«أذوني ودمروا مستقبلي.. مش هسيب حقي».. لاعب بيراميدز يفتح النار على مسؤولي النادي

فتح محمد عادل «أمو»، لاعب نادي بيراميدز، النار على مسؤولي النادي السماوي، بسبب عدم حصوله على حقوقه المالية من النادي.
وكتب «أمو»، عبر صفحته على موقع التواصل الاجتماعي «فيس بوك»: «بعد إذن كل حبايبى وأصحابي معايا حوار كبير جدًا جدًا جدًا، اتأذيت وأدمرت والناس دول كانوا سبب في تدمير مستقبلى بالكامل، أنا مش قادر أفوق من صدمتى بعد ما كنت أجمد لاعيب في الدورى الممتاز (ب) سيزون 2023 وأجمد لاعب في نادى مصر المقاصة خلونى مش عارف أفوق بجد دول ناس لا يمكن يكونوا بن آدمين بيشعروا وبيحسوا زينا، أنا لا يمكن اتسبب في ضرر نفسي لشخص لا يمكن اتجرأ أقول كلمة مش كويسة لأى شخص، إزاى بيقدروا يعملوا كده».
وأَصاف: «أنا صعبان عليا أقول عليهم ( حر... ونص....) بقالى سنة بقول ياجماعه عيّب ياجماعه مش لاقى أصرف على أهلي ومحدش بيرد عليا، أختى كانت هتخرج من كليتها بسبب عدم توفير المال لدراستها ولكن أشخاص من عيلتى وقفوا جنبي والحمدلله أختى من ضمن الخمسه الاوائل في كليه صيدلة وده شيء يجعلنى انبسط أكتر من أي إنجاز شخصي بحققه، لما ردوا عليا حسسوني بشحت منهم».
وتابع: «عمرو ده قالي أنا سلفتك فلوس رجعتهالى متخيلين النقص والمرض واصل عنده لفين، ده شخص للأسف مريض لا يمكن يكون بني أدم صعبان عليا أهله وولاده والله وهما بيقروا إن بباهم (ح....) ومؤذي انا مش بخاف ولو ده هيكون نهاية مشواري في الكورة فأنا مبسوط إني خارج نضيف وسوى ولسة محافظ على تربية أهلي ليا وسط كل المهذلة وقلة الأدب وقلة الذوق دي أنا لسه لحد الأن بستوعب إيه اللي عملوه معايا ده وليه ممكن شخص يتسبب في الضرر الكبير ده ويبوظ حياه شخص هو وأسرته».
وواصل: «أنا عمرى ما هنسى لما كلمت شخص مسؤل في النادى قولتلوا أنا أختى عايز أدخلها صيدلة وبستأذنك فلوسي هاخدها امتى قالي حرفيًا دخلها طبعا أقل مبلغ هتاخده هتدفع فلوس أختك قولتلوا تمام استلفت ودخلتها وبعدين لقيت نفسى في البيت بدون أي نادي ومصدر الدخل الوحيد اللى بيستر بيتى بأكمله مبقاش موجود.. ملعونة الكورة اللى تخليني أعيش كل الصعوبات دى».
وتابع: «أنا مركز أكتر في البيزنس حاليا ومبقاش فارق معايا إيه ممكن يحصل أنا مستكفى بكل اللى حصلي بالكورة مش متخيلين ياجماعة الحلم اللي أول ما وعيت على الدنيا كنت عايز أحققه إن أنا أكون لاعيب كورة كبير ومكسر الدنيا وبحلم ألعب منتخب وأكون أسطوره مش مجرد لاعيب عادي بيعدي زيه زي أي لاعيب تاني، مش متخيل قد ايه الموضوع صعب لما تكون فقدت شغفك وفقدت كل حاجه بسبب حاجات للأسف مالكش يد فيها».
وأكمل: «القريبين منى يعرفوا قد إيه أنا عانيت لكن أنا دلوقتى مش عايز حد يكون قلقان عليا.. اتحاد الكورة المحترم المؤدب عقودي اختفت وومش بيظهر إن انا كنت لاعيب مقيد في بيراميدز متخيلين الأذى واصل لفين».
