خبير عالمي: 7 معلومات لا تعرفها عن اكتشاف الغاز

كشف المهندس محمد حلاوة - مدير الأعمال بشركة IMCC العالمية لانشاءات البترول - عدة معلومات عن اكتشاف حقل غاز جديد بالبحر المتوسط مطالباً الناس بعدم المبالغة في التفاؤل .
ولفت حلاوة إلى أنه ربما يكون تكلفة استخراج الغاز اعلى من تكلفة استيراده وبالتالي فإن استخراجه قد يكون عديم الجدوى بحسب رأيه .
والمح إلى وجود معاناة مالية لشركة ايني الايطالية بسبب هبوط سعر البترول ل40 دولار وهو ما يعني ان تقبل هي والدولة المصرية بممول - بشروط قاسية لاستخراج الغاز:
وإلى نص التدوينة:

"مبدئيا كده عشان محدش يستغل الكشف ده إعلاميا و يضحك عليكم و عشان ما نرفعش سقف التوقعات بسرعة لازم تعرفوا ببساطة الآتي:
1- كبر أو صغر حجم الحقل و مخزون الغاز فيه فإنه يتطلب حفر آبار وإنشاء منصات لإستخراجه و معالجته و ضغطه و خطوط أنابيب في قاع البحر و محطات تحميل و تفريغ لأقرب وحدة إسالة ده لو قرروا يصدروا منه او لأقرب وحدة معاجة لو قرروا إنه يوزعوه داخليا و المشروع ده بيسموه مشروع تطوير الحقل .. و ده لو كان الحقل في منطقة مياه ضحلة يعني في حدود أعماق قصوي لا تتعدي ال 70 ل 90 متر ... في الحالة دي أقل وقت يلزم من بدء الدراسات حتي التشغيل في حدود 48 شهر و ممكن تصل ل 60 شهر يعني من أربع لخمس سنين علي أحسن تقدير و تكلفة انتاجه أكبر بكثير من تكلفة انتاجه من حقول شمال الدلتا اللي علي الأرض.
2- لو الحقل في مناطق أعماق أكبر من 90 متر سيتم اللجوء لعمليات الإستخراج و المعالجة والإسالة عن طريق وحدات (سفن) عائمة و ده موش ها يأثر علي الفترة المطلوبة للإنتاج من وقت الدراسات حتي التشغيل برضه ها تبقي في حدود من 48 ل 60 شهر علي أحسن تقدير لكن تكلفة الإنتاج هتزيد بزيادة كبيرة عن (1)
3- عشان نعمل (1) أو (2) لازم يكون فيه مطور و مشغل و مدير للحقل و ده موجود و هي شركة إيني الإيطالية اللي عندها القدرة الفنية أنها تطور و تشغل و تدير حقل الغاز في مقابل حصة من سعر المتر المكعب اللي ها ينتج محدد حسب اتفاقها مع الحكومة المصرية.
4- عشان نعمل (1) أو (2) بالإضافة لوجود مشغل لابد من وجود ممول لتكاليف تطوير الحقل و تشغيله .. في أغلب -ان لم يكن كل - مشاريع تطوير الحقول اللي سمعت عنها أو إشتغلت فيها بيكون تكاليف تطوير الحقل و تشغيله بالمشاركة بين مطور الحقل اللي هو إيني و مالك الحقل اللي هو الحكومة المصرية.
