنتظر عودتهم
هاتلاقي ناس بتحاول تستفزك إنت فلول؟ إنت صوت لمين؟.. اعمل نفسك مش سامع وكمل وسيبك منهم
ماتدخلش الميدان بإيدك فاضية....خد حاجة واحدة معاك للمستشفى الميداني وسلمها بنفسك ولو حتي عصير
إذا وقعت وتعرضت للضرب، تكور في وضع الجنين واحمي رأسك بذراعيك وبطنك بساقيك. الرأس والبطن فيها نقاط الضعف- احميها.
كل بنت في الميدان أختكم واللي يحاول يتحرش بيها حتى بكلمة خاين خيانة عظمي للثورة.. خلوا المتحرش هو إللي مرعوب من وجوده وسطكم!
ممنوع الميكب والعدسات اللاصقة والكريمات (يتجمع الغاز تحتها) وأي ملابس حد يقدر يشدك منها بالذات من الخلف.
الناس في التحرير كانوا على طوووول مبتسمين, خلى الإبتسامة متفارقش وشك مهما حصل
إعرف أن الميدان مش حكر على حد, وإنك مواطن مصرى نازل تعبر عن مطالبك سواء أول مرة أو المليون.
من أدبيات المظاهرات لما تسمع هتاف سلمية تعرف إن المتظاهرين بيتضربوا ولما تسمع هتاف ايد واحده تعرف إن فيه مندسين
هتشوف مصر اللى نفسك تعيش فيها ومفيش فرق بين مسيحى و مسلم
متسألش مين مع مين كلنا مع مصر
عيش التجربة الثورية
بالنسبة للبنات حاولى تكونى فى مجموعات ومتسبوش بعض لأي سبب وإلبسي بنطلون لسهولة الحركة حتى لو تحت العباية أو الجيبة
لو حد سألك إن تبع مين؟؟ قوله أنا تبع مصر، أو سألك نازل ليه؟ قوله علشان مصر