الرئيس: أنفقنا أرقامًا ضخمة لتحقيق طموحات المصريين فى التنمية

أكد الرئيس عبدالفتاح السيسى أن ما تم إنجازه في الدولة خلال ال7 سنوات الماضية، يتعدى سنوات طويلة جدًا من العمل والإنفاق، حيث تم إنفاق أرقام ضخمة جدًا لتحقيق طموحات المصريين فيما يخص التنمية والتعليم والخدمات والبنية الأساسية، لافتًا إلى أن العمل على التنمية لن يتوقف بانتهاء مبادرة «حياة كريمة»؛ بل سيظل، الرفاهية تتطلب الاستمرار في العمل والتطوير.
وقال الرئيس السيسى، خلال افتتاح مجمع إنتاج البنزين بشركة أسيوط لتكرير البترول في محافظة أسيوط، على هامش افتتاح عدد من المشروعات التنموية والقومية التي تم تنفيذها بعدد من محافظات الوجه القبلى في قطاعات البنية التحتية، إن هناك ضرورة ملحة لرفع الوعى والثقافة بخطورة البناء على الأراضى الزراعية، فعلى مدار 60 أو 70 سنة كان يتم البناء على تلك الأراضى رغم محدودية الأرض المتاحة، ورغم أن محافظات الصعيد تمتلك أراضى صحراوية ممتدة تسمح بالبناء والاحتفاظ بالرقعة الزراعية.
ووجّه الرئيس حديثه للمواطنين: «بقول لأهلنا مش بس في الصعيد، لكن في الدلتا، المياه جنبك أهى، أنا مبتكلفش كتير عشان أنقل المياه للأراضى الزراعية اللى قدامنا دى، لكن لما أعمل أي مشروع تانى وآخد المياه دى أنقلها على مسافة 70 أو 80 كيلو، يكلفنى مليارات الجنيهات، ومش بس كدا، هبقى كمان محتاج أعمل تجمعات عمرانية تخدِّم على دا بكل ما تعنيه أو تطلبه من بنية أساسية من طرق وكهرباء ومحطات معالجة وصرف صحى، يعنى أرقام كبيرة جدًا.. التحدى ده مش تحدى الحكومة.. ده تحدى كل عناصر الدولة، الحكومة ومنظمات المجتمع المدنى لو حبيتوا تساهموا معانا ثم المواطنين».
وأضاف «السيسى»: «وزير الإسكان بيقول 1.4 مليون متر مياه في اليوم قبل كده مكنوش بيستخدموا وليهم ضرر بيئى علينا.. هناخد المياه ونعملها معالجة ثلاثية متطورة نازلة دون أي ضرر حتى لو حاجة نزلت النيل ويتم الاستفادة بها دون الضرر بصحة الناس.. مفيش نقطة مياه تقدر نستفيد بها للأراضى الزراعية جنب المبانى.. هنستفيد منها.. ونجمع كل الصرف ده ونعمله معالجة ثنائية.. النقطة دى بقولها لإنى مش قد على مستوى 60 محطة بس.. إحنا بنتكلم على الصرف الصحى والزراعى في كل مصر.. بنتكلم في مليارات كتير أوى.. البرنامج ده يخص محطات معالجة مياه بالمطلق.. يعنى إيه.. يعنى كل المياه اللى ممكن تتعالج مثل الصرف الزراعى.. مثل محطة بحر البقر إيه.. دى صرف زراعى ويتم معالجة المياه واستخدامها مرة أخرى.. ومحطة الحمام وتوفر 7 ملايين متر مياه في اليوم وغيره وغيره وغيره».
وتطرق «السيسى» إلى مشروع «حياة كريمة»، واستكمل: «نكرر تانى حتى تصل الرسالة لينا كلنا.. هو (حياة كريمة) في 3 سنوات.. تفتكر في النمو السكانى ده مش هنكون عاوزين إمدادات مستقبلية في المدارس والصرف الصحى ومحطات المعالجة ومياه الشرب.. عملنا قفزة في مشروع هيخلص في 3 سنوات بدلا من 10 سنوات وبنضغط على نفسنا علشان نعمله.. لو النمو السكانى استمر كده هنلاقى نسبة من السكان عاوزه.. طب إزاى والنمو ده بدون تخطيط.. المناطق الجديدة دى فرص استثمار حتى يكون لدينا ظهير صناعى يوفر للناس اللّى سكنت دى».
