شباك علي الثورة

فاكر يا شيخ إمام؟!

النهاردة 5 يونيو فاكر يا شيخ إمام؟ الله يرحمك ويحسن إليك ويتجاوز عن سيئاتك في 5 يونيو سنة 1967 غنيت اللحن الجديد اللي بيقول:
الحمv لله خبطنا
تحت بطاطنا
يا محلا رجعة ظباطنا
من خط النار
***
يا أهل مصر المحمية
بالحرامية
الفول كتير والطعمية
والبر عمار.. إلخ
فاكر يا إمام اللحن ده عمل إيه في الناس؟ كنا في أوضة حوش قدم وكانوا السميعة مجموعة من المثقفين علي رأسهم سعد الموجي ابن الشيخ عبدالسلام الموجي أيام مسجد الفكهاني في حوش قدم.. فاكر لما سألت عن فلان وعلان؟
وأنا قلت لك نزلوا يجيبوا حاجة من تحت! أنا دلوقتي باعترف لك أني كنت باكذب عليك لأنهم أول ما سمعوا جملة إن شاالله يخربها مداين
عبدالجبار
قاموا مفزوعين وواحد منهم قال:
يانهار أسود دول حيودونا في داهية وهرب الاتنان من الأوضة هرولة وضحك المرحوم سعد الموجي وقال لي:
ولا يهمك يابو النجوم دي كلمة تقال في وجه حاكم ظالم ولك أجرها إن شاء الله.
الله يرحمك يا سعد يا موجي ودارت الأيام وجري لنا ما جرا واحنا ملتحمين ببعض وده هو اللي ونسنا في غربتنا وصبرنا علي ما بلانا وأنت عارف إن البلاء كان فوق قدرة البشر علي التحمل خصوصا إن الكل تخلي عنا ما عدا فننا هو اللي ونسنا في غياهب السجون وعاش معانا وعشنا معاه ولم نتوقف عن الإبداع في حب مصر المحروسة فاكر مصر يامه يا بهية.
فاكر قيدو شمعة؟ فاكر هو شمعته؟ فاكر شيد قصورك ع المزارع فاكر يا حبايبنا؟ أهو كل الفن ده بقي في ايدين ثوار 25 يناير سنة 2011 وكلهم بيسلموا عليك مع انك رحلت في 5 يونيو 1995 وأكيد أنت دلوقتي شايف الثورة والثوار في 5 يونيو 2012 سلام يا إمام.