مش هسامحك

مش هسامحك
لو تموت بألف مَرَّه
ومهما تصرخ أوتئن
مش هسيب من حقى ذ َرَّه
وقلبى مش رايح يحن
خدت حقى رميته بَرََّه
وابنك معاشر ألف جن
مش هسامحك
دا أنت ظلم الدنيا كله
كان بيلبس
توب ملامحك
كنت تدبحنا بجراءه
وابنك اتهنى بقوتى
مهما تطلع يوم براءه
حقى مضمون بعد موتى
مش هسامحك
مهما تتصاب ف الكلاوى
ومهما تتسرطن فى قلبك
يا ما شفنا كتير بلاوى
واتكوينا من مقالبك
مش هسامحك
مهما تتنفس صناعى
والدود بياكلك لحم نَى
كنت تقطع لى دراعى
وتدفن ابنى فى قبره حَى
مش هسامحك
خدت حقى بالمغالطه
وكنت تمسح ف الحروف
مهما تعيا بألف جلطه
وتبقى منفوخ كالخروف
مش هسامحك
قلت الكفن من غير جيوب
طلع الرصيد كله باسمك
مهما بتخبى العيوب
ومهما سوس ينخر فى جسمك
مش هسامحك
مهما قطر يفوت عليك يفرمك
وكل لحمك يبقى كوره
أو صاروخ يدخل فى بطنك
يخرمك
ولكل ظالم تبقى صوره
مش هسامحك
لو ألف عقرب عقربوك
والسم يغلى جوا دمك
فوق سيخ ملهلب يسحبوك
عمر دمعى فى يوم ماهمك
مش هاسمحك
كل شئ يخدم مصالحك
كنا نصرخ كالدبيح
سِبت الكلاب فينا تجز
لو تبقى أعمى أو كسيح
والقيح يسيل منك ينز
مش هسامحك
دا أنت ظلم الدنيا كله
كان بيلبس
توب ملامحك
مش هسامحك
الشاعر/ راضى على الطهطاوى
سوهاج – طهطا – عرب بخواج-
عضو نادى الأدب المركزى