جلوب الأمريكي والمكرونة الأيطالي والجيش المصري

مقالات كثيرة بتعنون بثلاث كلمات متضادة من أجل جذب إنتباه القارئ وغالباً بتنفع
معهد جلوب الأميركي من أشهر معهد الأحصاء في العالم ويمتاز بالأحصائيات المهمه جداً في السياسة والأقتصاد الأميركي، أنا أخذت كورس يوم واحد مع جلوب علشان أختبر الموظفين إلي عندي " مع العلم أني منعنديش أي موظف بس كان كورس جميل، يوم أجازة يعني وتشغيل مخ "، أهم حاجة في جلوب الأسئلة ملتوية، حديكم مثال لسة عملو علشان يماثل عنوان النوت :
نفرض صاحب مطعم طلب عمل أحصائية عن أفضل مكرونة من أجل زيادة الدخل فجابوا 100 من رواد المطعم علشان يصوتوا، في أول أستفتاء كان السؤالين : هل تريد أكل صحي "نعم / لا " ، هل تريد انقاص النشويات " نعم / لا " ، 90% قال نعم ونعم . بعدين بكام أسبوع عملوا الأستفتاء الثاني بسؤالين : ما هو الصوص المفضل على المكرونة " أحمر ، أبيض ، لا أكل مكرونة " ، ما هو البروتين المفضل علي البشاميل " لحم مفروم ، دجاج، فيجي ، لا أكل بشاميل" ، و كانت الناتج 90% يأكل مكرونة و-بشاميل ، يعني نتيجة مضادة تماماً .
الدروس المستفادة هنا من كورس جلوب أن نعم ولا مش كفاية علشان تعبر عن اللى جوانا، فيه نعم ونعم جداً ونعم شوية ونعم بس في باطنها لا، يعني : أكل صحي ممكن يكون بدون نشويات أو قليل من النشويات أو غرقاً في حله مكرونة ، علشان كدة في السياسة في يمين ويسار ووسط ، اقصي يمين و-أقصي يسار ، يمين وسطي ، يسار وسطي .
الدرس التاني هو جيش مصر اللي هو صاحب مطعم وأهم حاجة عندوا زيادة دخل المطعم يعني مش مهم نعم أو لا، المهم أن العملية تنجح وكلمة الجيش ووعوده يتنفذوا ، وزي ما نتيجة المطعم وجهت صاحبه لللحم مفروم والصوص الأحمر، تصويت الناس، تحرك الشارع، ظهور طيور الظلام وقواد غزوة الصناديق، سلطان الشيوخ والكنيسة، كل ده غير مفهوم، الأكل الصحي إلي لحم مفروم وصوص أحمر عند الجيش.
هل قرر صاحب مطعم هذا قبل أو بعد الأستفتاء ؟ أنا رأيي قبل، الجيش والحمد لله معندوش أيدلوجية زي حضراتكم يعني مش يمين أو يسار أو خط وسط وبالتالى هو بيطبق مبدأ أوباما : أنا مليش مبدأ، بعمل بس إلي ينفع البلد من وجهة نظر أي واحد وبغير أستراتيجي، تفكيري يتغير كل أسبوع طبقاً للمستجدات، في ناس كتير هنا وهناك مش عجبهم كلام أوباما أو الجيش ويعتبروا ده سذاجة سياسة، بس بيني و بينكم ده أحسن الحلول
طب لو أن صاحب المطعم قرر ده قبل الأستفتاء، كان تاعب قلبنا ليه؟ أحنا ناسين أنه أولاً مش متأكد وجديد في الكار، ثانياً لازم يظهر للبنك سبب شراء اللحم مفروم والصوص الأحمر وعدم فرض الطعام الصحي وكمان كل الزباين فرحانين أنهم بيشاركوا في صنع المنيو وعارفين خطورة الطعام غير الصحي.
شفتم العلاقة بين الجلوب الأمريكي والمكرونة الأيطالي والجيش المصري، ياريت مكنتش صدعتوكم