أول "جزارة": نسيت النعومة..أنا معلمة بنت معلم

ساطور وكاذلاك وأورمة .. لعل هذه الأدوات معروفة جيدا للمعلم "حنفي" الجزار الذي يعرفه القاصي والداني في حي فيصل المكتظ بالسكان، لكن أن تتحول هذه المفردات لقاموس المعلمة "أم إسلام" صاحبة أول محل جزارة في الجيزة وربما في مصر بالكامل فهذا ما استوقفنا ودفعنا لمحاورتها على نار هادئة.
* في البداية لماذا اخترتي مهنة الجزارة لكسب الرزق؟
** والله كله أكل عيش وانا لم أختر هذا النشاط بمزاجي لأن والدي كان المعلم حنفي الجزار وزوجي أيضا جزار فالعيشة وسط اللحمة والعظم ليس بالجديد علينا فنحن عائلة جزارين من "ساسنا لرأسنا".
* وهل ترين أن هذا العمل يتناسب مع طبيعة المرأة التي يفترض أنها تتسم بالرقة والنعومة؟
** هذا الكلام تغير تماما هذه الأيام، فالسعي وراء "المعايش" ولقمة العيش خلى الستات يبقوا أكثر خشونة من الرجالة فلم تعد الصورة كما كانت من قبل، دلوقتي الست بتشتغل سواقة أجرة ونقل بل وأتوبيس كمان، فلماذا لا أعمل في مهنة زوجي وأبي؟
البيع للرجالة أسهل
* لاحظنا أن كل زبائنك من النساء فهل هذا أمر دائم أم أنها مجرد صدفة؟
** صحيح معظم زبايني ستات لكن الأمر لا يسلم فأحيانا يأتي بعض الرجال للشراء مني.
* وأيهما تفضلين التعامل معه الرجال أم النساء؟
** بصراحة البيع للرجالة أسهل، فالستات دائما تفاصل معي في السعر وتطلب ماسورة تعمل عليها شوربة أو وصاية دهن أو شغت فوق الميزان، لكن الرجالة غالبا هات وخد واحد زائد واحد بيساوي اتنين.
* هل تعرضتي من قبل لمضايقات أو حتى صعوبات بسبب عملك في الجزارة؟
** بصراحة أنا فتحت المحل من شهرين فقط ولسة لحد دلوقتي ماتعرضتش لأي معاكسة وأفتكر أي راجل هايفكر 20 مرة قبل ما يحاول يعدي حدوده لأنه ببساطة شايف الساطور في إيدي بالعكس أنا باحس الرجالة بيتعاملوا معايا وهم خايفين.
* وبالنسبة لأسرتك هل تتأثر بطبيعة عملك هذا؟
** أنا جوزي جزار وعارف التعب اللي باشوفه ودايما بيطل علي كل فترة وأولادي بيخلصوا مدارسهم وييجوا يقفوا معايا شوية وبعدين بيروحوا، وأنا باسيب لهم الأكل قبلها بيوم ولما بارجع البيت باحاول اشتغل لهم "خدامة" علشان ماينقصوش حاجة والحمد لله أهي ماشية وربك بيسترها.
كان نفسي أكون دكتورة!
* لو ما كنتيش طلعتي جزارة يا ترى كان نفسك تشتغلي إيه؟
** وانا صغيرة كنت دايما باحلم أكون دكتورة لكن للأسف ما كملتش تعليمي غير للصف الثاني الإعدادي وطبعا ضاع حلم حياتي لكن رضا على كل اللي يجيبه ربنا.
* طيب هل تحبي أن يكون أولادك جزارين أم أطباء؟
** والله كل شيء قسمة ونصيب، أديني أنا وأبوهم بنحاول معاهم لكن في الغالب هايكملوا امبراطورية اللحمة اللي عملناها أنا وجدهم وأخوالهم وحتى أبوهم لأن الدراسة صعبة عليهم والدروس الخصوصية مش جايبة فايدة معاهم.