«المصري اليوم» تنشر تفاصيل تحقيقات واقعة «طفل المرور»

حصلت «المصرى اليوم» على تفاصيل التحقيقات فى القضية المعروفة إعلاميا ب«طفل المرور»، الذى قام بالاعتداء على رجل مرور بمنطقة المعادى.
وخلال التحقيقات أكد الطفل المتهم أحمد أبوالمجد قيامه بسب وقذف رجل شرطة أثناء تأدية عمله وقيادة سيارة بدون رخص، وتبين من أقوال المتهم أنه تحصل على مفاتيح السيارة من صديق والده بدون علمه واعترف المتهم بتوجيه الشتائم لرجل المرور ولكنه عاد له واعتذر عما بدر منه، وقال أمين الشرطة المجنى عليه إنه ورد إليه العديد من الشكاوى حول وجود طفل يقود سيارة بسرعة كبيرة.
وقال المجنى عليه أمين الشرطة محمد فوزى جاد الله محمود بالإدارة العامة لمرور القاهرة إنه عندما سأل الطفل قائد السيارة عن رخص القيادة والسير أخبره بأنه لا يمتلك رخصا وأن السيارة هيئة قضائية خاصة بوالده المستشار وأن الطفل المتهم تحدث معه بأسلوب غير لائق ووجه له السب والقذف قائلا له: «إحنا ممكن نضربك ونكسحك ونقعدك جنب إمك لولا إنك راجل كبير». وكشف تقرير مصلحة الطب الشرعى الخاص بتحليل المخدرات تعاطى الطفل المتهم وأصدقائه مواد مخدرة «حشيش» وسلبية العينات المأخوذة منهم حول تناول المورفين واستركتين والبنزوديازين والكحوليات والترامادول والمبيدات والغازات.
كما تبين من تقارير المساعدات الفنية بوزارة الداخلية الخاصة بفحص هواتف الطفل أحمد أبوالمجد المتهم بإهانة رجل مرور أنه يمتلك هاتف آى فون وبفحص تطبيق إنستجرام مثبت على الهاتف باسمه تبين أنه لا يحتوى على أى مقاطع فيديو خاصة بالواقعة كما تبين وجود 3 حسابات أخرى مفعلة على التطبيق المشار إليه.
«المتهم»: «سرقت مفاتيح السيارة وكنت عايز آخد لفة بالعربية»
اعترف طفل المرور بسرقة مفاتيح السيارة و«إنه كان عايز ياخد لفه»، وأنه اعتدى على أمين شرطة بالمرور، ثم عاد واعتذر له، قبل أن يتم القبض عليه، وحصلت «المصرى اليوم» على نص التحقيقات التى جرت مع المتهم.
س – اسمك وسنك وعنوانك؟
ج – اسمى أحمد أبوالمجد عبدالرحمن أبوالمجد محمد طالب بالصف الثانى الإعدادى بمدرسة كورنيل الدولية بالتجمع الخامس ومقيم بمنطقة المعادى مواليد 22 إبريل 2007
س – ما تفصيلات إقرارك على وجه التحديد؟
ج – اللى حصل إن يوم الاثنين اللى فات خلصت المدرسة بتاعتى وطلبت أوبر وطلعت على بيت صديق والدى واسمه عمو وائل ورحت له أقعد معاه شوية وبعد لما روحت له قعدت عنده حوالى ربع ساعة ولقيت مفاتيح العربية المرسيدس اللى كانت بتاعة والدى وباعها لعمو وائل موجودة على ترابيزة جنب باب الشقة فجه فى بالى إنى آخد مفاتيح العربية عشان ألف بيها شوية وبالفعل نزلت والعربية كانت مركونة قصاد العمارة فى الشارع ومفيش حد خد باله إنى فتحتها ولا عمو وائل كان يعرف وبالفعل شغلت العربية وسوقتها وكلمت صحابى عشان أقابلهم ونلف سوا بالعربية وهما كانوا موجودين عند الجنينة الفرنسية بزهراء المعادى وروحتلهم على هناك وكان عددهم 4 وركبوا معايا وقعدنا نلف بيها حوالى 5 دقائق فى نفس منطقة ميدان بيتشو فى زهراء المعادى لغاية لما لقيت أمين شرطة بتاع المرور بيوقفنى بالعربية فأنا خفت أقف عشان معيش رخصة وكملت مشى بالعربية ولقيت أمين الشرطة خبط إيده فى مراية العربية الشمال بتاعت باب السواق فلفيت ورجعتله ووقفت عنده ولقيته بيسالنى فين رخصتك قولته مش معايا وبعدها لقيته حط إيده على دراعى الشمال قولته شيل إيدك وقعد يسألنى تانى على الرخص قولتله مش معايا وسألته إنت فين كمامتك عشان مكنش لابس كمامة عشان كنت خايف من مرض الكورونا المنتشر فقالى خليك واقف ولقيته رايح ناحية مقدمة السيارة علشان ياخد نمر العربية فخفت يسحبها علشان مايأذيش عمو وائل فمشيت بالعربية بسرعة وجريت بيها ولقيته هو مرة واحدة رفع رجله اليمين كان عايز يضربنى فى وشى وجت رجله فى قايم باب العربية وأنا بعدها بصيت ناحيته وشتمته وقولت له «لفظ خارج» وبعدها خدت بعضى وجريت بالعربية وبعدها بحوالى دقيقتين رجعت لأمين الشرطة تانى عشان أعتذر له على اللى حصل واتقابلت معاه وقولته حقك عليا يا عمو مش عايزيك تكون زعلان منى ولقيته باسنى على خدى وقالى مفيش أى حاجة يا حبيبى وبعدها خدت بعضى ومشيت وهو ده كل اللى حصل.
