غادة شريف: "السيسي زانقنا تحت السلم"

هاجمت الكاتبة الصحفية غادة شريف، اليوم الخميس، الرئيس عبد الفتاح السيسي، وقالت "إنت ليه زانقنا كده تحت السلم وحاشرنا فى البدروم وهارينا ضرائب و غلاء اسعار".
وفي تدوينة له عبر فيسبوك، اضافت: "جريدة البوابة النهاردة كاتبة ان حكومة قطر كانت عايزة تشترى من مرسى مجمع الحديد و الصلب بحلوان و اللى كان اكبر مجمع فى الشرق الاوسط لولا ان مبارك خربه لصالح حديد عز.. قلتش انا حاجة يا حمادة؟".
وتابعت "طيب لما تكون قطر عينها على المجمع ده و إنت ربنا يفتحها عليك بمليارات القروض، و لقيت نفسك بعد الضنا معاك دهب و ياقوت و مرجان و أحمدك يارب، فالمفروض بقى إنك كنت تجرى جرى تشغل المجمع ده بالفلوس اللى جتلك.. العقل و السكلانس بيقولوا كده!.. لكن انت روحت تبنى عاصمة ادارية من غير ما تعمل دراسة جدوى، و لمّا الاماراتيين و الصينيين لما عملوا دراسات الجدوى لقوا ان المشروع مالهوش لزمة فعلشان كده انسحبوا!".
وقالت "و برضه روحت تحفر قناة من غير ما تعمل دراسة جدوى، لكن ثبت بعد كده ان القناة ايضا ماكانش لها لزمة نتيجة لانخفاض معدل التجارة العالمية البحرية، و ده برضه كان هيبان فى دراسة الجدوى لو كنت عملتها..
واستطردت طيب، كل ده سامحنا فيه و استعوضنا ربنا فى الفلوس اللى اترمت فى الارض، لكن لمّا عرفت ان العاصمة الادارية غير مجدية ليه لسه بتعند و لسه بتصرف عليها ؟.. ما توقف الشغل فيها و تخلى الهيئة الهندسية تشغل المصانع اللى كانت عين قطر عليها.. إنت ليه زانقنا كده تحت السلم و حاشرنا فى البدروم و هارينا ضرايب و غلاء اسعار بينما لو شغّلت المصانع هتُفرج علينا و عليك؟ انت ليه مش عايز الناس تعرف تعيش مع إنك تقدر تعمل كده و من وَسَع؟!!".
ومضت ساخرة بالقول "هى ليه فؤادة رافضة تفتح الهويس؟!!.. على فكرة الكِبر و العناد حولوا إبليس من ملاك عابد لشيطان.. حب الذات و البحث عن الخلود خرّجوا آدم من الجنة!.. اما احنا بقى يا حمادة فعناد فؤادة و كبرها حولنا لشحاتين، و بحثها عن الخلود خرّجنا من هدومنا!.. ده مش شيى من الخوف يا حمادة ده شيئ من الأحيييييه!".