مصممة أزياء تقدم عروضها فى رمضان: مش كل واسع بلدى ومش كل ضيق شيك

رمضان بالنسبة لها يعتبر الموسم الأهم لعرض تصميماتها، فالطريقة التى تفضلها نهلة الحاجرى فى تصميم الأزياء تلقى إقبالا من الفتيات والنساء فى رمضان أكثر من أى شهر آخر. على عكس المعتاد من مصممى الأزياء، ترى نهلة أن الأزياء كلما كانت محتشمة كانت أكثر شياكة وجاذبية، لذلك قدمت على موقع إلكترونى عرض أزياء لمجموعة من الفساتين الواسعة بأقمشة ذات ماركات عالمية أطلقت عليها «سهارة ويلو»، ورغم أنها صممتها قبل رمضان. فإنها رأت أن الوقت الأنسب لعرضها هو شهر رمضان، تروى نهلة: «أول مرة أعرض كان فى شهر مايو لكن أنا شفت إن رمضان هيكون مناسب للأزياء اللى بحب أصممها، لأنها بتكون واسعة وفضفاضة لكن فى نفس الوقت شيك وماركاتها عالمية».
وأضافت: «مش لازم اللبس يبقى ملزق علشان يكون شيك، ومش كل لبس واسع ومحتشم يكون بلدى». ورغم أنها غير محجبة فإنها ترى أن الالتزام بمواصفات الزى الشرعى لا يتعارض مع الأناقة: «أنا باحب اللبس من زمان، وطول الوقت بحاول أبتكر تصميمات جديدة، لكن بفضل دايما اللبس الواسع ومش بحب اللبس المبتذل مش بس لأننا مجتمع شرقى لكن كمان لأن ربنا قال كده». زى المناسبات لا يختلف كثيرا عن زى الصباح فى تصميمات نهلة، حتى إن شهرة أزيائها المحتشمة جاءت من السهرات أولاً: «المعروف إن لبس المناسبات بيكون مفتح، لكن أنا كنت بصمم لنفسى فساتين سهرة مقفلة، وكانت كل الناس بتتعجب فتأكدت ساعتها إن الفضفاض ممكن يبقى موضة مطلوبة ومحبوبة».