اعترافات المتهم بإنهاء حياة عاطل بعين شمس: سرق صور صاحبتي من موبيلي وهددها بيها

اعترف المتهم الرئيسي في واقعة مقتل عاطل بمنطقة عين شمس بجريمته تفصيليا أمام نيابة شرق القاهرة الكلية، حيث أقر بأن سبب ارتكاب الجريمة سرقة القتيل لصور خطيبته من هاتفه ومحادثتها وتهديدها.
وقال المتهم «مصطفى. م. ت»، في اعترافاته أمام النيابة: «اللي حصل إن أنا كنت خاطب واحدة أسمها «شيرين» وفضلت خاطبها 3 سنين وبعدين فسخنا الخطوبة واتعرفت على واحدة تانية من الشرقية وكنا بنتكلم على انستجرام وكانت بتبعتلي صور ليها وهي بملابس المنزل، وساعتها كان في واحد صاحبي اسمه «أحمد. ر» وكان بيمسك موبايلي كتير لحد ما أخد الصور بتاعتها من موبايلي».
وتابع المتهم في إعترافه خلال التحقيق: «دخل عمل إيميل باسمي وكلمها على أنه هو أنا وقالها إن الإيميلات التانية بتاعتي اتقفلت وطلب منها تعمل بلوك وفعلا عملتلي بلوك وبعدين اتصلت بيا على رقمي وقالتلي اللي حصل قولتلها مفيش الكلام ده، ده صاحبي اللي عمل كدة عشان يكلمك قالتلي ده هو بيقول أن انت معاك فيديوهات ليا وصور وهو خدها منك قولتلها ده كداب وسيبك منه واعمليله بلوك وفعلا عملت له بلوك».
وأضاف: «راح عامل ايميل على التيك توك وحط صورتها عليه ودخل قالها كلميني هنا بدل ما انزلك الفيديوهات اللي معايا كلها فهي كلمته من غير ما تعرفني ولقيتها اتغيرت معايا في الكلام وبدأت تبعد عني فانا حسيت أنه عامل حوار عليا ولما كلمت واحد تاني أسمه «أحمد محمود» قالي الموضوع عندي وخلاص اقفله، بدل ما اضربك في دماغك بخنجر ومحدش يعرفلك طريق».
واستطرد: «روحت كلمت «رأفت» يوم الواقعة قالي الموضوع عند «أحمد محمود» وقالي هنبقى نقعد نحل الموضوع، ونزلت من عنده حسيت انه مستهتر بيا وخوفت انه يسيب الشقة ومعرفش اجيبه تاني، وكلمت اخويا «تهامي» وقولتله تعالى معايا انا في مشكلة مع «أحمد محمود» وهروح اقعد معاه عشان نحلها وخدته وخدت الخرطوش بتاعي والطلقات وروحت عشان اتكلم معاه وأول ما فتح الباب وعيني جت في عينه روحت مطلع الفرد وضارب عليه طلقة وطلعت اجري انا و«تهامي» وروحنا قعدنا في شقة الخصوص عند واحد قريبنا وبعدها اتقبض علينا».