وواصل «السيسي»: «أقولكم على حاجة.. الأراضى الزراعية معمولة من 200 و300 سنة حتى لو ألف سنة.. النهارده الفدان اللى موجود ده.. لا أدفع فلوس في استصلاحه لا بنية أساسية ولا حاجة.. يا جماعة إحنا بنتحرك لنضيف للأراضى الزراعية تعوض اللى قال عليه وزير المالية لتوفير السلع الأساسية مثل القمح ومطالب الغذاء للمصريين ما أمكن.. وبالنسبة لقضية نمو السكان، لازم أي مواطن وأى مواطنة يبقى عارف إنه لو خلّف طفلين مش بس طفل واحد إنه هيحط نفسه في مشكلة وربنا ما قالش نعمل كده في نفسنا»، مشددًا على ضرورة مواجهة ثقافة البناء على الأراضى الزراعية، وزيادة النمو السكانى.
وتابع: «قلت لا يمكن أدى تانى بطاقة تموين لحد بيتجوز، لأنك لو بتتجوز ومستنى الدولة تديك بطاقة تموين إنت مش قادر تصرف إزاى يعنى.. لأ ده كلام مش مظبوط، ودى ثقافة اتشكلت في وجدان الناس مش موجودة غير في بلدنا إحنا، أن أشترى الحاجة بأقل من تمنها وآخد الخدمة بأقل من تمنها وكمان لما أخلف حد يأكلى عيالى.. ده هنا بس في البلد دى، وعشان كده هي مقدرتش تقوم خلال السنين اللى فاتت، وإحنا مسؤولين أمام الله إننا نحط الإجراءات والقواعد اللى تمكن البلد دى إنها تقوم.. لن نضع بطاقة تموين لأكثر من فردين في اللى فات، وفى الجديد مفيش».
وتحدث الرئيس عن الافتتاحات التي تشهدها محافظات الصعيد: «النهارده يوم جميل أوى.. وبقولكم بصراحة.. وهقول حاجة ومحتاج نفكر فيها.. القيمة الاستثمارية على مدار السنوات قبل تولى المسؤولية في حدود 30 مليار جنيه في 30 سنة يعنى 900 مليار جنيه وإحنا في 7 سنوات أنفقنا في متوسط التريليون جنيه، اللى الدولة بتعلمه ده محاولة للتعويض.. ومش أبدا والله إساءة لحد.. محاولة لتعويض ما فات».
وأشار إلى أن نحو 4500 شركة خاصة تساهم في المشروعات التنموية، بينها 150 شركة تعمل بحد أدنى مليار جنيه، وشركات أخرى تعمل بحد أقصى 75 مليار جنيه، وتابع: «التحدى الخاص بتحسين أحوال المواطنين لا يخص الحكومة فقط ولكن يتعلق بكل عناصر الدولة.. كنت في أسوان بعد موضوع السيول اللى حصلت، وفيه سيدة قالتلى أنا مش عارفه أعيش لأن عندها 6 أولاد.. قولتلها الإنفاق على 6 أولاد كتير وصعب جدا وتوفير مطالبهم يحتاج رقم كبير.. أنا مش هفرح أبدًا غير إن قدرتوا تخلصوا كل شىء، مدارس ومستشفيات، وبعدين تخلوا المواطن دخله يصل إلى 10 آلاف أو 20 ألف جنيه في الشهر يمكن ساعتها أبقى مرضى».
وشملت افتتاحات الرئيس، محطة مياه أبوقرقاص بالمنيا، وتوسعات محطات صرف صحى العدوة، و«طنسا بنى مالو»، و«أبوصير»، وتوسعات محطة مياه الواسطى ببنى سويف، ودشنا وفرشوط بقنا، ومحطة صرف صحى أبوشنب بالفيوم، والمرحلة الثانية من محطة مياه المنيا الجديدة، ومياه ديروط بأسيوط، وتنقية مياة الشرب بقنا الجديدة، إلى جانب عدد من مشروعات قطاع الصحة والتعليم العالى، تضمن كلية ومستشفى طب الأسنان بجامعة أسيوط، ومستشفى الكبد بالمنيا، ومستشفى سمالوط النموذجى، ومستشفى الأطفال التخصصى (العديسات) بالأقصر، ومستشفى إيزيس للنساء والولادة بالبياضية، ومستشفى دير مواس المركزى ومستشفى ملوى التخصصى، ومستشفى الصحة النفسية بسوهاج.
وشاهد الرئيس فيلمًا تسجيليًا بعنوان «صعيد الخير» من إنتاج الشؤون المعنوية بالقوات المسلحة، تناول المشروعات التنموية في محافظات الصعيد، بينها الطاقة ومعالجة المياه والصحة والإسكان وغيرها، واستجاب لدعوى الدكتور مصطفى مدبولى، رئيس مجلس الوزراء، له بالتوقيع على أول نسخة من الكتاب الخاص بالرؤية والإنجاز وتوثيق كل المشروعات التي أنجزتها الدولة على مدار ال7 سنوات الماضية.