رانيا محمود ياسين: هنا الزاهد بتفكرني بنفسي وأنا صغيرة.. وفي ناس من الوسط الفني بتغير مني

قالت الفنانة رانيا محمود ياسين، إنها معجبة بأداء الفنانة هنا الزاهد ومسلسلها الأخير «إقامة جبرية»، الذي عُرض قبل شهر رمضان الحالي.
وتابعت رانيا ، خلال لقائها ببرنامج «أوضة ضلمة» الذي تقدمه الإعلامية إنجي هشام على شاشة «هي»: «أنا مبغيرش من حد في الوسط الفني، وأنا باحب هنا الزاهد بتفكرني بيا وأنا ممثلة صغيرة، وعجبني تمثيلها لما عملت إقامة جبرية أنا اتفاجئت بيها.. نفسي أعمل دور كده».
واستكملت رانيا حديثها:« اللي غار مني كتير في جيلي وأكبر- كنت بتفاجئ من الغيرة- وكنت باتعامل مع الناس كلها ولا ببص على حد ده شكله عامل إزاي ولا أغير منه، مبقلقش من الممثل القوي ببقى عايزة ابقى زيه».
وعلقت رانيا محمود ياسين على تعرض الفنانين باستمرار لانتقادات قائلة :« الفنان المصري الوحيد اللي مستهدف بالشتيمة على السوشيال ميديا- الدول العربية التانية مبيحصلش كده..طول الوقت اهانات وحسبي الله ونعم الوكيل فيكم،، ده لو فنان غلط غلطة بيتشتم اكتر من نتنياهو وترامب، لا بيفكروا انه ممكن يعيا أو ينام ميقومش أو عنده ولاد أو ميعدوش انه غلط غلطة أو زلة».
وكشفت رانيا رأيها في حرمانية الفن: «ماليش دعوة بحرام أو حلال لأن الفن ده بقاله 100 سنة سينما، ولو دخلت شتمتي فنانة يبقى ده رمي محصنات أو قولتي على واحد دياثة ده كده أنت بتهينه قدام اهله».