صباح الخير ....بقلم / إيمان عبد الأعلي محمود

صباح الخير//
ياست الحسن يا زينه صباح الخير
صباح الخير علي عيونك
علي جفونك
لأول مره يا طاهره اشوف لونك
صباح الخير علي ضحكة نبي حَسْبِن علي فرعون
علي ثوره اذا تبدأ يقولوا عيال , إذا تخلص بمية مليون
لأول مرة يا زهره اقول الله بدون مُخبر
بدون شرطي ولا مُحْضر
بدون عسكر
لأول مره اغنيلك
و اشوف الشهد بينقط علي نيلك
ومن نيلك
يقوم الشهد لو يحكي يقول الله يخليلك
لأول مره ياشاطرة اصلي الفجر في المسجد و اقول الله بصوت عالي
و لا شرطي يكفرني و يضربني و يحكيلي انا ربك و لو ارفض يبعزقني ,
اذا امرض يقول البيه وانا مالي
و اقول يا مه , تقول يا بني هنعمل ايه , نصيبك يا بني متقدر و ده فالك
و ده فالي
لأول مره يا حلوه احب الخلق في الحاره
اقول طاهره تقوم مريم تقول سارة
لأول مره يا غنوه اشوف الناس بيتخانقوا علي الموته
و اشوفك نص حوريه و انسيه و قبطيه و مهديه و بنوته
واشوف عمرك بلون الشهد حدوته
و تطلع كلها حلوه , دي كانت عمر ملتوته
و ممقوته
و ضايق خلقها يا مّه , اذا تبكي يقولوا البت حربايه و سفروته
اذا تحكي يقولوا البت لو تحكي تكون كافره و ممسوسة
و ملبوسة
يطول السجن يا سمرا و طبخ القرع و الكوسه
انا جايلك بحضن كبير و مية بوسه
لاول مره يا نسمه اخدلك صوره في الكوشه
وتبقي بجد مبسوطه
و تبقي الشلة غيرانه و مفقوعه و مفروسه
بقالك عمر محبوسه
و ممصوصه
و كتفك ده يبات عريان و هما ياكلوا يا خضره اشي كافيار و بسبوسه
يقوم الفجر لو يدن يكن حسني و سبع الليل و ابو قصه في ميت حوسه
يطول سجنك و مين يقدر علي سجنك
يقوم المفتري يقدر
يقوم الطفل دا يكبر
ويرسم ف الهوا موجه
و تبدأ كلها الهوجه
و اقوم اصرخ اذا تبقي الامور عوجه
ارش الملح في الزفه
حكاوي الاهل و الخلان و ضحكة ليلة في اللفه
يقوم الفرح لو يصحي يزق الرزق بالدفه
وتبقي بحضنك الدافي
اشيل همك بمجدافي
و اجوع ليلي اذا ترضي و لو ترضي اعيش العمر لو حافي
يقوم العشق يكتبني ف نسمة شوق معديه
علي ضحكه منديه
علي دعوه ف ادان الفجر لو تخلص لها النية
و اكون توبك وتاج راسك و نبراسك و منديلك
و اذا يصحي حكيم الشوق يناديلي و يناديلك
و يوصفلي الهوا و الشوق اقوم اجري اناديلك
و انسي ديني من دينك
لاول مره يا مُهره , تبكيني مواويلك