حكاية رجل عشوائي عبد العزيز محمود

حين تولى بهلول بيه العشوائي رئاسة شركة الانابيب المسدودة قبل عشر سنوات كانت فرحتنا غامرة، وأذكر ضمن ما اذكر اننا وقفنا يومها في طابور طويل امام اسانسير الشركة ونحن نغني:
-نورتنا وشرفتنا وآنستنا يا...... بهلول بيه!
ولاانسى يومها كيف صافحنا جميعا ثم قال كلمته الشهيرة:
-وشرف امي لأوريكم الشركة دي في عهدي ح تبقى عشوائية أد ايه !!!!
وبالفعل تحولت شركة الانابيب المسدودة في عهد بهلول بيه الى شركة عشوائية بمعنى الكلمة حتى انها حصلت خلال شهرين على جائزة السح الدح امبو في العشوائية !
ومع تغيير خطوط الانتاج بقرار منفرد من بهلول بيه تراجعت المبيعات بصورة خطيرة لأن الانابيب الجديدة للأسف كانت مخرومة، فاصدر سيادته قرارا بلحمها يدويا لكن النتيجة جاءت مخيبة للآمال فقلنا :
-طيب مانغير النشاط ونرتاح من وجع الدماغ ده سعادتك!!
-ازاي يعني؟؟؟
-بدل ما ننتج انابيب مخرومة ونقعد نلحمها .. احنا نتخصص ف الانابيب المخرومة !!
-عليا النعمة انتوا فعلا شياطين !!
وهكذا تغير نشاط الشركة واسمها فاصبحت شركة الانابيب المخرومة فيما وصف بانه اكبر عملية تطوير لاقت استحسانا على أعلى مستوى فتم منح الشركة جائزة "السيخ الذهبي" ، وكان بديهيا ان نحتفل بهذه المناسبة :
-اللي حصل ده معجزة يارجالة..ايوة معجزة والفضل كله لبهلول بيه!
-طبعا معجزة ..."السيخ الذهبي" حتة واحدة ...دي معجزة كبيرة بجد !!
-عليا الطلاق بالتلاتة دي معجزة ولا كل المعجزات !!!
لكن بهلول بيه قال:
-ولامعجزة ولادياولو ..انا راجل عشوائي وطبيعي الشركة بتاعتي تاخد "السيخ الذهبي" في العشوائية !
فاندفعنا جميعا نغني : ياحلاوته ياجماله ..يارب تخليهولنا نتملى من جماله!!!!
وعقب الحصول على "السيخ الذهبي" تم تكليف شركتنا بتنفيذ مشروع ردم ترعة الزمر، واستبدالها بانابيب طويلة مخرومة، يومها استدعانا بهلول بيه الى مكتبه وقال:
-طبعا عارفين المشروع ده مهم اد ايه؟!
-اكيد مهم ...مادام سعادتك اللى ح تشرف على تنفيذه !!
-بالمختصر كدا ريحة الترعة والناموس اللي طالع منها مجنن حنتيرة بيه وكيل الوزارة ومش مخليه يعرف ينام!
- ايوه بس دا مشروع ح يتكلف كتير سعادتك!!
-مش مهم الفلوس...المهم حنتيرة بيه يعرف ينام !!
لكن المفاجاة جاءت حين اصدر بهلول بيه قرارا بعد ردم الترعة باعادة حفرها:
-ازاي يعني سعادتك.؟؟؟؟.....ح نحفرها تاني بعد ماردمناها ...احنا بصراحة مش فاهمين حاجة !!
-انشا الله ماعنكم فهمتوا يابهايم ...حنتيرة بيه خلاص غار في داهية ...واللي مسك مكانه البردقوشي بيه !!
-طيب وايه لازمتها نحفر الترعة من تاني؟؟؟
-عشان البردقوشي بيه طالب مننا ننكد عيشة حنتيرة بيه !!
وهكذا استمر حفر وردم الترعة اكثر من عشر سنوات، لدرجة انه اصبح المشروع الوحيد للشركة وكان طبيعيا أن يشفط كل ميزانيتها!
لكن المشروع كان وش السعد على بهلول بيه فقد صدر له قرار بتجديد الثقة خاصة بعد ان استخدم كل المخزون الراكد من الانابيب المخرومة ..يومها دعانا الى حفل شاي في مكتبه ثم سألنا بشكل مفاجيء:
-ايه رأيكم في الواد ابومخ كاوتش ؟؟
-ما سعادتك عارفه حمار وبهيم وجاهل ومتخلف عقليا!
-عشان كده انا رشحته يمشي ورايا !!!!!
لكن ابومخ كاوتش لم يستمر طويلا فقد كان الصراع حاميا على من يمشي الاول وراء بهلول بيه وهكذا جاء السلعوة ثم المهزوز ثم ابوراسين ثم أبوضحكة جنان ثم عاد ابومخ كاوتش وهكذا دواليك حتى اصبحت المسالة اشبه بنكتة كبيرة!
ثم كانت المفاجأة حين تلقينا دعوة لحضور حفل زفاف بهلول بيه على أم بدوي اخت البردقوشي بيه وكيل الوزارة الجديد اللي عندها اربع عيال مع التنبيه علينا بضرورة ارتداء الملابس الرسمية..
-ايوة بس دا بهلول بيه متجوز وعنده عشر بنات..ومراته حامل ف البنت الحداشر!!!
-ماهو عشان كده عايز يتجوز ام بدوي عشان تجيب له الولد!!!
-طيب وايه اللى فكره في الولد بعد السنين دي كلها؟؟
-ح أقول لك ايه...عشوائي بعيد عنك!!!!
لكن زواج بهلول بيه من ام بدوي لم يدم طويلا فقد انجبت له بنتا فرمى عليها يمين الطلاق وتزوج ام السعد فانجبت له طفلا منغوليا مات بعد شهرين فطلقها ..وتزوج الست مرجانة التي انجبت له ثلاث بنات فطلقها واعاد زوجته الاولى التي اصبح عمها الحلنجي بيه رئيسا لهيئة اللي يحب النبي يزق !!!
باختصار كانت عشوائية بهلول بيه مثيرة للجدل لكنها كانت مثار انبساط عام، حتى جاء يوم اكتشف فيه الجميع ان بهلول يتآمر للحصول على منصب الحلنجي فصدر قرار مفاجيء باحالته الى المعاش المبكر ...وكانت صدمة كبيرة لنا حين سألنا عنه مدير مكتبه فقال:
-ماخلاص سعادته غار في ستين داهية ...وجابوا مكانه الفنطاس بيه!!!