5- في ظل:
5.1 - تدني أسعار البترول و الغاز الحالية
5.2- الموقف المالي الصعب جدا لمجموعة شركات إيني الإيطالية (متابعين أخبارها و لسه مطلقين إعادة هيكلة داخلية لينكمشوا حتي يستطيعوا التعايش مع سعر البترول لما كان وصل ل 60 دولار و سموا المشروع fit to 60 دلوقتي الموقف اتنيل بالنسبالهم لأن السعر نزل ل 40 دولار و أقل)
5.3- مديونيات مصر المتأخرة لشركات البترول العالمية (اللي من ضمنهم برضه شركة إيني)
5.4- الموقف المالي لمصر بصفة عامة
ستصبح مهمة الحكومة المصرية و شركة إيني في إيجاد ممول لمشروع تطوير الحقل ده مهمة صعبة للغاية و ستساهم في إطالة زمن المشروع لأكثر من خمس سنوات .. أو سيعجل الحكومة المصرية بقبول عروض تمويل بشروط قاسية جدا قد تؤثر علي سعر بيع متر الغاز (((( داخليا)))) فقط لأنهم موش ها يقدروا يبيعوه في السوق بره بأعلي من سعره العالمي و بالتالي اللي ها يدفع السعر الغالي هو المستهلك المصري
الخلاصة .. تابعوا بحرص أخبار الكشف ده و أخبار مشروع تطوير الحقل و أهم حاجة تتابعوها هو مصدر تمويل مشروع تطوير و تشغيل الحقل و شروط التمويل و تأثيرها علي سعر متر الغاز.
علي العموم أنا مشترك في دوريات أجنبية كثيرة - بحكم عملي - بتصدر كل أخبار أسواق النفط و الغاز هابقي أتابعها و أخليكم تتابعوها..
6- الحقل علي عمق 1450 متر من سطح البحر .. يعني مشروع تطوير الحقل سيصبح أكثر تعقيدا و أكثر كلفة..
7- لابد من دراسات إقتصاديات الإستخراج و التشغيل ... أبسط أمثلة علي كده:
أ- أمريكا تملك إحتياطيات ضخمة و مهولة من "البترول الصخري" لكن ده لا يعني بالضرورة انهم يقومون بإستخراجه لأنهم وجودوا انه ارخصلهم و أفضل لإقتصادهم انهم يستوردوه من دول و مناطق ثانية من العالم..
ب- أستراليا مع شركة "SHELL" و قفت مشروع "STONE" و مشاريع "ُBROWSE" في المياه العميقة شمال أستراليا ...
ج- إنجلترا مع شركة "CHEVRON" وقفت مشروع "ROSEBANK" في المياه العميقة في بحر الشمال لهبوط أسعار البترول..
د- كل مشاريع تطوير الحقول في المياه العميقة أمام أنجولا و نيجيريا و غانا و موزمبيق و البرازيل لم تكن تري النور ألا بعد تعدي سعر برميل البترول ل 57-60 دولار..
يعني لو لقينا ان سعر متر الغاز باستخراجه من الحقل ده ها يبقي أكثر من سعره إذا استوردناه مثلا من روسيا أو قطر أو إيران يبقي نتوقف و ننتظر إرتفاع أسعار النفط و الغاز مرة أخري - و ده سيحدث علي 2022 - 2023 - و ساعتها سيكون الحقل إقتصاديا مربح ...
أما لو تعاملنا معاه سياسيا و إعلاميا زي مشروع تفريعة القناة و كان تكلفة إستخراج المتر المكعب من الغاز أكثر من إستيراده فده معناه أننا سنستهلك الغاز ((((محليا فقط)))) و بأسعار أغلي من باقي العالم و يترتب عليه زيادة تكلفة "الطاقة" محليا ... و الطاقة بند مهم و لما تزيد تكلفتها علي طول معدلات التضخم تزيد أوتوماتيك و يبقي الحقل ده عمل مشكلة بدل ما يحلها ...
مرة تانية علينا متابعة أخبار الكشف ده بحرص شديد و خصوصا أخبار تمويل مشروع تطويره و تكلفة سعر المتر المكعب من الغاز منه بالمقارنة بأسعاره العالمية..
8- الرابط ده فيه اللي انا بتكلم عليه و خايف منه .. الخبر من علي رويتر .. بتاريخ 5 يوليو 2015 يعني من حوالي أقل من شهرين .. يعني 100% الكشف عن الحقل ده كان معروف وقتها... "نشر خبر من رويترز يتحدث عن رفع مصر لسعر شراء الغاز من شركة ايني الايطالية بنسبة 100% قبل اكتشاف الحقل بشهرين"