هو مين راح فين بكام؟

بيقولك فى استفتاء على التعديلات الدستورية يوم 19 مارس الحالى، فتلاقى اللى بيسألك: هو يعنى إيه دستور أصلا؟.. طب هو اتعدل ليه واتعدل إزاى؟ طب لما أروح الاستفتاء أكتب نعم ولا لأ؟
ثم يظهر لك شوية ناس فاهمة التعديلات ويقولوا آه ولا لأ بس عايزين يعرفوا هما لو قالوا لأ هيحصل إيه؟.. هنطلع الدستور القديم من الفريزر ونعمل عليه شوربة وفتة ولا هنشترى جاهز من بره؟
وبعدين يجيلك البرنامج المحبب بتاعك اللى بيفهمك كل حاجة تقريبا يستضيف ضيفين.. واحد يقولك التعديلات دى حاجة حلوة والمفروض نقول نعم، والتانى يقولك التعديلات دى حاجة وحشة والمفروض نقول لأ.. فى حين تترك أنت فى حالة حول نافوخى مزمن دون برشامة صداع واحدة يا مؤمن.
شوية وتسأل نفسك نعمل الانتخابات الرئاسية الأول ولا البرلمانية؟ ولا البرطمانية عشان نلحق نحط ملفات أمن الدولة المفرومة فى التلاجة عشان أهى تنفع فى العصاج.
طب نسيب البلد دى فى إيد الجيش ولا نعمل مجلس رئاسى كده حلو ومحندق صالة وخمس مطارح فورفورشيه والنيش على العريس؟
وبعدين يقولولك ده المسلمين والمسيحيين مية مية.. بعد شوية.. لأ مش مية مية ولا حاجة دول نص نص.. شوية تانيين.. يالهوى لأ دول مش طايقين بعض خالص.. لا ده احنا كلنا إيد واحدة يا بهجت كلنا بنكمل بعض.
وبعد كدة تظهر الحكومة على الساحة فيجتمع البعض على بعض رموزها فى حين يعترض البعض الآخر على البعض الآخر برضه، فتجد نفسك أمام بدلة سمير غانم فى «المتزوجون».. تظبط الجاكتة البنطلون يضرب.. تعدل البنطلون الجاكتة تضرب.
ثم يظهر قانون مكافحة البلطجة أبو عقوبة قد تصل للإعدام فتجد منظمات حقوق الإنسان ترفضه شكلاً وموضوعاً.. ثم يحاول الجيش تطبيق القانون فيلقى القبض على اتنين أبرياء مالهومش فى حوار البلطجة مثل على صبحى وعمرو عبدالله البحيرى.
ويجيبولك العادلى فى الصورة وتقول يتحاكم محاكمة عسكرية فيقولولك لأ ده من حقه محاكمة مدنية عادية!.. فى حين أن الشباب المعتصمين اللى اتاخدوا على إنهم بلطجية بيتحاكموا محاكمة عسكرية عادى خالص.
وهوبا.. تظهر الطامة الكبرى لما مرتضى منصور اللى يقولك إن الثورة دى ثورة شادى ووائل!.. طب مافى ناس اسمها احمد وجرجس وكانوا فى الثورة عادى يعنى يا كابتن وماحدش طلعلهم كارت أحمر ولا حاجة.
وبعدين شوية تلاقيه بيقولك إحنا عايزين مبارك يرجع تانى، وبعد كده يقول لأ ده الفريق أحمد شفيق هيترشح وهعمله حملة انتخابية بالمهلبية والمكسرات وانتو لأ، وبعد شوية يطمع هو فى المهلبية ويصرح أن لو الشفيق ما أكلهاش هأكلها انا كلها لوحدى ومش هديكوا حتة يا جرذاااااااان.