السيسي: «البلد زى الفل وتتحرك للأمام ومفيش عودة مرة تانية للخلف»

افتتح الرئيس عبدالفتاح السيسي، صباح الثلاثاء، مجموعة من المشروعات القومية بنطاق محافظة دمياط، حيث افتتح مدينة دمياط للأثاث التي تعد إحدى أهم مدن الآثاث بالشرق الأوسط، بالإضافة لمشروع إسكان بدار مصر والذى يضم 194 عمارة بمدينة دمياط الجديدة، وفندق اللسان أول فندق 5 نجوم بمنطقة الدلتا بمدينة رأس البر، ومحطة متعددة الأغراض في ميناء دمياط، كما افتتح الرئيس عبدالفتاح السيسي محطة كهرباء غرب دمياط عبر تقنية الفيديو كونفراس، كما افتتح محطة محولات مدينة الأثاث .
وحرص الرئيس السيسي على تفقد مدينة دمياط للأثاث والتقط الصور التذكارية مع العاملين بها .
وقال الرئيس السيسى، خلال الافتتاح، إن الدولة المصرية جادة في تطوير ودعم الصناعة في مصر، من خلال تجهيز الأراضى الصناعية ومنح المصانع بترخيصها للمستثمرين، وهذا الأمر كلف الدولة مليارات، بما يحقق فرص عمل ويحرك الصناعة بشكل أكثر فعالية.
ووجه الرئيس رسالة للمواطنين قائلا: «بقول كدا يا مصريين عشان دى بلدكم مش بتاعتى أنا بس.. مصر بتاعتنا كلنا وكلنا نخلى بالنا منها وعارفين ما يحدث فيها، ونفرح بذلك».
وتابع قائلا: «يا جماعة مصر فيها 100 مليون وتنمو، وحجم الطلب للمساكن والفنادق ينمو.. وعندنا 14 مدينة سيتم افتتاح المرحلة الأولى منهم منتصف العام القادم.. وبالتالى هناك فرصة للعمل والانتاج ليهم مكان في السوق المصرى حتى لا يعتمد جزء منا على الأثاث من الخارج.. هنا مدينة الأثاث وهتعمل نقلة كبيرة في المنتج الجميل الموجود الآن ليكون أكثر جمالا وأكثر اتقانا.. وأنا بحلم بمدينة الاثاث لتأخذها مكانها.. والناس تقول هنروح مصر عشان نجيب أثاث من مدينة الاثاث بمدينة دمياط».
وأكد الرئيس أن الدولة تتعامل مع ملفات لم يتم التعامل معها من 100 سنة، ومنها تطوير بحيرة المنزلة، التي سيتم الانتهاء من تطويرها بحلول 2021، متابعا:«سيتم تطوير البحيرات في جميع أنحاء الجمهورية حسب المواصفات العالمية، و»هنرجع كل بحيرات مصر زى الكتاب بتاع بحيرات العالم المتقدم ما بيقول مش زى ما كانت على أيامنا«.
واضاف السيسي أن البحيرات كانت بتتمثل فيها أفلام زمان واللى كان عاوز حاجة بيعملها والدولة لن تغيب عن مصالح المواطنين، ولما البحيرة تخلص هتبقى قصة تانية، والله اللى بيتعمل فيكي يا مصر ميخطرش على بال حد.
وطالب الرئيس الإعلام بتوضيح الصورة للرأى العام من أجل بناء وعى حقيقى قائلا: «الحكاية كبيرة علشان نتصدى لبناء وعى حقيقى في الحفاظ على دولة بما يليق بدولة بحجم مصر»، مطالبا المسؤولين بتسليم الدولة في أحسن صورها للأجيال القادمة«.
وأكد السيسي أن العدادات الذكية ومسبوقة الدفع ستقضى على مشاكل القراءات والتحصيل، متابعا: «لدينا قدرة لإدارة التشغيل بكفاءة عالية وعدم ضعف الكهرباء، فيه 30 مليون مشترك ومفيش حد في العالم يستطيع توفير حجم هذه العدادات وتغيرها في عامين أو ثلاثة.
وأشار الرئيس إلى أن الدولة تعمل على تصويب البناء العشوائى، مضيفًا: «الدولة تعمل على حل مشاكل الكهرباء والصرف الصحى والمياه والغاز، ويجب على الدولة والمواطنين احترام التخطيط المتكامل».
