الأقوال المستباحة في النقد والصراحة

لبخيت بن بيومي صاحب المساحة

خللي بالك يا عبد الفتاح
يوم م المجلس العسكري
يسلم البلد لإدارة مدنية
مش حيسبها سداح مداح
حيبقي معاه نسخة من المفتاح..!!
إلي فريق زامبيا القوي لكرة القدم
انتم فريق النفس الطويل
وقاهر المستحيل
ونجم أفريقيا المقبل
في مونديال البرازيل..!!
إلي ولدنا العزيز النجم أحمد السقا
«قال نجم كبير»
من جار علي شبابه
بالشغل الكتير
جارت عليه شيخوخته
بالنوم اضطراري في السرير..!
واسأل مجرب
ولا تسأل ريجيسير..!!
إلي عبقري الحوار الأستاذ مفيد فوزي
جامعة الكلام بتعلن
عن حاجتها لأستاذ
متفرغ لتدريس وتعليم الحوار
قدم أوراقك فورًا
وممنوع الاعتذار..!!
إلي ماما أمريكا
عارفة بيقولوا في الأمثال
الشعبية المصرية ايه؟
اللي يدي لك قرش وعينه فيه
لا تاتخد منه ولا تديه
ولا تشوفه ولا تسلم عليه..!!
إلي الإعلامي الكبير سعد عباس رئيس شركة صوت القاهرة
بيقولوا في مبني ماسبيرو
اللي يسدد ديون شركته
ربنا يبارك في صحته
ويشيل كلاكيع القطاع
لقتصادي والمطبات من سكته..!!
إلي الصحفي خفيف الروح عبدالقادر محمد علي أخبار اليوم
قررت الهيئة الدولية
للمسلكاتيه بالاجماع
رفع قضية علي سيادتكم
من أجل الحفاظ علي أسرار القاع
هذا بعد الهجوم المباشر
علي المسلكاتيه في صباح النعناع..!!
إلي الأستاذ الصحفي الكبير محمد حسنين هيكل
بيقولك الحاج زغلول
يا سلام لو تفضل تقول وتقول
ويحلو الكلام اللذيذ والقول
لغاية كيلو اللحمة ما يبقي بجنيه
وبشلن سندوتش الطعمية والفول..!!
إلي الإعلامي الكبير الأستاذ سيد الغضبان
بيقولوا في الأمثال
الدهن في العتاقي
والأسلوب الصريح
يداوي الجريح في العمر اللي باقي
ويروي العطشان في الوطن الشراقي..!!
إلي الشاعر الكبير الأستاذ محمد إبراهيم أبوسنة
رائد من رواد المعاني والأخلاق
في عصر الشعر اللذيذ
ليس له مثيل لا في الوطن العربي
ولا في بلاد الإنجليز..!!
إلي الأستاذ عادل ثابت رئيس قطاع الانتاج
قليل البخت
لما يعينوه رئيس قطاع
ويبقي ناوي ع الابداع
يلاقي القطاع في القاع
والميزانية في الضياع..!!
إلي نجم الكورة الدولي محمد بركات النادي الأهلي
اعتزالك في هذا
التوقيت بالذات
بعد اللي بيحصل
في الماتشات
اثبت أنك لاعب الكورة
الإنسان والفنان محمد بركات..!!
إلي الكاتب الساخر الراحل جلال عامر
ياريت القدر كان طول
باله كمان أسبوع
علي قلبك الموجوع
كنت شفت معانا بكرة
آخر مشهد في مسرحية المخلوع..!!
وداعا يا عم جلال..!!
إلي العدالة السماوية
علي رأي الحاج عبدالغفور
طول م الدنيا فيها زور
لا حتنفع مجالس..
ولا ينفع دستور..
وتتعقد الأمور
ويناموا العساكر
في اشارة المرور..!!
إلي ميدان التحرير
المذكور أعلاه
بعدما كان مسرح
للوطنية والحرية
أصبح لوكاندة
للعواطليه والبلطجية..!!