قال الفنان أحمد فلوكس: «ماكنتش عاوز أطلق هنا شيحة لأن هنا جميلة جدا ومن الناس اللي قابلتهم ومايتعوضوش، كانت بتحبنى جدا، وست بمليون راجل، ولكن أنا كراجل صعب صعيدي حتى لو ماروحتش الصعيد طول عمرى، وعصبي جدا، وفي نفس الوقت هنا شيحة مايتفرطش فيها بسهولة بس هي اللي طلبت، وطبيعي اللي هتطلبه هنا هعملهولها لغاية ما أموت». وأشار «فلوكس»، خلال برنامج «شيخ الحارة» على قناة «القاهرة والناس»، مع إيناس الدغيدي، إلى أنه يتمنى أن يرتبط بسيدة جميلة كانت زميلته في المدرسة، متابعا «أنا بحب أهزر مع الناس على السوشيال ميديا علشان كده قولت الكلام ده على حسابى، ولكن الرجالة محتاجة فلوس كتير علشان يتجوزوا، لأن الراجل بيعمل كل حاجة، وأكتر حاجة بتضايقنى في الجواز كلمة (بنشترى راجل) لأن الجملة ديه لو اتقالتلى هسيبها وهمشى.. جملة صعبة جدا». وتابع: «أنا مادخلتش الفن عن طريق والدى بالعكس هو كان رافض، أنا دارس إعلام قسم تصوير، وأبويا كان عاوزني أشتغل في البيزنس، وبالفعل أنا دلوقتى فاتح شركة، لأن الفن مابقاش هو اللى تربينا عليه، وأكبر دليل على كلامى، أنى كنت بروح الجامعة بميكروباص.. يعنى تعبت في البداية». وعن الفيديو الذي كان يهاجم فيه الهارب، معتز مطر، قال «فلوكس»: «أنا عمري ما هدخل حزب.. لكن وقت هجومى على هذا الشخص.. أي بنى أدم طبيعي هيهاجمه.. لأنه بيقول ادعاءات.. وكان من واجبى أقول الكلام ده.. أنا شفت عساكر وضباط وصف كلهم ناس بتسيب بيوتهم وبيروحوا معسكراتهم.. دول بيبنوا.. في الوقت اللى في ناس بتهد».
