شواكيش

رئيس جمهورية منه فيه !

احتارنا نحن المصريين ننتخب فى جولة الإعادة الرئاسية «شفيق يا راجل» ولا «مرسى الإستبن».. علشان كده عايزين نحط صوابع إيدينا العشرة فى الحبر الفسفوري وننتخب «رئيس جمهورية منه فيه»!
أخيراً.. الإخوان اتفقوا على اللجنة التأسيسية.. عقبال ما يخرجونا من « زنقة الدستور»!!
أحمد الزند رئيس نادي «قضاة مصر» فتح النار على « الإخوان».. والإخوان فتحوا النار على «شفيق».. وشفيق فتح نفس المصريين على فضايح وألاعيب الإخوان!!
بمناسبة ماراثون الثانوية العامة « إخوانا البُعدة» سيبدلون شوادر اللحمة والسكر والأرز والزيت.. بتوزيع أدعية ليلة الامتحان!!
فى جولة « المبارزة الرئاسية» «شفيق يا راجل» يراهن على «كتلة الفلول» ومرسى «الإستبن» يراهن على «كوريك العربية»!!
محمد مرسى مرشح «إستبن الإخوان» عمل فى وكالة «ناسا» الأمريكية.. و«الناسا» فى مصر يتساءلون بالعربية: هوه ابنك المتجنس بالأمريكية بيتكلم لسه إنجليزي يا مرسى!!
زوجة محمد مرسى المرشح الرئاسي تحت عباءة الإخوان تعهدت فى مؤتمر نسائي بالشرقية بعدم الإقامة «فى القصر الجمهوري» المكون من 440 غرفة إلا إذا اضطرتها الظروف.. هااا.. هااا.. هااا.. معلش أصلها « نكتة بايخة»!!
حلمت إمبارح.. اللهم اجعله خير أن «مبارك المسجون» طلب من مأمور سجن مزرعة طرة إعادة لحن أغنية « علشان كده إحنا اختارناك» بأصوات المساجين الموهوبين.. فجامله المأمور متهكماً: «خليهم يتسلوا يا ريس»!!
عرض جديد فى جولة الإعادة الرئاسية.. انتخب الرئيس وخد التانى هدية «حمدين صباحى»!!
الِفل الكبير «محمد أبو العينين» لا حس ولا خبر.. الأكيد أن «أبو العينين» واقف سيراميكا فى محطة «صدى البلد»!!
حد يفهمنى .. مظهر بيه شاهين خطيب مسجد عمر مكرم أيام الثورة.. بيشتغل إيه دلوقتى.. أفيدوني عبر الفضائيات.. أفادكم الله!!
بمناسبة بدء «موقعة الثانوية العامة».. أجيبوني عن هذا السؤال الانتحارى.. الشعب يريد انتخاب مرسى لأنه مرشح (إستبن مية تحت تبن»؟!!
عبد المنعم أبو الفتوح المرشح الذي خرج من الجولة الأولى للانتخابات الرئاسية قطع على نفسه عهداً بعدم العودة إلى «خيمة الإخوان».. يا إخوانا خليكم شاهدين علشان الكذب حرااااام!!
صفوت حجازى.. داعية بروحين.. روح مع الإخوان.. وروح مع السلفيين.. والروح الغائبة يعلمها الله!!
على رأى نقيب المحامين سامح عاشور: الإخوان يديرون البرلمان لحسابهم.. وطبعاً الشعب يدفع فاتورة الحساب من فضائح الثورة !!
اتهام نائب سلفى جديد بارتكاب فعل فاضح فى الطريق العام.. رجعنا بسرعة الصوت الانتخابى إلى فضايح « نائب المناخير» الكذاااااب!!
كلام نار
عايز تنتخب رئيس جمهورية ولا ابن عمه؟!
لو عايز رئيس انتخب رئيس جمهورية «بُرش طرة»، ولو عايز ابن عمه انتخب «الفِل شفيق» ولو محتار بين الاثنين.. اختار المرشح «الإستبن» وأعصر عليه ليمونة!
m.zaky2009 @yahoo. Com