كما وجه رسالة للمواطنين والإعلاميين قائلا: «لما بنتكلم بنتكلم عشان التحدى.. ومفيش تحدى خطر على مصر إلا من داخل مصر، وأرجو أن تنظروا للمنطقة حولكم.. وعندما يتحرك الناس قادرين يهدوا بلادهم.. مفيش حاجة عندى.. وانا هستنى عشان يبقى عندى وأنا بيكم.. دا أنا هفضل أكرر حتى يبقى عندكم مناعة ضد هدم البلد.. هفضل أكرر عشان أبقى قدام ربنا عملت اللى عليا مع الناس في مصر وفهمتهم خطورة أي تحرك».
وتابع الرئيس حديثه: «الدولة تبذل جهد جبار عشان تحل مشاكل وتقنعكم، والناس بتقول هو مستعجل كدا ليه!.. هو أنت كل مرة هتتكلم هتكرر كلامى.. أيوة.. وأتمنى من كل المسئولين يكرروه عشان المناعة لشبابنا الصغار اللى لسه طالع، الل كان عنده في 2011 حوالى 10 سنين النهارده عنده 17، ومشفش وميعرفش.. والتوعية مش مبنية على مدة زمنية على الناس اللى حضروا الأحداث وفهموا المخاطر، التوعية في الجامعة والمسجد والكنسية.. البلد البلد البلد.. مصر بينا واستقرارنا نقدر نعمل كتير».
وتابع: «هتقولوا لى فيه حاجة؟.. والله مافيه حاجة.. زى الفل، وأنا مش ببص على دلوقتى بس.. أنا ببص على دلوقتى وبكرة وبعده والسنين اللى جاية.. وكل ما فيه استقرار اتحركنا للأمام ومفيش عودة مرة تانية للخلف.. وكل حاجة معروفة ومحطوط لها استثماراتها وأموالها ولو حطينا محطة الضبعة مع مشروعات الكهرباء يبقى بنتكلم في تريليون جنيه.. وبقول كدا إننا متحركين بشكل أكثر من رائع وسنستمر فيه بجهدكم وصبركم، وأنتوا شايفين النتائج.. إحنا كنا بنتكلم في وضع اقتصادى عام 2016 كان كارثى، والنهارده ما شاء الله أفضل وسنتحسن أكثر».
وأوضح الرئيس السيسي أن الدولة صرفت 615 مليار جنيه لتحسين خدمات الكهرباء، مشيرا إلى أهمية توضيح الأمور للمواطن، حتى لا يتعرض للتشكيك، متابعا: «الكمية التي أنتجتها مصر من الكهرباء خلال 60 عاما، استطاعت أن تنتجها خلال 5 سنوات فقط، بزيادة قدرها 28 ألف ميجا وات».
وأضاف الرئيس: «انتم يا مصريين اللى عملتوا الكلام ده في خمس سنين تم مضاعفة حجم الكهرباء في مصر والكهرباء معناها تنمية وحياة، ومفيش حاجة بتتعمل إلا بتخطيط كبير ومتابعة»، لافتا إلى أن مصر أصبحت جسرًا لنقل الكهرباء.
وحذر الرئيس السيسي من البناء العشوائى قائلا: «3 مليار لمعالجة النمو العشوائى تحت أبراج الضغط العالى، وتصويب البناء العشوائى تكلفته على الدولة تفوق التخطيط المحكم، موجها حديثه للمخالفين:»انت مش عارف أنت بتعمل إيه فيك وفى أولادك وفى الدولة«.
ووجه الرئيس الهيئة الهندسية للقوات المسلحة، بالإشراف على الإنشاءات الجديدة في مدينة الاثاث بدمياط، حتى لا يتم الخروج عن الشكل والنماذج الإنشائية المقررة، مضيفًا: «عشان أضمن إن الحاجات هتتعمل مضبوط».
كما وجه الرئيس، خلال كلمته، الشكر لكل من ساهم في تنفيذ مدينة الأثاث بمدينة دمياط، مطالبًا جهاز المشروعات الصغيرة والمتوسطة بتقديم التسهيلات للراغبين بالعمل في المدينة، مع تجهيز مشاريع الإسكان الخطر المقرر تنفيذها من خلال مدينة الأثاث.