شباك علي الثورة

نوارة بنتي!

بتخطي عتبة ليوم جديد
يارب خلي
يارب حافظ
يارب بارك
يارب زيد
يارب كبر
نوارة تكبر
وتبقي اكبر
في كل عيد
لأ كل جمعة
لأ كل يوم
لأ كل ساعة
لأ كل لحظة
تنول وتحظي
وتزيد نباهة
وتزيد ملاحظة
وتحظي مصر السعيدة بيهم
ويبقوا ليها
وتبقي ليهم
غيطانها جنة
وترابها حنة
والنسمة خمرة
في قزازة حمرا
والنيل نجاشي
مفيش ماجاشي
تملي ييجي
اخضر مليجي
دايما يوفي
دايما يكفي كل الخلايق
يصبح صباحه
فلاحه يمشي علي شطه عايق
ما فيش معاكسة
مافيش مضايقة
مافيش عساكر وقهر تاني
كل الاماني بقت حقايق
يارب وفق
يارب وافق
يارب زيد
واكتب عليهم
في كل لحظة فرح وعيد
بسكوتة بابا
حاضر يا ماما
وتقوم تدوسني
عشان تبوسني
وتنام في حضني
وتقوم في حضني
وتعمل العملة
وتملا حضني
الله يجازي البعيد شيطانك
حماره كلبة
مش عيب يا ماما
كده البيجامة
مش بابا قايل
وماما قالت
من طول ما حطت
وطول ما شالت
ساعة ما تبقي الحكاية كخة
يقولوا إإح قوام يابابا
- بسكوتة يا بابا
بسكوت في عينيك
ياللا امشي قومي
حمارة كلبة باظت هدومي
ما تقومش طبعا ولا اي حاجة
وكأن مثلا ماحصلش حاجة
تقعد تقلضم وتلوي بوزها
وتتجاهلني كأني جوزها
- خاصماك يا بابا ماتكلمنيش
طظ في عظمتك
ما يهمنيش
ديتها بوسة او تهيشكاية
او بسكوتاية او بمبوناية
ها تسوقي شغل الندالة طبعا
وتروحي جرة الكلام معايا
وبوسة بابا
اديكي بوسة
سكر يا بابا
تديني بوسة
كده اصطلحنا خلاص يا بابتي
كدة اصطلحنا يا نواراية
مش دي الحكاية
ولا انتي يعني
لأ يعني إيه ما تخرفيش
دي تبقي يعني الحكاية يعني
ملعون ابوكي ما تاخذنيش
لو كان في قصدك
او ربع قصدك
او كنتي حتي ما تقصديش
ان انتي يعني خاصماك يا بابا
حتخصميني اطلع مفيش
ابوكي يعني ماكانش حاجة
لكنه حاول يعيش لحاجة
وجيل ابوكي كان يعني حاجة
وجيلك انتي حيبقي حاجة
انتي تبقي النهاردة حاجة
وبكرة حتما حتبقي حاجة
وأي حاجة ماتكونش حاجة
إلا وسببها في الاصل حاجة
وبكرة لمين قمركو يطلع
والشمس تسطع فوق كل حاجة
حتقولوا كان في الزمان دا ناس
فيهم طيابة فيهم حماس
وفي الحماس بعض عباطة
وكانوا آخر الامر ناس
وكان زمانهم سجون وكانوا
ما بين سجونه وامريكانه
وبين ضباب الطريق حياري
ماحد قادر يشوف مكانه
حتقولوا كانوا وياما كانوا
وياما شربوا وياما عانوا
وياما جالهم
وياما جيلهم
دفع وكان الثمن أمانه
وياما ناس في قلب المسيرة مشيوا
وناس في نص المسيرة خانوا
حتقولوا كانوا
أو ياما كانوا
لكن حيبقي في الامر حاجة
ان اللي عربد ما سابش حاجة
وساب كلابه علي كل حاجة
تنهش وتهبش في كل حاجة
ماقدرش يقتل في اي حاجة
روح التفاؤل بكل حاجة
اليكي يا نونو يا شرف بابا واللي جيلك العظيم شرف مصر المحروسة. «بابا نجم»