كلام في ودنك

* حالة من الهدوء والسكون سيطرت علي جلسة مجلس النواب الأولي يوم الاثنين الماضي ولم نسمع ضجيجا في القاعة حتي نهايتها سبحان الله ولكن تاني يوم متفهمش ايه اللي حصل زمبيلطة وأصوات عالية لا مش كده بصراحة ونقول للنواب طيب متخليكوا علي وتيرة واحدة ايه لازمة التغييرات المفاجئة في الأحوال المزاجية دي.
تصدقوا ان الصورة هذه هي سبب رفض رئيس البرلمان الدكتور علي عبدالعال وعدد كبير من قيادات البرلمان العودة إلي نظام البث المباشر للجلسات.
بصراحة كده الدكتور علي عبدالعال رئيس مجلس النواب عنده حق قوي بصراحة يعني لأنه طلع ان التسامح مبينفعش مع المزوغين من النواب من حضور الجلسات واصراره علي تأجيل الموافقة النهائية علي مشروعات القوانين إلي حين اكتمال النصاب القانوني في جلسات مقبلة.
عبدالعال اتخذ قرارات فورية باستحداث نظام التوقيع بالبصمة في الخروج في نهاية الجلسة وعدم الاكتفاء بالتوقيع في الحضور فقط ورفع التوقيع بعد عشر دقائق بدل ربع ساعة وطبعا ده كله يؤثر علي صرف بدل الجلسات ودا مبلغ كبير ايه رأيكم بقي فالدكتور علي عبدالعال أمامكم والبصمة وراءكم وانتم أحرار بقي.
* نائب من اللي له صيت عالي قوي في عالم السياسة مزاجه يقعد في مكان تاني غير القاعة خلال انعقاد الجلسات مع حبايبه أول ما سمع رئيس البرلمان بيقول حيرفع التوقيت بعد عشر دقايق طار للتوقيع وهو يقول بدل ما يروح عليه بدل الجلسة وعلي فكرة هو نائب دمه خفيف اوه والحاجات دي مبتهموش بس اهي دعابة.
* استطيع ان اقول بملء فمي وبكل ثقة ان عزة علي رئيس قطاع الصحافة والاعلام في مجلس النواب وهي صاحبة خبرة طويلة وخريجة اعلام ست بميت راجل لا تستطيع ان تخرج من عندها والا وانت تبتسم كصحفي أو مراسل ليه؟ لأنها تسارع إلي احتواء الغضب وتحل مشكلتك في ثوان معدودة والله دا مش كلام مجاملة دا واقع احنا لمسينه وصحيح زي ما بيقول المثل الشعبي ادي العيش لخبازه ولو أكل نصه تقدر عمل الصحفي حتي يتمكن من اداء عمله في سهولة ويسر تحية خاصة للزميلة العزيزة علي مجهوداتها وستكتب اسمها بحروف من نور في لائحة الشرف ممن تولوا قيادة مكتب الصحافة بجد.
* فيه أعضاء لغاية الآن ورغم مرور ما يقرب من ثلاث سنوات علي عضوية البرلمان يرفضون التعامل بالوسائل التكنولوجية الحديثة رغم توزيع تابلت حديث علي كل واحد من أول يوم في البرلمان الجديد ومازالوا يطالبون بالتقارير الورقية ولكن رئيس البرلمان الدكتور علي عبدالعال حسم الموقف وقال انه لا عودة إلي الورق مرة أخري كل التقارير وجداول الاعمال ترسل علي الايميلات الخاصة بالنواب ولابد من استخدام النظام الالكتروني وأنا من هنا أوجه رسالة للنواب فضوها سيرة خليكوا في "التابلت" اسهل صحيح.
* مسئول كبير من احدي منظمات حقوق الإنسان يصر علي التحدث بلغة الغرب ويصر علي عبارة وجود حالات اختفاء قسري خلال مناقشة تقرير المجلس القومي لحقوق الإنسان السنوي حتي اننا شعرنا ان وزير شئون البرلمان المستشار عمر مروان ضاق ذرعا به وقاله بلاش تستخدم عبارة غربية تدين بها بلدك.
علي فكرة كل حالت الاختفاء القسري التي تروج لها الجماعة الارهابية اياها كانت محاولات منها للتمويه علي العناصر الارهابية التي تختفي للتحضير لعملية ارهابية جديدة لكن حتروح من الأمن المصري فين دي ناس عبيطة.
* لا اسكت الله لكم صوتا فلغاية النهاردة النواب العشرة من تيار واحد وقاعدين جنب بعض دايما مبيفرقوش بعض وكمان في الحجرة الصغيرة اياها يلتزمون الصمت منذ سنتين ودي التالتة مفيش الا مرة ولا اتنين تكلموا في الجلسات أو في بعض اجتماعات اللجان وحاسين بصراحة بعزلة جامدة ولو ان محدش دسلهم علي طرف طيب ميريحوا الدنيا ويسبوها لغيرهم وطبعا كله فايدة.