وأردف: «أنا أخدت إجراءات قانونية ضدهم كلهم ومش هستكفى بالفلوس بس.. إقاله عمرو وذل عمرو بسيوني تخليني اشبع وكإنى ثروتى مليار جنيه، أنا رسالتى ليك ياعمرو قدام الناس كلها انت ياعمرو بيه عمرك ما تكون أقوى من شخص ربنا حبب فيه خلقه وجعل في ضهره ناس تساعده مال الدنيا كلها ميساويش أي حاجه جنب كرامتك ونزاهتك ورجولتك حسبى الله ونعم الوكيل».
وزاد: «عمرو، أمو، بالنسباله شخص مالوش لازمه هيضحك عليه وطبعا أمو سكت فخلاص نعيش وننبسط ميعرفش إن أنا بس بفوقله من اللي عملو فيا، كان رد عمرو بيه المحترم لما سألته ليه بتعمل كده ليه بتبطلنى كورة قالى (والله يا أمو انا مش عارف أنا عملت إيه بس عموما لما أجي من دبي هنتقابل ونحل المشكله دي) ومن وقتها وأنا مشوفتهوش وماخدتش ولا جنيه وبعد ما اختى دخلت كليه صيدلة بقولهم حرام عليكو أنا مش عارف هسد فلوس أختى إزاى وليه تعملوا كده مكنتش مصدق إن فيه شخص سوى راجل ومسؤل كبير في نادى كبير يعمل كده للأسف».
وأَوضح: «والله العظيم كل حرف بحكيه موجود وب الأدلة كمان بصوتهم ومسدجاتهم ليا لحد اخر يوم في القيد وهما بيقولى خلاص ياحبيبى إنت كابتن أيمن الشريعي عايزك وهياخدك إعاره بنية البيع وفجأه يختفوا كلهم والقيد يقفل، وأنا قاعد في البيت ولا بتمرن ولا باخد ولا جنيه من أي شخص أصبحت مدان من سيزون البلديه وكنت بقول هرجع النادي وربنا هيعوضني.. مستر عمرو بسيونى كلمنى قالى هتبتدى الإعداد معانا اللى يعرفنى كويس يعرف إن كان ليا قصه وقلت مش هلعب كوره وهعتزل وياريت ده كان حصل وقتها ومكنتش أعيش اللى أنا عيشته ده، الناس دي بكل برود وبجاحه بتقولى انا اه اشتريتك بس متفقتش معاك على حاجه في بيراميدز، كابتن هشام محمد وحسين السيد ومحمود دونجا وأحمد الشناوى وكابتن احمد عبدالرؤف كل ده كان موجود تقدرو ترجعولهم وتسالوهم وأنا متأكد أن الشهادة واجب عليك تقولها بكلّ صراحه ياما تدخل في حرب مع ربنا وانا ولا انت ولا أي شخص هيقدر يوقف ضد اللى ربنا عايزه».
وأتم: «ربنا اختار يفوقنى النهارده بعد ما عدى على الموضوع ده سنة كاملة عشان افضحكوا حسبى الله ونعم الوكيل في كل شخص اتسبب في ضرري مش مسامح أبدًا ومش هستكفى ولا هرضى بأي مال غير وعمرو مش موجود في أي مجال في مصر ويتحاسب ازاى تشتريني بملايين وتخرجنى اعاره مجانيه وتتفق معايا على 22 مليون جنيه في 5 مواسم وتديني 100 ألف بس وده حسيت أن انا بشحتها وكانها مش حقى لا وكمان تقولى بكل بجاحه سلفتك وانت مرجعتهمش هموت والله بجد من الضحك انت دمك خفيف ياعمور ربنا يهديك، ربنا اراد يرفع من عنك الستر من خلال شخص مالوش لازمه زيى ما بتقول حبيبى يا عمور كل سنه وإنت طيب، أنا زي الفل والله يا جماعه ومبسوط وبضحك وبقضى وقتى مع عيلتى وكله حلو خفيت من صدمتى وبقيت ميفرقش معايا أي شيء غير عيلتى ماما واخواتى ربنا يخليهم ليا طولت عليكو».