«تدليس وبينهم القيعي».. خالد الغندور يهاجم «الأهلي» بسبب حازم إمام

شن خالد الغندور لاعب الزمالك ومنتخب مصر السابق، هجوما حادًا على إعلامي ومقدمي برامج قناة النادي الأهلي، عدلي القيعي وإبراهيم المنيسي ومحمد فارس، مشيرًا إلى ترويجهم بكلام غير حقيقي.
وقال خالد الغندور في فيديو بثه عبر صفحته الرسمية على موقع التواصل الاجتماعي «فيس بوك»: «القصة بدأت بإن حازم إمام علشان طلع اتكلم في تصريحات إذاعية كان بيتكلم عن الأندية وبيقول المنتخب أهم ويجب إن يكون فيه مساندة والمنتخب أهم من الدوري».
وأضاف: «لكن هم طلعوا وقعدوا يقولوا مينفعش اللي أنت بتقولوا ده ياحازم، انت ناسي إن أنت سبت لاعيبة الزمالك يخرجوا من المنتخب علشان يلعبوا ماتش في الكونفدرالية، وفي نفس الوقت جاي تطالب الأهلي بالوطنية».
وتابع: «وكمان ناس قالوا فاكرين يجماعة لما الأهلي ساب لاعبيته للمنتخب وكده، لكن الناس معندهاش ذاكرة السمك والناس بتعرف التفاصيل، لكن البعض بيحاول يخبي».
وواصل: «أولا بطولة كأس الأمم الأفريقية كان كأس العالم للأندية في خلاف ما بين الاتحاد الدولي والأفريقي، فالاتحاد الدولي يقرر إن يعمل كأس العالم تقريبا لو فرقتين وصلوا للنهائي أو الدور قبل النهائي، فبالتالي الأربع فرق للي هيوصلوا من أصل 24 فريق مشارك، مش هيقدر واحد منهم يقدر يلعب المباراة الأولى في كأس العالم للأندية، وطبعا كان بلد واحده بس اللي هتشارك في كأس العالم للأندية، لأن الأهلي هو بطل دوري أبطال أفريقيا، فمصر في حالة واحدة فقط لن يستطيع الأهلي إن يلعب أول مباراة في كأس العالم للأندية لو وصل المنتخب للمباراة النهائية أو للدور قبل النهائي».
وأردف: «لما وصلنا للمباراة النهائية في كأس الأمم مع كيروش، النادي الأهلي كان مستاء جدًا، وجمهوره كان مستاء جدًا».
وأكمل: «ليس من حق الأندية في هذه البطولة تطالب بلاعبيها، ولذلك الأهلي راح لعب المباراة الأولى في كأس العالم لعب المباراة الاولى بدون 6 أو 7 لاعبين وكسب بطل المكسيك وتأهل للمباراة التالية».
وأكمل: «لكن بعد ما كمل ولاعيبته انضموا خسر، لكن لما يطلع إعلاميين كبار ويذكروا الواقعة لازم يقولها بحقيقتها لكن كان فيه نوع من أنواع التدليس».
وأستكمل: «فيتوريا أول معسكر ليه كان عنده ماتشين مع فرق درجة رابعة في أفريقيا، مع ليبريا والنيجر، فكان عاوز يجمع أكبر قدر من اللاعبين علشان يعمل معسكر وفرقتين، وفي نفس الوقت الزمالك كان تم تأجيل ماتش له أمام بطل تشاد في بطولة أفريقيا للأندية أبطال الدوري، في دور ال64 والزمالك كسب بنتيجة 2-1 بصعوبة».
وأكمل: «الماتش التاني الزمالك بيقول لفيتوريا وحازم إمام إن عندنا ماتش رسمي في بطولة أفريقيا وإنت عندك ماتشات ودية ومجمع أكثر من 27 لاعبًا».
وتابع: «المباراة الأولى لاعيبة الزمالك لعبت مع المنتخب وكانوا موجودين في المعسكر، وبعدها فيتوريا مرضيش يسيب غير اتنين من لاعيبة الزمالك بس وهم زيزو والونش راحوا لعبوا ماتش تشاد، وبعدها انضموا لمعسكر المنتخب مرة ثانية وكانوا متواجدين في الماتش الثاني مع المنتخب، بعدها الأهلي كانوا عنده ماتش في دوري الأبطال ومصر عندها ماتشين من ضمنهم ماتش مع تونس، وفيتوريا مع الضغط الإعلامي ترك أربع لاعيبة من الأهلي وراحوا انضموا لتدريبات الأهلي ولعبوش ماتش تونس علشان خاف عليهم من الإجهاد وماتش الأهلي الأهم، وعلشان كده مصر اتغلبت من تونس في مصر بنتيجة 3-1، لكن محدش بيذكر ذلك».
وأتم: «وأخيرا مع منتخب مصر الأولمبي الأهلي ترك 3 لاعبين مش بيشاركوا معاه أصلا، وهم كريم الدبيس وحمزة علاء وأحمد نبيل كوكا، ورغم كده كل القصص دي الناس بتتحامل على حازم إمام وبيقوا معلومات غلط، فكفاية إفتراء وكذب».