شقيق حارس عقار المقطم: «ضربوه بالكوريك والشوم حتى الموت بسبب لعب العيال» (فيديو)

بينما تتأهب الأم لقدوم مولود جديد إلى عائلتها الصغيرة، وجدت نفسها بين عشية وضحاها أرملة، تندب حظها السيئ في شهرها التاسع، وهى تردد: «هولد وابنى مش هيشوف أبوه»، لينفجر شقيق زوجها، الذي يجلس مكلومًا إلى جوار الحائط، باكيًا على رحيل «خلف».
يتذكر «مصطفى» مكالمة شقيقه الأخيرة، حيث يعمل حارس عقار بمنطقة المقطم في القاهرة، وهو يخبره: «عاوز أرجع المنيا وأشوف أي شغلانة تانية»، بينما تردد الابنة الكبرى- من ذوى الاحتياجات الخاصة- ترجو عمها: «عاوزة بابا.. رجّعوه لىَّ».
مش سايبينِّى في حالى
قبل 5 سنوات، حضر «خلف» من عروس الصعيد إلى المقطم، بعد أن ضاق به الحال، يحكى العم: «قولناله روح شوف لقمة عيشك.. أخويا كان شقيان على بيته، عياله الصغيرة اتخانقوا مع أطفال زمايله في الشغل، وبعدين 5 إخوات ضربوه بالكوريك والشوم على راسه لحد ما مات».
لم يكف «خلف» عن الشكوى من زملائه، وهم من أبناء محافظته، وكان يقول لشقيقه: «مش سايبينِّى في حالى، أنا وعيالى بنشوف منهم العذاب ألوان»، ليهون عليه: «كلها فيها مشاكل، محدش مرتاح في شغله، الإنسان خُلق في كبد، قولتله: إياك ترجع بعيالك البلد تانى.. انت معاك 5 عيال والسادس جاى في الطريق».
«عيالك بيتضربوا.. إلحق شوفهم».. هكذا تلقى «خلف» الخبر من زوجته لدى عودته من قضاء احتياجات سكان العقار الذي يحرسه، ليهرول إلى ناحية أطفاله؛ إذ كان يعتدى عليهم أولاد حارس عقار مجاور، والذى استعان ب5 من أشقائه «نزلوا ضرب فيه بالكوريك والشوم داخل جراج لما قرّب من العيال، فسقط على الأرض غارقًا في دمه»، وفق شقيق المجنى عليه.
اتكاتروا عليه وموِّتوه
«كانت زوجة (خلف) ترقد بغرفتها وجسدها يرتعش خوفًا، وتسمع صراخ زوجها وهو يستغيث بالأهالى: إلحقونى.. إلحقونى، لكن الجميع خاف من التدخل في الأمر، بعد أن هددوهم: (اللى هيقرب هنقتله)».. يضيف «مصطفى».
الشرطة حضرت على الفور، وضبطت المتهمين، ونقلت جثة المجنى عليه إلى مشرحة زينهم، وثبت بتقرير الصفة التشريحية وجود شبهة جنائية، وتسلم «مصطفى» جثمان شقيقه للدفن بمسقط رأسه، وكأنه يُبدى ندمًا ويردد: «يا ريتنى خليته يرجع البلد، رجع معايا بس جثة، جيت أخده ميت مش حىّ، هنشيل مسؤولية عياله ال5 وابنه اللى هيتولد بعد كام يوم من غير ما يشوف أبوه».
ويضرب شقيق المجنى عليه بيده على صدره، ويبكى بحرقة كأنه لا يصدق موت «خلف»: «أخويا يتقتل علشان لعب عيال، ما العيال كلها بتتخانق في كل الدنيا، جيرانه تربصوا بيه بسبب عيالهم، واستغلوا إنه لوحده وماحدش له هنا في القاهرة، اتكاتروا عليه وموِّتوه.. لو كانوا حتى كسروا له إيد أو رجل أو دراع بس، لكن يقتلوه بالضرب بلا رحمة، ده كله ما يرضيش ربنا».
أحلام ابني كانت بسيطة
«مصطفى» يثق في القضاء، ويقول: «القانون هياخد مجراه، المتهمين يتوقع عليهم أقصى عقوبة، بس أخويا مفيش حاجة هتعوضه تانى»، ويصف أحوال أسرة المجنى عليه: «بنته الكبيرة بتطالبنى أرجع لها أبوها لأنها لا تستوعب وفاته، والعيال الصغيرة وفيهم أطفال في سن 3 و4 سنوات لا يكفون عن كلمة بابا فين.. بابا فين؟!».
جنازة «خلف» شُيعت وسط مشاعر حزن بالغ. أمه تقول إن أحلام ابنى كانت بسيطة «يعرف يأكّل ويشرّب كوم اللحم اللى في رقبته، راح للقمة عيشه.. رجعلنا جثة».