قالوا لي بتحب مصر*

قالوا لي بتحب مصر أنا قلت مش عارف بس السؤال م القهر وللا حنين جارف وللا أنين مكتوم بيقوله ناي عازف علي غزالة تئن من جرحها النازف وإزاي أقول أنالأ والقلب طير لايف ومنين أقول أيوا لو كنت يوم خايف قالوا لي بتحب مصر أنا قلت مش عارف --------------- قالوا لي بتحب مصر قُلت القلب مسْكنها وإزاي ماحبِّش مصر وأنا من أصل سكانها تعشقها روح الغريب لو زارها وسكنها بلد الحبايب بلدي لو مت أسكنها وإن يوم رمتني في ضيق وجرحني سكينها كل الجراح بتطيب لو دقت ماء نيلها -------------------- قالوا لي بتحب مصر قُلت الحب دا كلمة ممكن تقولها لشيخ لزعيم أوعالمة وتقولها كل الناس لمَّا تِكُون حالمة لكن يقولها قلب مدبوح بِمُوس تالمة وتقولها نظرة عين في دمعها عايمة وتعيش بها أرواح برَّا الحدود هايمة يبقي دا حب أكيد ومحبته دايمة 2 قالوا لي بتحب مصر أنا قلت دي غرامي واللي بيعشق مصر عشقه أكيد سامي ياللي هواها أسركم وأسرني في كلامي الآَهَا في حُبِّكُم والنُّوح في إلهامي هو دا سر الخلود وسهمها الدامي إكْتِب شُعورك ياقلم فُصحي وكلام عاميِّ حب الوطن ديني وصلاتي وصيامي -------------------- قالوا لي بتحب مصر رديت بتأليفة وقلت لعيالي ومراتي تسقِيفة الحب دا كلمة ومصر تَوْلِيفة أميرة في قصرها لطيفة وعنيفة غجرية في حبها وعظيمة وعفيفة قامة وهامة سلطان وتشريفة جمعت خصال الزعامة وعيالها حَرِّيفَة حكمة وطب وفلك وألف توصيفة شعرا وأدبا وناس في الفن كَيِّيفَة لكن ساعات يطلع واحد بتخْرِيفَة ويْشِلِّ نبض الوريد فينا بِتَخْوِيفَة يزرع تقاوي الغل ويحلل الجيفة ويْبِيعْنا بالدسته والكوم بِتعريفة قالوا لي بتحب مصر أنا قلت مش عارف وفتحت باب في القلب وقلت له شايف؟ ======== ---------- ابوالمجد حسين 2006 amena4yazan@yahoo.com