شوبير يهاجم مسؤول الزمالك: «الدولة مش هتديك فلوس تشتري لاعب»

شن الإعلامي أحمد شوبير حارس مرمى الأهلي ومنتخب مصر السابق هجوما عنيفا على هشام نصر نائب رئيس نادي الزمالك بعد تصريحاته خلال الساعات الماضية والتي طالب خلالها الدولة بدعم الأندية الجماهيرية كما وجه انتقادات للنادي الأهلي.
وقال أحمد شوبير في تصريحات إذاعية اليوم الأحد: «من الحاجات اللي بتجنني لما تلاقي حد ناجح تروح تقول له أنت ناجح ليه بتجيب فلوس إزاي، بتجيب بطولات إزاي، طيب يعني حضرتك عايزني أخسر، عايزني أفشل، أنا بجيب بطولات فبجيب فلوس فبجيب إيرادات».
وتابع شوبير: «يرد يقول لك لأ أنت تسأله بتجيب فلوس منين؟ لأ من غير ما تسأله أنت بتشتغل فتعرف تجيب دخل، تجيب بطولات، خلاص ما تشتغلش وفلس وروح قول يا دولة أديني فلوس، الدولة مش هتديك فلوس الدولة عندها أولويات تانية، الدولة مش هتديك فلوس عشان تجيب لاعب، الدولة ممكن تديك أرض بإمتيازات معينة تبني فرع تجيب عضويات كده يعني».
شوبير لهشام نصر: شوف الأهلي بينجح إزاي واتعلم
وأوضح شوبير: «لكن بدل ما أقول له أنت عامل حاجة كويسة وبرافو عايزين نحاسبه، طيب أنت إدارتك مش كويسة، والله حاجات غريبة جدا وأتمنى كل واحد يبص لنفسه ويشوف أخطاءه أيه ويصلحها».
وأضاف شوبير: «ويقول لك مناشدة للسيد الرئيس لدعم الأندية الجماهيرية ولا يجوز أن يكون ناد واحد نتائجه أفضل من المنتخب الوطني، يا نهار أبيض طب أخسر يا نادي يا اللي بتكسب عشان تبقى زي من لا يستطيع الفوز لازم تبقى غير ناجح وتروح للدولة وتقول يا سيادة الريس أدعمنا بالمليارات، ما ساعدك بالأرض ما ينفعش يدعمك، ياجماعة القصة بقت تجنن وبقت عجيبة جدا، أنا في حالة ذهول».
واختتم شوبير: «وبعدين اللي يتكلم، يتكلم بورقة وقلم ويقدم ويقول إنما بالشكل ده صعب جدا جدا، وتيجي تكلم الناس يقول لك مش أنت كنت مش عارف أيه، يا عمي عندك تجربة ناجحة اشتغل عليها ما لازم نغير الفكر وطول ما أنت عمال تقول أي كلام مش هينفع أنت بتخسر بطولات شوف أيه الأسباب، الأهلي كان بيخسر في الصالات شاف الأسباب وعمل إصلاحات ونجح، وزي ما قالوا زمان ذاكر تنجح مش هتذاكر مش هتنجح».