«صدمة وقلة احترام».. تعليق نارى من شوبير على خسارة بيراميدز من نواذيبو

علق الإعلامى أحمد شوبير بشكل غاضب على خسارة الفريق الكروى الأول بنادى بيراميدز أمام نظيره نواذيبو الموريتانى ضمن الجولة الثانية من مباريات دور المجموعات من بطولة دورى أبطال أفريقيا لكرة القدم.
وسقط بيراميدز أمس خارج ملعبه أمام فريق نواذيبو بنتيجة 2-0 ليعقد موقفه فى المجموعة التى أصبح كل فريق بها لديه 3 نقاط.
وقال أحمد شوبير فى تصريحات إذاعية: «عايز أقف مع مباراة نواذيبو مع بيراميدز، ولمت اتعملت القرعة أنا قلت لكم إن الكرة الوريتانية تطورت بشكل غير عادى والناس بقوا بيلعبوا كورة حلوة وده ظهر فى أداء المنتخب الموريتانى اللى أصبح ضيف دائم فى بطولة أفريقيا».
وتابع شوبير: «ولكن الفارق بين بيراميدز ونواذيبو على صعيد الأسماء كبير جدا أنت بتلاعب فريق بيقول ياهادى ولسه بيتحسس خطاه فى البطولات الأفريقية، وفى بداية المباراة اللاعب سيدى عمار سجل هدف نواذيبو الأول فى الدقيقة 4 ودى فرصة لأى فريق للتعويض عشان الهدف مبكر وبطل موريتانيا كان عنده عناد بشكل غير عادي».
وتابع شوبير: «قوم إيه تيجى المباراة تتسهل أكثر لفريق بيراميدز بطرد لاعب من نواذيبو فى بداية الشوط الثانى وكل نجوم بيراميدز مجوش مفيش رمضان صبحى وفخرى لاكاى ومايلى ولا كل دول موجودين، والفرقة اللى بتلعب قدامها 10 لاعبين وبدل من التعويض تيجى فى الدقيقة الأخيرة لاعب نواذيبو ياخد الكرة ويرقص كل اللى يقابله ويحط الكورة فى الجون بمهارة كبيرة».
وأضاف شوبير: «بيراميدز عنده المباراة المقبلة أمام صن داونز فى جنوب أفريقيا اللى خسر امبارح قدام مازيمبى بشكل غريب، ولازم بيراميدز يعود بنقطة من جنوب أفريقيا أمام صن داونز ولو خسر يبقى لازم يكسب صن داونز هنا فى مصر».
واختتم شوبير: «خسارة بيراميدز مقدرش أقول سببها التحكيم عشان باملاك تيسيم قدم مباراة رائعة جدا، ولا أقول الاستهتار ولا أقول قلة خبرة مش معقولة كل الأسماء دى ومعظمهم لاعيبة دولية هقول قلة خبرة أفريقية ده كلهم نجوم كبار.. ولكن أقدر أقول قلة احترام وصدمة للكرة المصرية وعلى بيراميدز بسرعة أن يتخلصوا من المشاكل الفنية دى لو عايزين يكملوا فى البطولة».