عمرو أديب يشن هجوما على محمد رمضان : شيء مستفز في بلد الناس فيها بتطفح الكوته

أنتقد الإعلامي عمرو أديب، الفيديو الذي نشره الفنان محمد رمضان وهو يلقي النقود علي الأرض بعد صدور حكم تغريمه ب 6 مليون جنيه لصالح الطيار أشرف أبو اليسر.
قال أديب خلال حلقة أمس من برنامجه «الحكاية» عبر شاشة mbc مصر: «فيديو مستفز جدًا لشعب مصر، شيء مستفز في بلد فيها الناس بتطفح الكوته علشان تجيب رزقها، يعني النعمة دي متفرقش معاه».
وأضاف: «كأنه بيقولنا الفلوس دي علي الجزمة، بيقولنا إيه يعني 6 مليون جنيه أنا الفلوس متفرقش معايا في حاجة، فالأستاذ نمبر وان أثارحفيظة عدد كبير من الناس اللي بتحبه، الراجل ده بقى عدو نفسه.. متفهمش دماغه بقى فيها إيه، أنا عاوزه بس يشرحلي إيه الفكرة؟ يا أخي لو الفلوس متهمكش وكتير اتبرع بيها لحد».
وتابع: «يا نمبر وإن أنت مش ملاحظ إن بقالك سنة بتعمل مصايب؟.. على فكرة مش أنت بس يا محمد اللي عندك فلوس، فيه ناس عندها فلوس أدك 100 مرة بس مبيعملوش كدة».
واستكمل: «ده بطر يا ابني واللي ادهالك قادر يسحبها منك، الناس اللي انت استفزتهم دول هما اللي عملوك، لأن أنت جزء كبير منك صناعة سوشيال ميديا، إيه المانع إنك تعتذر للناس، اللي كنا فاكرينه موسى طلع فرعون، اهدى وارجع لعقلك وبلاش غرور، ناس كتير أعظم منك وضاعوا في ثواني لسة قدامك وقت ترجع تاني في كلامك ترجع محمد رمضان بتاع الناس والشعب والغلابة إنما لو ناوي تكمل كده أبشر».
واختتم حديثه قائلا: «شوف النهاردة أخوك خالد النبوي لما اتقال نه عيان مصر كلها واقفة على رجل، عشان البلد كلها بتحترمه وبتحبه إنما ده مش موقف بني أدم مثقف حاول تبقي أوعى من كده يا محمد».