عبّر الإعلامي عمرو أديب عن غضبه وصدمته من موقف الكونجرس الأمريكي الرافض استمرار المعونة الأمريكية لمصر . وقال "أديب" في برنامج "كل يوم" الذي يقدمه على شاشة "ON E" : "بينما نتكلم الآن في لجنة في الكونجرس بتعمل جلسة استماع عن المساعدات الأمريكية لمصر اللي هما مليار و 300 مليون دولار .. جزء منها عسكري وجزء صغير جدًا مش عسكري .. في الجلسة دي أعضاء الكونجرس قالبين الدنيا على المليار وتلتميت مليون ومش عايزين يدوهم لمصر .. قالك احنا عايزين نلغي المعونة لمصر خالص ". وأضاف: "فيهم واحدة قالت أصل مصر دي مش مضمونة ومحدش عارف ايه هيحصل فيها .. يعني هنرمي فيها فلوس وبعدين تروح علينا؟ .. و واحد تاني قالك احنا صرفنا عليهم السنين اللي فاتت دي مليارات ومفيش طيارة منهم واقفة معانا فوق سوريا والعراق فطبعًا شغالين نار على الفلوس دي". وتابع: "ممكن أقولكم رقم ؟ عشان تعرفوا الأرقام في أمريكا عاملة ازاي .. فيه فيلم اللي هو fast and furious بتاع فان ديزل .. الفيلم دة في أسبوعه الأول في الخارج عامل مليار دولار .. دة فيلم وهما واقفين لينا على المليار و 300 مليون .. والله العظيم أنا الود ودي يلغوا المعونة عشان زهقنا .. كل سنة يذلونا بيها ذل الإبل .. والبلد دي بتصرف دلوقتي أكتر من كدة بكتير .. الغواصات الألماني اللي جت من يومين دي بكام؟ حاملة الطائرات دي بكام؟". واستدرك: "أنت بتصرف في التسليح بتاعك أكتر من كدة بكتير .. ومالو نشتري قطع الغيار الأمريكية بفلوسنا برضو بس ميقعدش بقى على المليار و 300 مليون دول يقرفنا عليهم .. مش مبلغ يعني .. ومش حاجة .. إسرائيل بتاخد 10 مليار .. دي اللي بنشوفها وفيه اللي مبنشوفهاش .. وقاعدين دلوقت في اللجنة بيبيعوا ويشتروا فينا .. الست قالتلك مش ضامنينها جايز السنة الجاية متبقاش موجودة .. بتتكلم على مصر والله عندهم حق .. إنما لما بيدفعوا الفلوس ل(....) وهما ضامنين موجودة ولا مش موجودة .. دة مش هنتكلم فيه". الفيديو:
