أنا مش حاسة بالتغيير... ولازم ننزل ميدان التحرير... ننزل عشان مصر ماتغيرتش... أيوة ماتغيرتش... عملنا ثورة ومصر لسة ماتغيرتش... مصر ماتغيرتش ولسة بتعدى الشارع فى وسط العربيات حتى لو دا معناه انها تلبس السواقين فى مصيبة مصر ماتغيرتش ولسة بتكسر على اللى جنبها وهى سايقة كأن مشوارها أهم من مشوار غيرها مصر ماتغيرتش ولسة بتنزل متأخر و بعدين تسوق زى المجنونة عشان توصل فى ميعادها حتى لو عرضت الغير للخطر مصر ماتغيرتش ولسة بسوق بالبوز بيز ... قاعدة الأولوية للى يمد بوزه الأول مصر ماتغيرتش ولسة لو راكبة موتوسيكل ولا فسبا بتزجزج بي العربيات كأن قانون المرور ماينتطبقش على أم عجلتين مصر ماتغيرتش ولسة بتتحرش بالناس فى الشارع كأن غرائزها أهم من الشرف و طظ فى عود الكبريت مصر ماتغيرتش ولسة مشغلة لسانها فى دار الافتاء حتى لو مش عارفة ومش قارية وكأن المعلومات بتجيلها ربانى مصر ماتغيرتش ولسة عاجباها دماغها ومش عاجباها دماغ غيرها رغم انها معترفة ان تعليمها وحش زيها زى غيرها مصر ماتغيرتش ولسة مقتنعة إن اللى صوته أعلى فى المناقشة هو اللى صح مصر ماتغيرتش ولسة بدل ما تحاول تشرح لك وجهة نظرها بتطلع وجهة نظرك هى اللى غلط لأن كدة أسهل مصر ماتغيرتش ولسة وِدَنِية تسمع أى إشاعة تصدقها ومن غير ما تتأكد تروح تنشرها حتى لو فيها أعراض بنى آدمين طالما مش عرضها هى مصر ماتغيرتش ولسة بتصلى كل الفروض قدام الناس بس بتجيب فى سيرتهم من وراهم مصر ماتغيرتش ولسة بتشكى أنهم مش مقدرينها فى الشغل وهى مقضية نص وقت شغلها على الفيسبوك مصر ماتغيرتش ولسة مش فاهمة إن وجود فساد فى مكان لا يعنى ان كل المكان فاسد وإن الفكر دا فى حد ذاته فكر فاسد مصر ماتغيرتش ولسة متعصبة وبتقول الهلال والصليب إيد واحدة وهما الحقيقة ايدتين وكمان ماكلفتش خاطرها تضم الغلابة اللى من أديان تانية فى أسطورة الوحدة الوطنية كأنهم من بلد تانية مصر ماتغيرتش ولسة ساذجة بتلوم أى غلط على طرف واحد ومافهمتش ان كل القفف ليها أكتر من ودنتين وبيشلوها على الأقل اتنين مصر ماتغيرتش ولسة بتقول على الشَّحاتة أم عيل انها معندهاش رحمة عشان بتستغل العيل وماتعرفش ان الغلبانة ماشفتش رحمة عشان تعرف هى ايه الرحمة وإن ابنها دا يبقى حفيد أبوه يا ناس ياهوه مصر ماتغيرتش ولسة عندها عقدة نقص وتفضل تقول أنا أحسن من برة عشان عندى دين كأن هما برة بلا دين مصر ماتغيرتش ولسة عندها عقدة خواجة ومابتحسش بإنجازاتها إلا لو اللى برة دول (اللى هما بلا دين) هما اللى اعترفوا بيها مش أهل بلدها مصر ماتغيرتش ولسة لو هى غنية بتحس انها أحسن من غيرها ولو هى فقيرة بتحس إنها أقل من غيرها مصر ماتغيرتش ولسة بتتمنظر بمعارفها و نسايبها على أساس إن فيه ولاد ناس وفيه ولاد كلب مصر ماتغيرتش ولسة اختلاف الرأى بيقلب بخناقة وقضية مصر ماتغيرتش ولسة مستعجلة على رزقها ولو الحاجة ماجبتش همها فى ساعتها مابتصبرش عليها وبترميها وبتدور ع اللى بعدها مصر ماتغيرتش ولسة فهلوية بتربَّط كلام الأول وبعدين تشوف إذا كانت قد كلمتها ولا لأ مصر ماتغيرتش ولسة مش عارفة تمارس الشجاعة فا بتقلش منها وتقلب قلة أدب مصر ماتغيرتش ولسة بتطالب بحقوقها من غير ما تفكر فى واجبتها وهى الحقيقة لا تعرف لا دى ولا دى مصر ماتغيرتش ولسة مش عارفة الفرق بين الثورة و البلطجة و النتيجة ان ماحدش بقى عارف الثورجى م البلطجى مصر ماتغيرتش ولسة بتطالب إن الدنيا حواليها تتغير من غير ما هى تتغير مصر ماتغيرتش وعشان أرُص كل اللى ماتغيرش فيها عايزة مساحة غير محدود للكتابة ونفس لا محدود للكلام اللى فى نفسى هاتقول لى اللى فاتت دى صفات الشعب مش صفات مصر؟ هاقولك وما هى أمة إلا شعبها؟ و ماهى مصر إلا شعب مصر؟ و ما هو شعب مصر إلا أنت وأنا و كل فرد حولنا؟ إزاى مستنيين بعد كام شهر من التنحى ان مصر كلها تتغير فى المدة القليلة دى إذا كنت أنا وانت ماتغيرناش؟ ازاى والفرد مش بيغير فى نفسه الدولة بحالها المفروض تغير فى كل مؤسساتها؟ بنشاور على عدم التغيير فى مؤسسات ضخمة واحنا مش قادرين نغير فى أفراد؟ يعنى الفرد حاجة و الشعب حاجة و الدولة حاجة و المؤسسات حاجة و الحومة حاجة؟ كل دى حاجات مالهش ارتباط ببعض يعنى؟ إذا كان المتكلم مجنون فا المستمع عاقل عشان يتم نغير فى مصر يبقى لام نغير فى شعب مصر و عشان نغير فى شعب مصر لازم نغير فى كل فرد فى مصر و عشان نغير كل فرد لازم كل واحد فينا يشيل الخشبة من عينه قبل ما يشيل العماص من عين اللى جنبه لو ما بدأتش بنفسك يبقى إنت مش هاتتغير ولو إنت ماتغيرتش الشعب مش هايتغير ولو الشعب ماتغيرش مصر مش هاتتغير إبدأ بنفسك ... وإلا مصر مش هاتتغير