«عظمة الأهلي مستمدة من شخصية جمهوره».. الدماطي يطالب بتغيير نظام دخول الجماهير المدرجات

طالب محمد الدماطي عضو مجلس إدارة النادي الأهلي، بتغيير نظام دخول الجمهور المدرجات.
وكتب محمد الدماطي عبر صفحته الرسمية عبر موقع التواصل الاجتماعي «فيس بوك»: «لأول مرة من خمس سنين حتكلم وأنا عضو مجلس لكن بلسان حالي الوحد، عشان الأمانة تحتم عليا ده، وعارف سيل النقد اللي حينزل عليا وتعليقات نقد على الجانب الفني اللي انا واثق أن شاء الله انه مع الوقت أكيد حيتصلح وثقتي كاملة في إدارة الكورة على تخطي الصعاب، لكن فكرة اني عيشت حياتي كلها في المدرج تخليني اقول الكلمتين دول».
وأضاف: «لازم إعادة نظر سريعة في نظام دخول الجماهير، لا نظام الfan Id ولا لأسعار التذاكر بتدخل نوعية جمهور الأهلي بتاع زمان ولا فئات الشعب اللي بتحب الاهلي والكورة بجد، لازم سعر التذكرة ينزل لحد 25 جنية عشان أي حد يوصل الملعب رايح جاي وياكل حاجة حيدفع زيهم مرتين يعني الماتش الواحد حيقف بأقل حاجة 75 جنية وده يخلي الناس اللي مرتباتها 3 و4 الاف جنية في الشهر يقدر يروح على الاقل 3 ماتشات في الشهر، عكس دلوقتي اللي الماتش بيدخل في اقل حاجة 150 جنية، نظام الحجز يرجع زي زمان من قدام النادي منافذ وشركات الاتصالات كلها مش الرعاة بس، والشراء بالبطاقة ورقم التليفون ويتعمل استعلام امني لو في مشكلة التذكرة بتقف من على البوابة زي اوربا، وتتفتح الملاعب بسعة كاملة، احنا مصر ونعرف نامن أي عدد وفي أي وقت مفيش دولة في المنطقة عندها ربع استقرارنا الامني».
وتابع: «لو في حاجة حاسس اني مقصر فيها هي إني مش قادر اشوف المدرج مقصور على مجموعة معينة، اللي حصل في 2011 وربط الكورة بالسياسة كانت غلط مش حيتكرر تاني أن شاء الله، محدش أساسا يقدر يفكر يهز الاستقرار اللي احنا وصلنا لة بعد معاناة رهيبة، دة لو حد حب بس يفكر يدخل سياسة تاني بقية الجمهور هي اللي حتسكتو مش الامن حتي».
وواصل: «عظمة النادي الأهلي هي مستمدة من شخصية جمهورة، وجمهورة هو جمهور المدرج، لو الشخصية دي مع الوقت تاهت حتبقي خطر كبير على رفعة النادي في المستقبل»
وواصل: «حتي التدريبات المهمة لازم تتعمل بتذاكر بسعار رمزية، من حق الدولة تعرف أي تجمعات كروية مين هوية الناس اللي موجودة سواء مباريات أو تدريبات، مفيش هزار في أي حاجة تخص الأمن، المهم تسهيل الاجراءات على الناس دة نمرة واحد ونمرة 2 يبقي التذاكر في مقدرة الجميع، ومن واحد عايش في المدرج من واول ما وعيت على الدنيا وبغض النظر عن كل الاخطاء، جمهور الاهلي اللي بجد هو اللي بيصحح كل حاجة اول باول، تصبحو على خير»