المعتصمون على رصيف «الشعب» يتفقون على تنظيم هتافاتهم: كل مجموعة تهتف ربع ساعة

رصيف مجلس الشعب شهد مشادات كلامية بين عمال النوبارية وتحسين الأراضى ومراكز المعلومات حول أولوية الهتاف أمام المجلس حيث تداخلت الهتافات بين المعتصمين. جمال كامل منسق اعتصام النوبارية، قال: «يا حضرات المعتصمين.. هما كده كده مش هيسمعونا.. نبقى كويسين مع بعض أحسن.. دى قضيتنا واحدة وإحنا أصحابها بس». وبين شد وجذب اتفق المعتصمين على إعطاء كل مجموعة 15 دقيقة للهتاف وأخرى لحمل نعش والسير به على رصيف المجلس، تعبيرا عن موت قضيتهم وباقى المعتصمين مستمعون.
بدأ الهتاف بعمال مراكز المعلومات لملكيتهم الميكروفون الوحيد فى الاعتصام وبعده تحسين الأراضى ثم النوبارية.
اللافت أن المعاقين لم يتدخلوا فى المشادات، وقالت داليا محروس، إحدى المعتصمين: إحنا معتصمين من 70 يوم ومفيش فايدة نبقى حلوين مع بعض كمعتصمين علشان الأعادى اللى جوه ما يفرحوش فينا.