«بتدخل الزمالك ليه في جملة مفيدة؟».. خالد الغندور يرد بقوة على مرتجي الأهلي

رد خالد الغندور نجم نادي الزمالك السابق بقوة على تصريحات خالد مرتجي، أمين صندوق النادي الأهلي، خلال الساعات الماضية، والتي أثارت الغضب الشديد بين جماهير الأبيض وداخل قلعة ميت عقبة.
وعقب هذه التصريحات تقدم الزمالك بشكوى ضد خالد مرتجي أمام وزارة الشباب والرياضة، وشدد مسؤولو الزمالك في شكواهم على أن تصريحات عضو مجلس الأهلي تثير الفتنة بين الجماهير.
وكان خالد مرتجي قد قال في تصريحاته إن الزمالك حصل على بطولاته الأفريقية حينما كان الأهلي لا يشارك في البطولة، وإن الزمالك يدين بالشكر لصالح سليم رئيس النادي الأهلي الأسبق بعد انسحابه من بطولات إفريقيا وهو ما سمح للزمالك بالتتويج ببطولاته الإفريقية كما قال إن كل الأندية تغار من نجاحات الأهلي.
وقال خالد الغندور في تصريحات تلفزيونية عبر قناة الزمالك: «أنا كنت وعدت إني هطلع أرد على المهندس خالد مرتجي، أولا المستشار مرتضى منصور اللي بيثير التعصب وبيثير الفتنة زي ما بيقولوا مكنش موجود ولا كان في تصريحات ولا مكالمات ومختفي بقاله شهر».
وتابع الغندور: «مرتجي قال تصريحات وهنرد واحدة واحدة، أنت إيه الفكرة إنك تدخل الزمالك في جملة مفيدة؟، أمين صندوق الأهلي يتكلم عن الزمالك ليه أصلا؟ وبيتقال علينا إقلبوها قناة الأهلي من كتر ما بنتكلم عليهم، يا عم خليك في حالك بقا، هو مش الغيران هو اللي بيجيب سيرة الناس عمال على بطال؟».
وأوضح خالد الغندور: «وبعدين فكرة التحفيل مقبولة، أنت راجل السنة اللي فاتت خسران كل حاجة، خسران الدوري وخسران كأس الرابطة وكأس مصر والسوبر أمام طلائع الجيش، فتمام إنك تفرح في نادي الزمالك ولكن أنت المفروض مسؤول مش مشجع».
وأكمل :انا مش عاوز أقول عن العلاقة بين خالد مرتجي والدرندلي اللي كانوا صحاب وكان أمين صندوق الأهلي سنوات وسنوات وبعدين خد مكانه وطيره، ولا عايز أكلم على الشركة اللي جابت سافيو وكانت هتجيب يعقوبو.
وأضاف خالد الغندور: «إحنا لن نسمح إن حد يقلل من قيمة نادي الزمالك، وبعدين لما تكون مسؤول وتطلع تقول كلام لازم يكون كلام صح، الراحل المحترم الطيار كابتن طارق سليم أخو الكابتن صالح سليم كان مدير الكرة وقت كأس السوبر الإفريقي وشتم الحكم قدامنا وتم التعدي على الحكم وإتحطت في التقرير وتم إيقاف طارق سليم وإبراهيم حسن سنة، فكابتن صالح سليم قال لهم طب مش لاعب، فالاتحاد الإفريقي قالهم لو ملعبتوش هتتوقفوا 3 سنين وفعلا تم الإيقاف والنادي الأهلي قال كده كده مش بنستفيد حاجة والبطولة العربية أهم، وبعدين في هذه المدة الزمالك خد بطولة واحدة وهي سنة 96».
وتابع موضحًا: «وبعدين الأهلي رجع بعدها سنة 1998 وخسر مخدش حاجة خرج من البن الإثيوبي من دور ال 32 وفي سنة 1999 خرج وفي 2201 كسب وأنا في 2002 وهو مشارك كسبتها منه».
واختتم: «المهندس خالد مرتجي مش كروي هو ملوش علاقة بالكورة هو دوره الصفقات، والدليل إنه مش حافظ ومش فاهم وكل كلامه غلط، وبعدين أنت كنادي الأهلي مشترك السنة دي في بطولة إفريقيا مجاملة، ده أنت تالت الدوري السنة اللي فاتت، هو في حاجة اسمها ناخد بترتيب الدور الأول؟ ما عشان نظامنا سيئ لكن أنت داخل مجاملة، وحان الوقت إن إدارة الزمالك تتعامل بأسلوب ادارة الأهلي ونشغل البيانات وهنشتكي خالد مرتجي وهنشتكي قناة الأهلي، رئيس الزمالك آهو إتحبس جه الدور آهو إن الناحية التانية نشوف إجراءات».