لقاء عاصف بين القطة والبرادعى

(قالت القطة فى قلق): وبعدين؟ الوقت أَزَف، ومش باين أى إمكانية تغيير. (قلت فى انبساط وراحة بال) يا قطة إنت مستعجلة على أيه! اللى ما يحصلش النهاردة يحصل بكره، ورانا إيه؟- (قالت فى حقد عميق) هى دى مشكلة مصر!
كل واحد بيدور على نفسه. لو كنت عايش فى العشوائيات زى الناس الغلابة، أو فى الزبالة زى القطط كانت الساعة مرت عليك بسنين- (قلت فى دهشة) يا قطة خليكى معقولة. إنت عاوزه تحمّلى النظام الحالى مسؤولية القطط كمان؟- (قالت فى ذكاء) وليه لأ؟ مش سيدنا عمر بن الخطاب قال لو عثرت دابة بالعراق لخشيت أن يُسأل عنها عمر- (قلت فى خشوع) رضى الله عنه. كان مثال الحاكم العادل الذى يُضرب بعدله الأمثال، وده يُؤكّد نظريتى إن العدل فى الدنيا قليل.
(قالت القطة فى تصميم) الكلام معاك مضيعة للوقت، قوم بينا على البرادعى أنا حاكلمه بنفسى- (قلت مذهولا وأنا أتبعها) يا قطة بطلى تهور، حنقابل البرادعى مرة واحدة! البرادعى زعيم كبير ووقته مشغول- (قالت القطة دون أن تلتفت نحوي) البرادعى مخلوق من لحم ودم مصيره الموت والتحلل. إنتم اللى بتصنعوا الطغاة بتقديسكم للبشر، أنا خايفة لو مسك الحكم تفسدوه- ( قلت ضاحكا) إنت بتقولى فيها!، أراهنك إنهم حيعملوله أغنية بتقول: «يا برادعى يا حبيبنا، جايزة نوبل بقت فى جيبنا»- ( طوحت القطة ذيلها فى وجهى وقالت فى ازدراء) منافقين!
(بمجرد أن قابلت القطة البرادعى حتى قالت له مؤنبة) ممكن أعرف إنت فين؟- (قال البرادعى فى ضيق) بيضيقوا عليا، حتى الفضائيات بتتجاهلنى- (قالت القطة فى فخر) ولا يهمك، حاطلعك فى الفضائية بتاعتنا: صوت القطط الحر، (ثم فى لهجة غاضبة) وبتسافر كتير ليه؟- (قال البرادعى وقد فوجئ بالهجوم المباغت) ارتباطات دولية سابقة- (قالت القطة فى غضب) ما ينفعش، لازم تتواصل مع الناس ليل نهار، تُشعرهم أنك واحد منهم، عايش مشاكلهم لحظة بلحظة- (قلت مقاطعا) يا قطة لازم تكون خطواتنا محسوبة وبالعقل- (قالت القطة فى غضب) اسكت خالص.
التردد بتسموه عقل، والجبن حذر، وقبول الأمر الواقع حكمة. أنا عاوزاك تقرا سيرة سعد زغلول كويس، لأن ده الزعيم الوحيد اللى التف الشعب حوله بكل فئاته، مسلمين ومسيحيين، تجّار وموظفين، لو تردد سعد زغلول أو خاف من قوة الاحتلال ماكنش بقى زعيم. الزعامة ما بتحصلش بالعقل والخطوات المحسوبة، الزعامة ثقة بالنفس وثقة بالشعب وعدالة القضية مع جزء تهور ومجازفة واقتحام للأخطار.
اسمع يا برادعى كلام القطط تكسب، لو انصلح حال البلد على أيديك حيُكتب لك أجر فى كل نَسَمة عايشة، مش بس البشر، القطط والحيوانات.