25 يناير .. شعر بقلمي

كان يا ما كان
كان في شباب زي الورد
عاش تلاتين سنه جلد
شرب كاس الذل لاخره
دور علي حد يشتكي
و الظالم نايم في قصره
يا ولاد بلدي
ربتونا تربيه غلط
خوفتونا ناكل الظلط
مشيتونا جوه الحيط
ولو اتهنت و اتذليت
لازم تتطاطي
و ان شاء الله تاخد علي قفاك
من امين معفن واطي
مش هي دي تربيتك
ولا هاتقول نسيت
متعرفش ان الموت
يجيك برصاصه
يجيك تحت سقف البيت
ربيتو فينا الخوف
و يبقي همك المم
دي كانت عيشه هم
يارتنا من عشرين سنه
قولنا لكل كلب اتلم
مكنش ده حالنا
ولا كان نزف الدم
اه يا تلت ميت شهيد
و ست ميت اب و ام
من يرضي بالظلم
رصاص حي يا بشر
علي صدور عريانه
قولولي
ده بكل دين كفر
و سلاحه ده امانه
قتلونا بدم بارد
علشان قولنا كرامه
يا مصر يا بلدي
دمي ليكي رخيص
و لو قتلني الف خسيس
عند ربنا عايش
وهو وسط الخلق
ميت مش عايش
في مصر
شباب من غضب
الطوب في ايديهم جمر
و الصوت ينفخ لهب
و الشعب بان جبروت
و الخوف بقي ماضي
يصرخ بعلو الصوت
ارحل عن بلادي
هانصلي الجمعه ع الكبري
و لو داستني دبابه
ولا الف مدفع ميه
يتلوي زي الحيه
يوزع البرد ع الكل
فاكرينا فراخ هانجري
خلاص هضمنا الذل
مصر القديمه دي مش بلدي
دي كانت خرابه
ارفع راسك اسد
الديب خلاص جري
رجعت ملك الغابه
مين يوصف الي حصل
ده بشعر ولا بكتابه
لبسنا المركزي الطرح
و نصبنا في التحرير الفرح
و الشعب كان مدعو
ذلينا عز بحديده
ضربنا العادلي علي ايده
و عساكر الظلم يجرو
و رجعت لينا مصر امانه
ولا شامي ولا مغربي
ولا حتي جرانه
جابو بلطيجه بخياله
فكروني بالكفار
في فيلم الرساله
شويه كلاب في التمن
ارخص من عواهر الهرم
فاكرينا شباب تافه
هايف ملوش لزمه
دخلو عيلنا بغدر
دوسناهم بالجذمه
و الشعب هو الي انتصر
و لو في فرعون ناوي يفتري تاني
اقسملك .. هانتكسر
زي ما غيرك انكسر