س – ومن كان برفقتك آنذاك وما هى طبيعة علاقتك بهم؟
ج – أنا كنت بلف بالعربية بتاعة عمو وائل ساعتها وهم رامز عصام ومصطفى تامر ويوسف أبوعوف وعمرو أحمد وشهرته تايسون ومش عارف أساميهم بالكامل، ودول أصحابى فى منطقة المعادى وكلهم فى سنة ثالثة ثانوى بس مش معايا فى نفس المدرسة.
س – وما سبب تكوينك صداقات مع آخرين أكبر منك؟
ج – ده أمر عادى وأنا اعرفهم من المنطقة وكلنا أصحاب مع بعض.
س – ما هى كامل بيانات المدعو وائل وما طبيعة علاقتك به؟
ج – معرفش اسمه بالكامل إيه وهو ساكن فى زهراء المعادى بس معرفش عنوانه إيه بالضبط وهو عنده محل جنوط وكاوتش وبطاريات سيارات وعلاقتى به يبقى صاحب والدى من زمان ويعتبر هو اللى مربينى وساعات كتير أروح أقعد معاه.
س – مع من تقابلت عقب وصولك لمنزل المدعو وائل؟
ج – كان موجود عمو وائل وبناته ال 4 وكانوا موجودين فى أوضتهم عشان محجبات ومرات عمو وائل.
س – ولم قررت التوجه لمسكن المدعو وائل ولم تتوجه إلى مسكنك وما هى المدة الزمنية التى مكثتها؟
ج – عشان عمو وائل كان واحشنى وكنت عايز أشوفه وقعدت عنده حوالى ربع ساعة تقريبا وكنت قاعد مع عمو وائل لوحدنا فى الصالة وقعدنا نضحك مع بعض ويسألنى على احوالى فى المدرسة وسالنى إذا كنت هتغدى معاه وقولته مش هينفع عشان محتاج اروح أنام وبعدها عمو وائل خد بعضه ودخل أوضته بعد لما قولته همشى وأنا خدت بعضى وطلعت على باب الشقة عشان أروح لغاية ما شوفت مفاتيح العربية بتاعة عمو وائل.
س - أين كانت تتواجد مفاتيح السيارة وملك من؟
ج – كانت موجودة على ترابيزة جنب باب الشقة من ناحية الشمال والعربية ملك عمو وائل ماركة مرسيدس والعربية دى كانت بتاعة بابا وعمو وائل اشتراها منه من حوالى شهر تقريبا وقررت آخد مفتاح العربية كنت عايز أسوق وألف بيها شوية.
س – هل سبق لك أنك قدت السيارة بمفردك وهل علم المدعو وائل باستحصالك على مفتاح السيارة؟
ج – لا دى كانت أول مرة ساعة الواقعة لما سوقتها لوحدى وأنا لما لقيت عمو وائل داخل أوضة نومه وصلت عند باب الشقة لقيت المفتاح وقررت آخده وشغلت العربية وركبتها ومحدش شافنى.
س – ما هو الغرض من وراء تحصلك على مفتاح السيارة؟
ج – كنت عايز ألف بيها فى المنطقة مع صحابى وأرجعها تانى وكلمت صاحبى رامز عصام وقالى إنه موجود عند الجنينة الفرنسية ومعاه مصطفى ويوسف وعمرو ورحتلهم علشان آخدهم معايا فى العربية ونلف شوية بيها.
س – ما هو سبب استيقاف أمين الشرطة لك؟
ج – عشان هو شايفنى لسه صغير فى السن وسايق عربية وأكيد مش شايل رخص قيادة وخفت منه ومرضتش اقف وجريت بسرعة بالعربية لحسن ياخد مخالفة على نمر العربية عشان دى بتاعة عمو وائل ومش عايز اسبب له اى اذى فعشان كده جريت
س – ما هو التصرف الذى بدر من فرد الشرطة؟
ج – هو خبط إيده الشمال وجت فى المراية الشمال للعربية واللى عند باب السواق وتسبب فى تحرك زجاج المرايا من مكانه.
