محمد صلاح العزب يكشف أسباب توقف أخر مشروع سينمائي لمحمود عبدالعزيز «أوضتين وصالة»

شرح المؤلف محمد صلاح العزب الأسباب التي أدت لتوقف فيلم «أوضتين وصالة» بطولة النجم الراحل محمود عبدالعزيز، مشيرًا إلى أنه عمل على المشروع مع المخرج شريف البنداري لمدة 8 سنوات.
وأضاف العزب عبر «فيس بوك»: «أنا هتكلم كتير اليومين اللي جايين عن فيلم (أوضتين وصالة)، وهحكي حوارات كتير حصلت في الفيلم ده، أولا ليه فيلم أوضتين وصالة ما اتعملش، الفيلم ده أول سيناريو كتبته في حياتي في سنة 2010 وفاز بجايزة ساويرس في 2011، ومضيته مع صديقي العزيز المنتج محمد حفظي في 2011، واشتغلنا في الفيلم ده أنا وصديقي العزيز المخرج شريف البنداري على الفيلم في كل ما يتعلق بكل حاجة سيناريو وإخراج وإنتاج وممثلين ومنح وديكور ولوكيشنات تصوير إلى آخره... اشتغلنا في الكافيهات والبيوت والشركات والشوارع والتليفونات لمدة 8 سنين (أيوه الرقم ده حقيقي)».
وتابع: «الفيلم قراه الفنان محمود عبدالعزيز وأعجب بيه جدا بعد ما كان محبط من فيلم إبراهيم الأبيض ومش عاوز يعمل سينما تاني، وبعدما قرأه قرر إن ده الفيلم اللي يختم بيه حياته السينمائية، واشتغلنا على الفيلم أنا وشريف والساحر الله يرحمه لمدة سنتين ما بين بيت محمود عبدالعزيز في زايد وكابينته في المنتزة، ولما جه وقت الاتفاق ع الفلوس عشان ندخل نصور محمود عبدالعزيز الله يرحمه طلب 4 مليون جنيه، وحفظي مرضيش يدفع غير مليون جنيه واحد.. فمحمود عبدالعزيز الله يرحمه قال أنا مش فارق معايا الفلوس بس أنا مش هقلل من نفسي، وده رقم مياخدوش عيل صغير، ومكملش الفيلم».
وأختتم: «وبعد وفاة محمود عبدالعزيز الله يرحمه الفيلم راح للفنان الكبير يحيي الفخراني، ودي قصة تانية».