شقيقة إسراء الطويل: أختي معرضة للشلل في سجون العسكر

قالت آلاء الطويل، شقيقة المعتقلة إسراء الطويل، إن أختها أخبرتها أنها ستصاب من جديد بالشلل إذا توقفت جلسات العلاج الطبيعي الذي كانت تتعرض له إسراء منذ إصابتها أثناء تغطيتها فعاليات التظاهر ضد حكم العسكر.

وأضافت آلاء عبر صفحتها على "فيس بوك"، إن "إسراء بتقول لو فضلت شهر كمان من غير علاج طبيعي هتشل تاني والتعب الي فات في العلاج هيكون عالفاضي ، إسراء بتتعالج علاج طبيعي يومي من سنه ونص ويادوب كانت بادئه تتحسن وتمشي بصعوبه ووقف العلاج وعدم الحركة والسجن مش في صالح صحتها تماما وبنطالب بخروجها سريعا عشان تكمل علاجها لانها معملتش حاجه تتحبس بسببها".

وتابعت: "إسراء عندها ضيق تنفس والعنبر بتقول فيه 38 واحدة ما بين مخدرات ودعارة وطول الوقت سجاير وهيا متضايقة جدا من دا ، وان كانت متاخدة فعلا بسبب قضية سياسية انقلوها عنبر السياسيات"، مضيفة: "إسراء بتحكيلنا انهم لما اتحطوا في ميكروباص قدام تشيليز وغموهم فهمت انهم اعتقلوهم وكانت بتشرح للي اخدهم ان لو كانوا مراقبين التليفون فصهيب كان بيقولهم تعالوا نتعشي في مطعم قنبلة اللي في السيدة زينب مقالش هنفجر قنبلة، وفضلت متخيله بجد انهم اتاخدوا بسبب الغلطة دي".

وأضافت: "إسراء فضلت 15 يوم متغمية في أمن الدولة لاظوغلي و كانت قلقانه علي بابا وماما وعايزه تعرفهم هيا فين وتطمنهم وكانت بتطلب من الي بيحققوا معاها يرجعوها البيت عشان نعرف هتروح فين وبعدها ياخدوها تاني، ولما ملقتش فايده عورت نفسها وكتبت الرقم الي حفظاه بدمها عالحيطه علي أمل ان حد يكلمنا يقولنا مكانها.. وحكت انه في يوم من الايام الي قضتها في لاظوغلي كان بقالها كتير مكلتش وجعانه جدا جالها حد قالها كلتي؟ بتقول معرفتش ارد وعيطت، قالها اجيبلك ايه؟ قالتله شيبسي قالها وايه كمان قالتله مولتو، وايه تاني قالتله عصير قالها مش عايزه حاجه كمان؟ قالتله وايسكريم".

وتابعت: "الست الي قاعده معانا في الزيارة تسمع كل كلمه نفسها اتعصبت قالتلها دانتي فاضيه ماتقوليله يجيبلك اكل حقيقي، إسراء طلعت مش بتقول للظباط 'عمو' بس دي كمان بتقول عمو الباشا، قالت ان حمام السجن قذر ، وانه في سرير بتنام جمبها 'طنت تخينه خالص بتفعصها".

وختمت بقولها: "إسراء عيد ميلادها يوم 28 -هتقضيه في النيابة- وبتقول لكل اصحابها يدعولها واللي كان ناوي يجيبلها هدية، يطلع بفلوسها صدقة بنية انها تخرج .. هوا مش كفايه كدا علي إسراء؟ هما مقتنعين بجد ان واحده بتعرفش تمشي لوحدها وبتتسند خطر عالدولة؟ واحدة حياتها ابسط من كل ده بكتير مفيهاش غير عيلتها واصحابها وكاميرتها وقطتها يبقا ليها فكر ارهابي؟".