18 تصريح كاشف من 4 زملكاوية عن المجزرة

في ظهور خاص لهم على قناة “الحياة 2″ من خلال حلقة مساء الجمعة من برنامج “نجوم الملاعب”، صرح كل من أحمد مرتضى منصور و أحمد عيد عبد الملك و أحمد علي و حازم إمام بعدة تصريحات عن مجزرة الدفاع الجوي .
فكانت أهم التصريحات :-
أحمد مرتضى منصور
1 – عارف إن إللي ماتوا مش ألتراس و عارف إنهم كان معاهم تذاكر لكنهم في الأول و الأخر حتى لو مات واحد من الألتراس فهو بني أدم، فلازم أحزن عليه، و إللي مات نحن نعتبره شهيد
2 – لو كنا نعلم أن هناك وفيات فكنا سننسحب من أجل جمهورنا، إنك تبقى عارف إن في حد ميت و إنت بتلعب كورة دي كارثة
3 – المسئولية مسئولية من حشد 10 ألاف شخص فى توقيت معين بأتوبيسات موحدة و قال لهم أن يدخلوا الإستاد في وقت واحد، فبالتالي لازم تحصل كارثة
4 – طرحت 10 ألاف دعوة للأعضاء لا تُباع، و طرحت تذاكر للبيع يوم الخميس أمام بوابات نادي الزمالك و لم تُباع كلها
5 – و صلت للمباراة الساعة 7 و كان هناك عدد كبير من الجمهور في الخارج و دخلوا معنا المباراة، و لم يقل لنا أحد أن هناك وفيات، وإتصلت بأشرف صبحي نائب وزير الشباب قبل نهاية المباراة ب تلت ساعة و قال لي لا يوجد أخبار رسمية عن وفيات
6 – عمر جابر لاعب مثل أي لاعب فى نادي الزمالك راح و هييجي
7 – شريف منير حسن تلقى إتصال من أحد القيادات في الألتراس”أحمد بحر” قال له “كل إللي فات حاجة و إللى جاى حاجة تانية، و بلغ أستاذ مرتضى إننا داخلين يعني داخلين”
8 – عملنا صندوق لأهالى الشهداء النادي يضع فيه مبلغ 50 الف لكل الأهالى، و شكلنا لجنة من أعضاء نادي الزمالك لتقديم واجب العزاء لأهالي الشهداء و متابعة مشاكلهم فيما بعد
أحمد عيد عبد الملك
9 – نحاول عمل عزاء مجمع لشهداء نادي الزمالك، وسيخصم جزء من مستحقاتنا كلاعيبة لصالح أهالي الشهداء و سنذهب لتعزيتهم في منازلهم، و مش هنتمرن إلا بعد تنفيذ هذه الإجراءات
10 – عمر جابر لم يلعب المباراة بسبب تعبه، و كان عالدكة وتمرن مع اللاعيبة قبل المباراة، ولو موجود دلوقتي هنتمرن معاه زي الأول، و هو أخونا و مشكلته مع الإدارة مش معانا، و لو نزل معانا التمرين و لعب المباريات هنشيله على راسنا
11 – لما كنا في الأتوبيس لقيت ناس وقفوا أمام الأتوبيس و بيقولولنا الناس بتتضرب و في ناس ماتت و بعدين الأمن جه فرق الناس بقنابل الغاز و نزلنا ركبنا المدرعة و دخلنا الملعب
12 – المستشار مرتضى جاء لنا فى الغرفة و قال لنا “مفيش حاجة، دي خناقات مع الأمن و ضربوا غاز و الناس مشيت”
13 – الجمهور إللي يجي يحضر ماتشات لازم يتعامل بإحترام، و إللي غلطان لازم يتحاسب حتى لو وزير الداخلية
أحمد علي
14 – ممكن يكون حصل سوء تفاهم بيننا و بين عمر جابر، لكن اللاعيبة ماشفتش حاجة، و إللي شافتهم من الجماهير ناس محترمة
15 – ممنوع نمسك تليفون أول ما نخرج من الفندق، وأقسم بالله لو كنا نعلم أن هناك وفيات كان من المستحيل أن نلعب المباراة
حازم إمام
16 – و إحنا في الأتوبيس واحد من الجماهير جه قال لي ماحدش يلعب عشان في واحد مات و قررنا مش هنلعب لو حد مات فعلاً، وأول مادخلنا الإستاد سألنا الأمن قالولنا إن كل الحالات إغماءات و إصابات و مفيش وفيات و على هذا الأساس قررنا لعب المباراة، و طلبوا مني أتمرن و أنزل بدل عمر لأنه مش قادر يلعب بسبب الغاز
17 – أنا ماعرفش ألعب على جثة حد و أنا مش محسوب على حد غير على نادي الزمالك و ما بخفش غير من ربنا
18 – إحنا مالناش دعوة بقرارات مجلس الإدارة و عمر جابر أخونا، وإللي حصل بيننا و بينه إختلافات في وجهات النظر، والإعلام موجه علينا إحنا، سيبكوا مننا و من عمر و شوفوا الناس دي ماتت إزاي