س – ما التصرف الذى قمت به عقب ذلك؟
ج – وأنا بصيت ناحيته وأنا بجرى بالعربية وشتمته وقولت له لفظ خارج علشان هو رفع رجله اليمين كان عايز يضربنى فى وشى بس رجله جت فى قايم العربية.
س- ما التصرف الذى بدر من أصدقائك إبان حدوث الواقعة؟
ج – كانوا عمالين يضحكوا ومحدش فيهم اتكلم وبعدين رجعت لأمين الشرطة تانى علشان أعتذر له وقولت له حقك عليا يا عمو مش عايزيك تكون زعلان منى ولقيته باسنى على خدى وقالى مافيش أى حاجة يا حبيبى وبعدها خدت بعضى ومشيت وصلت اصحابى ورجعتهم عند الجنينة الفرنسية وطلعت بالعربية عند بيت عمو وائل وركنتها فى نفس المكان قدام العمارة وفوجئت بإن عمو وائل واقف فى الشارع بيدور عليا وعلى عربيته وسألنى كنت فين قولت له باخد لفة حوالين الجنينة وزعق لى وقالى متخدش العربية من ورايا تانى واديتله مفتاح العربية وطلبت أوبر وروحت.
س – هل سبق ضبطك فى قضايا مماثلة من قبل؟
ج- لا عمرى ما اتحطيت فى الموقف ده.
س- أنت متهم بإهانة موظف عام وأحد رجال الضبط وهو المجنى عليه أمين الشرطة محمد فوزى أثناء تادية وظيفته؟
ج- أنا فعلا شتمته بس مهددتوهش وشتمته عشان رد فعل لما رفع رجليه وحاول يضربنى فى وشى وجت فى قايم العربية وفعلا سوقت العربية بسرعة علشان كنت خايف من أمين الشرطة.
س – أنت متهم بقيادة مركبة دون الحصول على رخصة قيادة؟
ج – فعلا حصل أنا مطلعتش رخصة سواقة وسوقت عربية عمو وائل بس كان قصدى ألف بيها شوية.
تفاصيل أخرى فى نسخة
«المصرى اليوم ديجيتال»
هاتف الطفل يتضمن فيديو لرجل المرور ورسائل تهديد لشخص نشر الفيديو «أون لاين»
كشفت تقارير المساعدات الفنية بوزارة الداخلية الخاصة بفحص هواتف الطفل أحمد أبوالمجد المتهم بإهانة رجل مرور أنه يمتلك هاتف آى فون وبفحص تطبيق إنستجرام مثبت على الهاتف باسمه، وبفحصه تبين أنه لا يحتوى على أى مقاطع فيديو خاصة بالواقعة كما تبين وجود 3 حسابات أخرى مفعلة على التطبيق المشار إليه.
كما تبين من فحص الفيديوهات والصور الموجودة على الهاتف وجود مقطعى فيديو خاصين بالواقعة، المقطع الأول مدته دقيقة و36 ثانية ويظهر بها توجه المتهم وبصحبته أحد زملائه إلى رجل الشرطة سيرا على الأقدام وتوجيه عبارات «أنا أبويا رئيس محكمة والله كفيل إنى أأكلك علقة أموتك والله العظيم لولا عارف إن انت راجل كبير كان زمانى مقعدك على حجرى».
أما المقطع الثانى مدته 12 ثانية فهو استكمال لمقطع الفيديو الأول، حيث يوجه رجل الشرطة كلامه إلى الطفل وأصدقائه قائلاً: «صورت يا حبيبى يالا يا حبيبى اتفضل اتوكل على الله».
كما تبين من فحص الهاتف وجود عدد كبير من الفيديوهات يظهر بها عدادات سرعة سيارات يتم قيادتها بسرعات عالية بعضها يتجاوز 200 كيلومتر فى الساعة ويظهر بتلك المقاطع ما يفيد بأنه تم نشره عبر تطبيق تيك توك وفيديو آخر يظهر مؤشر عداد سرعة السيارة إلى 240 كيلومترا فى الساعة، بالإضافة إلى عدد من الفيديوهات أثناء قيادة السيارات.
وبفحص رسائل الواتس آب الخاصة بهاتف المتهم تبين أنه أرسل العديد من الرسائل إلى أصدقائه فى محاولة منه للتوصل إلى شخص يدعى كريم إسماعيل الذى قام برفع الفيديو على شبكة الإنترنت ومحاولة إقناعه أو إرهابه لحذف الفيديو من على شبكة الإنترنت، كما تبين وجود فيديوهات تتضمن اعتداء الطفل على رجل المرور بألفاظ خادشة.
كما كشف تقرير مصلحة الطب الشرعى والخاص بتحليل المخدرات للمتهم وأصدقائه سلبية العينات المأخوذة منهم حول تناول المورفين واستركتين والبنزوديازين والكحوليات والترامادول والمبيدات والغازات وتبين إيجابية تناولهم مخدر الحشيش.