رب صدفة خير إن شاء الله

كان الخبر الجميل بموعد محاكمة محمد حسني مبارك و نجليه امام محكمة الجنايات دائرة شمال القاهرة..
جميل بجد..
بقى اجمل بكتير..يوم 3 اغسطس انما لما زاد بتحديد الموعد
التاريخ ده ممكن يكون عادي جدا لناس كتير و اقل من العادي كمان
انما بالنسبة ليا..
ده تاريخ ميلاد اجمل واحدة في الدنيا كلها..
اكتر واحدة باحبها بجد..
الواحدة اللي بتمثلي كل مفاهيم العدالة و الحب و السلام
العدالة اللي بتمنى انى الاقيها في كل حاجة حوالينا
الحب اللي لولاه ما نقدرش نعيش في الدنيا
والسلام اللي كلنا بنتمنى نعيش فيه ..
العدالة و الحب و السلام اللي نفس انهم يتحققوا في محاكمة مبارك و نجليه
هذا الموعد يوافق شهر رمضان ان شاء الله
شهر رمضان الكريم..اللي فضله ربنا بذكره في كتابه الكريم..
اللي بيمثل معاني الخير و الراحة و الامان
الخير اللي بيزيد و يكفي كل المصريين
الراحة اللي بنحس بيها و احنا صايمين و نحب نفضل بيها
الامان اللي بحمينا في رمضان من كل حاجة
الخير و الامان و الراحة اللي ماكناش حاسين بيهم..و اتمنى ان يومها يكون بداية تأريخها في حياة المصريين
يوم 3 أغسطس...
من الممكن يكون يوم عادي زي الايام اللي قبله و اللي بعده..
و ممكن يكون يوم مختلف و جديد..ميتكررش كتير في حياتنا
يوم بيمثل كل حاجة بالنسبالي..
ممكن يكون ربنا بيحبني لدرجة ان اليوم ده بكل ما يمثله ليا..ينعكس و يمثل ما يمثل ليا لكل المصريين اللي انا برضه باحبهم
لأنه كان مقرر انه ما يبقاش اصلا عادي..من ساعة ما حبيبتي اتولدت فيه.. يوم3 اغسطس..
كان طبيعي انه يتحدد فيه معاد محاكمة مبارك..معاد الحب و الحرية و العدالة المنشودة..و الامان والخير و الراحة التايهين مننا
و رب صدفة خير ان شاء الله
اللهم اكتب لنا الخير كله في امورنا كلها
كل 3-أغسطس و انت طيبة يا حبيبتي