شحات باسم الوحدة الوطنية

يومياً استقل مترو الأنفاق وللأسف خط ( المنيب - شبرا الخيمة ) وأقول للأسف لأنه حاله بقى حال فين أيام الغرامات واللى يرمى ورقة ولا حتى يحاول يلاقى واحد طلع له منين متعرفشى يقوله غرامة عشره جنيه يا أستاذ هيييييه أيام .
المهم أدخل فى الموضوع طبعاً المترو دلوقتى بقى ونس يعنى على واحد يمسك الباب عشان يركب صاحبه ولا قال إيه بيفتحه عشان عم الحاج ولا ست الحاجة تلحقه وفاكر بكده عمل خير ولا البائعين الجائلين إللى بقوا إيه ولا أتوبيس الهيئة يهنى الواحد من دول يتسول ولا ينحرف أيهما أفصح على رأى اللمبى .
الموضوع بقى الجماعة المتسولين دول بيتفننوا فى طرق الشحاته مره مناديل ومره أدعيه دينيه ومره نعناع ياباشا ولا تلاقى ورقه كده فيها مأساة . وطرق تانيه كتير ... ..
ولكن العجيب واللى لفت إنتباهى واحد دخل المترو طبعاً من المتسولين دول لكن طريقته وكلامه المره دى مختلفين عن أى حد تانى الكل يدخل المترو ويقول صلى ع النبى .. لله يا مؤمن .. ياعد أخوك المسلم ... (ياريت محدش يزعل ) لكن الراجل ده كلامه مختلف بيقول لله ساعد محتاج إن كنت مسلم أو مسيحى ربنا ما يرميك فى ضيقة ولا يخليك محتاج ؟؟؟؟
الكلام جه فى ودانى أول مره لكنى مصدقتوش معرفتش ودنى تصدقه قولت فى نفسى أكيد سمعت غلط لكن لما قرب الشخص ده منى سمعته كويس جداَ بيقول فعلاً الكلام ده أستغربت ومن الدهشه ظهرت إبتسامة على وجهى لم أستطيع أن أمنعها وقولت فى نفسى ( يا سلام بعد مذبحة ماسبيرو بقى مش بس فيه الوحدة الوطنية لكن بقى فيه شحات الوحدة الوطنية )