شوبير: الزمالك يستحق «لاعيبة فرز أول» وفرّط في التعاقد مع نجوم الأهلي

انتقد الإعلامي أحمد شوبير حارس مرمى الأهلي ومنتخب مصر السابق إدارة كرة القدم في نادي الزمالك والصفقات التي يبرمها الأبيض في الفترات الأخيرة.
وقال أحمد شوبير اليوم الأربعاء: «الزمالك السنة دي في الكورة خرج من الكونفدرالية وملوش أمل في الدوري خلاص وخرج من كأس الرابطة وملوش أمل حاليا غير في الكأس لما يلعب يوم 5 يونيو النهائي أمام نادي بيراميدز».
وأوضح شوبير: «أنت كزمالك موقوف من القيد فمش عارف تضم لاعبين جدد ولما يترفع القيد بيكون الوقت اتأخر شوية فبتبقى الدنيا صعبة بالنسبة للاعبين الجيدين، ومبتعرفش تجيب لاعيبة فرز أول، فتجيب لاعيبة بيكونوا مش على مستوى نادي الزمالك».
وتابع شوبير: «الزمالك قبل كده كان بيضم لاعبين مميزين زي لما جاب فرجاني ساسي وحمدي النقاز وبن شرقي، وقبل كده كوارشي وإيمانويل أمونيكي وأسماء كبيرة».
وأضاف شوبير: «الزمالك رجع له إمام عاشور وقعد في النادي أسبوع وقال لهم عايز أرجع كان الرد مفيش فلوس مفيش مش عارف إيه مفيش حدوتة إيه، وبعدها تلقى عرضا من الأهلي فراح، وأشرف بن شرقي الزمالك أتم الاتفاق معاه تماما والراجل فضل مستني وبعدين رجعوا قالوا المبلغ كبير ومش هندفع».
واختتم شوبير: «كرة القدم لازم يكون فيها تضحية وجمهور الزمالك يستحق التضحية، ما هو أنت نادي الزمالك لازم تجيب فرز أول بالنسبة لمستوى افريقيا زي ما الأهلي جاب جراديشار ووسام وأشرف داري وعطية الله وبن شرقي وإمام عاشور، فده مهم جدا بالنسبة لنادي الزمالك».