«30 مليار جنيه في السنة».. السيسي يتحدث عن «الفرص الضائعة» في مجال الزراعة

شهد الرئيس عبدالفتاح السيسي، اليوم الأربعاء، فعاليات موسم حصاد القمح 2025 بمنطقة الضبعة في محافظة مطروح، إذ بدأت الفعاليات بتلاوة آيات من القرآن الكريم للقارئ الشيخ أيمن عقل.
وقال الرئيس السيسي في كلمة ألقاها خلال الفعاليات، إن إدخال أراض للزراعة يواجه تحديات كثيرة لا تقتصر فقط على التمويل ولكن التنفيذ، قائلًا: «لما نيجي نقول إن إحنا عايزين ندخل الأرض دي للزراعة، بيقابلنا تحديات مش التمويل بس ولكن التنفيذ، لما نيجي نتكلم عن البنية الأساسية المطلوبة للزراعة، فالبنية الأساسية بتبقى طاقة المفروض إنها تبقى موجودة، والبنية التي تخدم على الزراعة سواء كانت طرق وشبكة الكهرباء وغيرها».
وأوضح الرئيس: «لما إنت بتفقدني فرصة، يعني لما أنا بقول عايز أدخل 600 ألف فدان على سبيل المثال في الزراعة، لو ضيعت مني سنة نتيجة أي شيء، أن إحنا تنسيقنا ماكنش كفاية أو عزيمتنا ماكنتش كفاية، مش هقول تمويل علشان لو مفيش تمويل مش هنقدر نعمل ده، لكن أنا بتكلم على حاجة تانية، بتكلم على أن لما تضيع مني موسم زراعي بتضيع مني سنة، طيب ال600 ألف فدان تفتكروا متوسط دخلهم في السنة كام، يعني نقول 50 ألف جنيه للفدان، يعني 30 مليار جنيه، يبقى إنت ضيعت من مصر فرصة 30 مليار، أيوه إنت هتاخدهم السنة الجاية إن شاء الله، بس كنت ممكن تاخدهم السنة دي والسنة والجاية، فبدلًا ما كنت هتاخد في السنتين 30 مليار لا إنت زرعت السنة دي ب30 والسنة الجاية 30».
وأضاف الرئيس السيسي أنه إذا تخصيص فرد واحد فقط لكل فدان من ال600 فدان، هذا يعني أن هناك 600 ألف فرد سيتوفر له مصدر دخل، أي 600 ألف أسرة، سيكون مصدرها الشهري لا يقل عن 7000 آلاف في الشهر، متابعًا: «بقول الكلام ده علشان وزيري الكهرباء والري وأي شخص معني يحطوا إيدهم معايا بقوة، ويبقى إحنا قاعدين بنذاكر وبنتابع كلنا مع بعض مش بس جهاز مستقبل مصر، حتى المستثمرين الموجودين بتوع القطاع الخاص، ما الأرض دي متاحة لكم، النهادرة هنبقى قطعنا الشوط الكبير في تجهيز الأرض للزراعة، لا إنت محتاج توصلها مياه ولا كهرباء ولا تعملها طرق، إنت داخل بس حتى المعدات الزراعة هتبقى موجودة، يعني أنت كل المطلوب منك أنك تعمل خدمة أرض علشان تطلع إنتاج».
وذكر الرئيس عبدالفتاح السيسي أن الدولة ترغب في مشاركة القطاع الخاص في مجال الزراعة بحسب الحجم المتاح، مُضيفًا: «إحنا عايزين القطاع يكون موجود في المجال ده على حجم المتاح، إحنا بنتكلم في أرقام كبيرة جدًا، لما نيجي نتكلم على مشروع وأنا بقول الطاقة علشان الأمر يكون واضح، الشغل ده كله مابيمشيش من غير كهرباء وعلشان توصل الكهرباء للأماكن دي، ممكن تكون خارج نطاق الشبكة بتاعتنا، فبالتالي فيها استثمارات كبيرة بتتعمل علشان توصل الكهرباء هنا، علشان ندخل الشبكة كبنية أساسية غير الطاقة المولدة نفسها بنتكلم في عشرات المليارات».
وتابع الرئيس السيسي: «إحنا بنتكلم علشان تعمل بنية أساسية وتكلفة 100 ألف فدان، إنت بتتكلم على الأقل من 200 ل300 ألف جنيه للفدان، ده على فرضية أنك عندك محطات طاقة كهربائية مش هتعملها، إنت هتنقل الكهرباء المولدة منها بس، لما أنت تتكلم في 200 و300 ألف جنيه للفدان بنية أساسية علشان تخليه قابل للزراعة من أرض صحراوية ليس لها قيمة لأرض تنتج، يعني المليون يكلفوا 300 مليار، من 200 ل300 مليار».
وأشار الرئيس السيسي إلى أن: «الحكومة والدولة بتبذل جهود كبيرة جدًا علشان تطلع هذا الأمر»، موضحًا: «لما نيجي نقول عايزين بفضل الله سبحانه وتعالى، ال500 ألف فداتن بتوع سيناء يدخلوا في الخدمة يبقى محافظ شمال سيناء ومحافظ بورسعيد والإسماعيلية والتنمية المحلية والكهرباء والري والزراعة، كلهم قاعدين ليل ونهار يخلصوا علشان في النهاية لما تدخل ال500 ألف فدان السنة دي غير لما تدخلهم السنة الجاية، تخيل أنك أتحت 500 ألف فدان في سيناء إضافيين بيزرعوا، يعني 500 ألف أسرة، يبقى الطرق اللي أحنا عملناها والأنفاق اللي عملناها والكهرباء اللي دخلناها والسكة الحديد اللي بتتعمل وهتوصل للعريش وطابا، لها قيمة».