رحاب الجمل ترد على باسم سمرة: «تلقيت تهديدات بإرساله بلطجية»

قالت الفنانة رحاب الجمل، إنها ستلجأ للقضاء وسترد على كل تصريحات وبيانات باسم سمرة، بشكل قانوني، مؤكدة أنها تلقت العديد من التهدديات بأنه سيقوم بإرسال بلطجية لها، حسب قولها.
وتابعت رحاب، في تصريحاتها للإعلامي عمرو أديب عبر برنامج «الحكاية» على «إم بي سي مصر»: «الحكاية امبارح كان عندنا بروفة في القاعة التي استأجرتها المنتجة، والمنتج الفني للفيلم، وفوجئنا بالأستاذ باسم بيقول للممثل أحمد سلطان خد لف دي.. وهذا ما اعترضنا عليه جميعًا وقولنا له مينفعش احنا في مكان عام وفيه كاميرات».
وأضافت: «بعدها قمت من جنبه لأن تصرفاته معجبتنيش، وبقى عصبى وبيقول إزاى تمنعونى أنى أشرب حشيش.. وكمان طلب خمرة من الأوتيل ولكن المنتجة وكل الحضور رفضوا تصرفاته وأبلغت المنتجة الأوتيل بإغلاق الحساب».
وتابعت: «بعدها بدأ يشتم بألفاظ غير مقبولة بالأم والأب وسباب، واضطر أمن الأوتيل للتدخل وإخراجه بره القاعة، وهناك شهود كثيرين على كل ما حدث وسأطلب شهادة كل الحضور وحتى الأوتيل وتفريغ كاميرات القاعة التي كنا نجلس فيها».
وأكدت رحاب أنها غادرت القاعة بعد كل ما حدث لأن دموعها نزلت من الخضة، وأنها ستلجأ للقضاء لاستعادة حقوقها في كل ما قاله باسم وكل ما فعله.
وكان باسم سمرة، قد صرح للإعلامي عمرو أديب، قائلًا: «أنا مستغرب أن الموضوع ده قالب الدنيا، ده أتفه من كده وأبسط من كده».
وتابع: «الفنانة اللى قالت الكلام ده كان عندها سفر قبل يوم 14 وعاوزة تخلص الفيلم.. وبحاول اقولها استنى شوية يومين 3 وبعد كده سافرى.. لان فيه تظبيط في المسلسل اللي شغال عليه دلوقتي وكده، فقالت خلاص بعتذر.. وقلت للمخرج خلاص نجيب واحدة تانية»، موضحًا أنها كانت موجودة في نفس المسلسل الذي يعمل به، ولكنها طلبت مبلغا إضافيًا ولكن تم رفضه..
واستطرد: «اللي عرفته أنها طلبت مبلغ كبير فمرضيوش في المسلسل ومشوها، هي افتكرت أني أنا اللي مشيتها من المسلسل والفيلم، أنا مش بقول كده عشان أطلع في دور البريء والبتاع، أنا بعرف أخد حقي بدراعي، دي ناس عاوزه تشتهر على حسابي، دي أنا آخر مرة جايبها من القسم، كان جوزها نصاب وكان لابس ملابس ناس في الداخلية وماسك لاسلكي».
وواصل: «جوزها طلع نصاب، وأنا روحت جبتها من القسم عشان التصوير يكمل، هي ست مدعية، أي حد هيتكلم عني هزعله فورًا، وهروح للاستاذ أشرف زكي والنقابة والقضاء».
يذكر أن الفنان أشرف زكي، قد أصدر قرارا بمنع رحاب الجمل وباسم السمرة من التمثيل لحين مثولهما للتحقيق وإنهاء الأزمة التي أثارتها رحاب الجمل عبر حسابها على «فيسبوك»
وكانت رحاب الجمل، قد كتبت في منشور لها: «الممثل السكران.. لما تبقى سكران وتدخل فرح وتضرب زميل نجم بالكوع ويسامحك لأنه مستغلبك ومستضعفك.. أنت بقى تعتبر إن ده حق مكتسب.. وبعدها بحوالي شهرين تدخل حفلة وتشتم وتهين مغني شاب، ويكبر للناس اللي اتدخلت في الموضوع ويسامحك برضو تعتبره حق مكتسب».
وتابعت: «لكن تدخل بالأمس بروفة فيلم وإنت سكران وعايز كمان تلف حشيش، ولما نعترض تشتم وتهين زمايلك وتغلط وتتلفظ بأقذر وأسفل الشتائم قدام الأغراب في مكان عام.. دي ماتتسامحش عليها لازم تتعاقب وبالقانون لأن ده قلة أدب وقلة مهنية، والمرة دي البلاغ للنائب العام علشان أرفع الحرج عن أي زميل أو زميلة في طلب المشاركة في البلاغ أو الشهادة يكفي تفريغ الكاميرات.. أنا هاربيك».
وأضافت في تدوينة أخرى: «كل الشكر والتقدير لنقابتي نقابة المهن التمثيلية.. شكرا دكتور أشرف زكي لاهتمامك ولحرصك على مصلحة الفن والفنانين.. ولعمل اللازم والتحقيق في واقعة أمس من مشادة وإساءة زميل لي ولزملائي..وأنا أثق في نقابتي أنها ستتخذ اللازم وتحويل الموضوع للتحقيق».