قراء "الوفد" اختلفوا حول "الشغل ولا العريس"؟

"يا بنات .. الشغل ولا العريس؟!"، سؤال طرحناه على الفتيات زوار موقع (الوفد)، ولاقى ردود فعل واسعة، ليس فقط من جانب الفتيات لكن من جانب الشباب أيضا، حيث عكست التعليقات الواردة على الموقع أو في "الفيس بوك" و"تويتر" آراء ووجهات نظر عديدة حول السؤال.
طمع البنات!
رأى بعض الشباب أن "طمع البنات" سيكون دافعهم الأول في الاختيار، وجاءت تعليقاتهم ردا على ما كتبته "شيماء إبراهيم" حين قالت: "الاتنين الشغل والعريس". ليرد عليها أحمد بهاء الدين، أحد زوار الموقع:"أغلب البنات هتقول: الشغل، والعريس، والعربية، والمستوى الاجتماعي، والمهر، والفرح، والقايمة، والشقة، والحب، والاحترام المتبادل".
ووافقه في الرأي عمرو يوسف، حيث قال: "بنات اليوم عاوزين الشغل والعريس مع بعض".
أما حمادة عرابي، فيري أن الظروف الاقتصادية هي السبب الأساسي وراء إختيار الفتيات للعمل أولا. حيث قال: "بالعقل كده ماهو لو اشتغلوا مش هيتجوزوا، لأن اللي هيتجوزهم مش لاقي شغل".
نفس الفكرة دعمها محمد علي حسين، قائلاً: "البنات بتشتغل عشان مفيش جواز، ولما تتجوز الحالة الاقتصادية بتخليهم برضو يشتغلوا"، لكنه أكد على ضرورة عمل الفتاة في مجالات محددة وليس أي عمل.
البنت مكانها البيت
محمد مدحت، تساءل عن سبب لجوء الفتيات إلى العمل والعزوف عن فكرة الزواج "ليه البيت والاستقرار للبنات شئ استثنائي.. والشغل هو الأساس؟"، مؤكدا على أن البنت مكانها الطبيعي هو المنزل.
الغريب أن من وافقته في الرأي كانت فتاة هي عاليا عمر، حيث قالت: "أنا شايفة إن مسئولية البنت الأولى في الحياة هي تكوين بيت واسرة وأولاد، وتربيتهم بشكل سليم والاهتمام بيهم وتعليمهم والارتقاء بيهم وبعدين تقدمهم للمجتمع رجالا، ده هيكون أكبر نجاح ليها وطبعا الوقوف جوار زوجها ونجاحه هيكون نجاح ليها أعتقد هي دي طبيعة الكون والأصل فيه".
أما ناصر الضابي، فذهب لأبعد من ذلك بكثير، حيث أرجع سبب إرتفاع نسبة البطالة إلى عمل المرأة قائلاً: "سبب أساسي ورئيسي في البطالة الموجودة في مصرهو عمل المرأة".
رأي ناصر عارضه شحاتة صبحي، قائلاً: "البنت دلوقتي في كل مجال: بتقاتل بالطيارة، وطلعت القمر بالصاروخ، ومهندسة ناجحة... وغيره، لكن إحنا عندنا في بعض البلدان ممنوع تقود سيارةعارفين ليه؟.. علشان الرجل عايز يكون هو سي السيد والست هي اللي تخدمه".
ودعمت روجي رضوان، رأي شحاتة حيث قالت: "للأسف في نوع من الشباب النهاردة بيفكر يرتبط ببنت تكون بتشتغل، عشان تصرف عليه وعلى أهله كمان".
فكاهة بنات
سؤالنا "الشغل ولا العريس؟" استقبلته بعض الفتيات بتعليقات فكاهية.. فاختارت دينا سعد، العمل قائلة: "الشغل طبعا، الجواز ده موضة قديمة". أما رحاب الشرقاوي، فحمل رأيها نظرة فلسفية طريفة حيث قالت: "لا هي مش بتثبت وجودها بالشغل..هي بتمحو وجودها بالرجل".
أما رينو أحمد، فقدمت للفتيات الحل والجواب المثالي لهذه المسألة قائلة: "خلوا بالكم الشغل يجيب عريس.. يعني في الشغل تقدر تظبط عريس، إن كان زميل عمل أو عميل وكله في التمام".