ناشط يكشف معلومات هامة عن إكتشاف الغاز

تداول نشطاء على مواقع التواصل الاجتماعي تدوينة لاحد النشطاء يوضح فيها بعض المعلومات الهامة المتعلقة باكتشاف احدى الشركات الايطالية لحقل غاز بمصر .
وقال احمد زهران - في تدوينته التي تم تداولها على نطاق واسع - : عشان بس أوضح حاجة زيادة في موضوع الغاز عشان باين ان في ناس بتنسى ثورة الغاز الي بتحصل كل كام سنة.. في حاجة في اكتشافات الغاز و البترول اسمها P1 و P2 و P3 و الي بتوصف كمية البترول و الغاز المكتشف. P1 بتعني كمية الغاز أو البترول المؤكد (ألي مهندسين الشركة شايفينه بعينهم :)) و P2 هو كمية الغاز او البترول الي الجيولوجيين مش شايفينه بس متأكدين بنسبة معقولة انه موجود اما P3 بقى فبيبقى كمية الغاز او البترول المرجح وجوده في بقية الحقل لكن بدون دليل قوي يثبت وجوده.
وأضاف: الشركات الدولية لما بتعلن عن كشف جديد بتحاول تكبر في الP3 على قد ما تقدر عشان تزود من قيمة الكشف و بالتالي تزود من قيمة الشركة. أشهر قصة في الموضوع ده هي قصة شركة شل في عام 2004 تقريباً لما قامت الشركة (بيقولوا بحسن نية) بتقييد بعض كميات البترول المكتشفة تحت بند P3 على انها P2 في حسابات الشركة.. عند اكتشاف الموضوع استقال رئيس الشركة و كانت ورطة كبيرة لشركة المحاسبة القانونية لشركة شل .. ده طبعاً تسبب في نزول سعر سهم شركة شل "بحسب روايته"
وأردف: طبعاً في الدول الي حكوماتها فاسدة زي عندنا بيتطابق هوى الشركات في تضخيم الكشف مع هوى الموظفين الباحثين عن سبوبة و بينتج عن ده أوضاع زي الي حصل زمن سامح فهمي و المخلوع مبارك من مبالغة في كميات احتياطي الغاز بهدف التشجيع على تصدير الفائض و في نهاية الأمر تمضي عقود تصدير فاسدة بأسعار بخسة على أساس ان عندك كتير ... ساعتها قالوا مصر عندها 70 تريليون قدم مكعب و هللوا و اتصوروا و صدروا و بعدها بكام سنة ابتدينا نستورد فحم ‎.. ايه الدرس الي نتعلموا؟ بالهداوة نستنى الأرقام بتاعت الاحتياطي المؤكد P1 و نشوف قد ايه من ال30 تريليون قدم مكعب دول P1 ...
وأستدرك : حاجة تانية... ال30 تريليون قدم غاز يساوي تقريبا 5،5 مليار برميل بترول و انتاج السعودية السنوي من البترول تقريباً 3 مليار برميل يعني الحقل كله على بعضه يساوي انتاج السعودية في سنة و نص بس .. يعني ايه الكلام ده؟ يعني الحقل ده ممكن يكفي مصر 20 سنة استهلاك (بافتراض ثبات الطلب) لكنه مش هيخلينا من مصدري الطاقة الكبار و مش هنلعب بالفلوس لعب و لسة هنركب الأتوبيس و لسة الكهربا هتغلى و لسة هندور على فلوسنا الي سرقها مبارك و عصابته ... حاجة تانية ... غاز كتير حلو جداً ... بس بردو الظلم لأ و بردو القهر لأ "بحسب وصفه"