في مكالمة بلغت مدتها نحو ربع ساعة، أجرى الرئيس عبدالفتاح السيسي أول اتصال هاتفي على الهواء، منذ توليه منصب رئيس الجمهورية، مع الإعلامي أسامة كمال على قناة «القاهرة والناس» في برنامج «القاهرة 360»، مساء الخميس. واستضاف كمال، غادة والي، وزيرة التضامن الاجتماعي، ومنعم سعد الدين، لاعب من لاعبي فريق كرة السلة لذوي الاحتياجات الخاصة، الذي دعا السيسي على الهواء مباشرة للقدوم إلى الاستاد لمشاهدة مباراتهم القادمة المقرر إقامتها، عصر الجمعة. وقال السيسي لمنعم: «عيني الاتنين لك ولكل اللي معاك»، فرد عليه لاعب كرة السلة: «حبيبي والله»، فقال الرئيس: «أنت كمان حبيبي يا ابني». نص المكالمة السيسي: اسمح لي إن أوجه التحية لمنعم، بقول له أهلا بك وأنا سعيد إن أنت موجود في البرنامج. منعم: أنت قوي السيسي: يا منعم دعوتك وصلتني. منعم: فيه حراسة؟ السيسي ضاحكًا: أنا في حراسته هو واللي زيه، وانت وكل اللي زيك في عنينا وعنين كل المصريين، وعاوز أقول إن إحنا مقصرين في حقكم يا ابني. أسامة كمال: هنعمل إيه للمعاقين يا ريس وهتقدم إيه زيادة؟ السيسي: خليني الأول أبلغ تحياتي للأستاذ خالد والدكتورة غادة، أنا عايز أقول لك على حاجة، إحنا بنتكلم على دولة، والدولة لما ترعى مواطنيها ده جزء من واجبها، صحيح يمكن تكون الظروف الاقتصادية ماتخليناش نعمل كل اللي إحنا عاوزينه أو كمان اللي إحنا بنتمنى نعمله لهم، لكن أنا بقولك إحنا كنا بنجري في كل المشروعات اللي بنعملها، وبيبقى الهدف القدرة على خدمة أبناء مصر وطبعا اللي على رأسهم ذو القدرات الخاصة مش هقول الاحتياجات، فأنا مش عايز أقول كلام مرسل كده، لكن إحنا على الأقل هنحاول ننفذ بكل ما لدينا من قدرة وبإرادة حقيقية للدولة على الأقل كل ما أقره الدستور، فالدستور يعني وضع لفئات المجتمع وعلى راسهم الفئة دي، حقوق لابد إن إحنا نتحرك ولابد إن غحنا نتحرك، ثم زي ما سمعت الدكتورة غادة بتقول إن المجتمع ممكن يساهم في ده، والحقيقة عشان نكون منصفين إن الدولة لوحدها يمكن ما تقدرش دلوقتي تساهم بالشكل اللي يليق بالناس دي، لكن مش عاوز أختم كلامي غير إني أنا أقول يا رب أنت مطلع علينا، وتعلم نوايانا، وأنا هفكر كل اللي بيسمعوني غن النبي محمد صلى الله عليه وسلم بيقول للضعاف ضعاف الأمة بهم ترزقون وبهم تنصرون، بهم ترزقون وبهم تنصرون، شوف حجم القوة اللي بيتهمتعه بها يا أستاذ أسامة، شوف انت قاعد جنبك مين؟ أسامة: كابتن منعم بنفسه؟ وعاوز أقول لك كابتن منعم عمال يكرر بحبك والله. (يتحدث عن دعم السيسي لبطولتهم). السيسي: خليني أكمل كلامك يا أستاذ أسامة، الحضور الكريم بيشاور على قضية موجود بمجتمعنا زي أولادنا اللي موجودين في الشارع، أنا مابقولش عليهم غير كده ولادنا اللي موجودين في الشارع، وأنا مش عايز أخلي الشماهدين النهارده الخميس وبكره يوم طيب جميل، ومش عاوز أزود الآلام، وعاوز أقول لكل اللي بيتفرجوا وبيسمعونا دلوقتي، فيه قضايا كتير في مصر، زي قضية ولادنا ذوي القدرات الخاصة، زي أولادنا الموجودين في الشارع، وكمان اللي ظروفهم المرضية وقرداتنا وقدرات مستشفياتنا مش قادرة تلبي علاج حقيقي لهم، ده لو حطينا ده بس قدام عنينا كسبب إن إحنا نشتغل ونتحرك بمنتهى القوة، ونكون على حجم التحدي اللي بيواجه مصر، فبقول لكل اللي بيسمعني خلي بالكم، الأمور دي كلها لازم تخلينا على قلب رجل واحد، ونتحرك بمنتهى القوة ونبقى على قدر المسؤولية، مسؤولية مصر والحفاظ عليها، أنت يمكن تقولي يعني أنا بكلمك يا أستاذ أسامة عشان أمسي على منعم وأحييه، ولا عشان نتكلم في حاجات أخرى، لا طبعا المواضيع مابتنفصلش عن بعضها عشان ولادنا يبقوا في أمان وسلام، وإذا كنا بنتكلم على 2 مليون ولا 3 مليون، يا ترى دول مالهمش خاطر عندنا عند كل المصريين إن هما يشتغلوا ويحافظوا على بلدهم عشان يقدروا يوفروا لهم حاجة مناسبة تعوض عليهم شوية، ده القضية اللي حضرتك بتتكلم عليها واستضفتوا فيها منعم، وقضايا كتير تانية بتقول لنا خلوا بالكم يا مصريين من بلدكم وخلوا بالكم من مصر وشعبها، لكن إوعى تفتكر إني أنا مجاوبتش على سؤالك يعني. أسامة كمال: أنا متشكر لحضرتك طبعًا. السيسي: إحنا هنجاوب على السؤال بفضل الله بعمل، والسؤال ده كمان هتحتاج تجاوب على بقوة الدكتورة غادة، لأن ده ملف من ملفاتها اللي هي كلها ملفات الإنسانية والتآخي والتضامن لمجتمع مصر، أرجو إني ماكونش أطلت عليكم. أسامة كمال: بالعكس يا فندم حضرتك شرفتنا وإحنا سعداء جدًا، ممكن رسالة أخيرة من منعم بس يقولها حضرتك. السيسي: ده أنا يسعدني إني أنا أسمع منعم. منعم: تعالى الافتتاح إن شاء الله. السيسي ضاحكًا: يا منعم أنا في أول الكلام قلت لك الدعوة وصلت، لا يا حبيبي لا، عيني الاتنين لك ولكل اللي معاك. منعم: حبيبي والله. السيسي: وأنت كمان حبيبي يا ابني. اشترك الآن لتصلك أهم الأخبار لحظة بلحظة