دردشة فى القطار مع طبيب نفسانى

سألته ما رأيك يا طبيب فى الحكام
قال حالات مستعصية مالهاش علاج
أحبوا المال والجاه والسلطان
والمدح والتسقيف والكرسى والتاج
كل واحد عامل زعيم والكل
غلطان والسفن تاهت مع الأمواج
والشعوب هى الضحية كوارث
نكبات بطالة وضعف فى الإنتاج
الصين عددها مليار والصناعة فيها
غزت العالم مرسوم لها منهاج
والشاب العربى ع النت مصاحب
عشرين بنت طالع لأبوه مزواج
والبترول مع الأيام هيزول
والمحتاج يشتغل حتى لو بالكرباج
وسكت لحظة وقال من فين يا بلدينا
قلت صعيدى من مركز سوهاج
قال سافرت الخليج قلت كتير
الدوحة وقطر والهند وساحل العاج
قال إيه الفرق قلت الهند كل أسبوع
تطلق سفينة فيها من العلماء أفواج
عاوزين يسيطروا على سطح القمر
وعاملين محاولة لكشف طريق الإسراء والمعراج
العمل عنديهم حاجة مقدسة وعندينا
ساعة للكلمات المتقاطعة وساعة للأبراج
وياويلك وسواد ليلك لو اسم أبوك مغلوط
تأخد سنة فى تصحيح الاسم من فرج لفراج
تعمل زى المكوك م البيت للسجل ومن
السجل للبيت لغاية ما يطلعلك عشرين خُراج
تلعن اليوم اللى اتولدت فيه أعصابك
تتوتر تثور زى التور اللى هاج
قال لما أنت فاهم كده بتسأل ليه
قلت الدردشة علاج للكبت وراحة للمزاج
قال عندك حل قلت يستعينوا الرؤساء بالخبراء
أمثال الدكتور أحمد جلال لتصليح الأحوال
والأستاذ الكبير حازم الببلاوى والشرطة
تقبض على الشباب اللى قاعد ع القهاوى
ويتم ترحيلهم إلى سينا يزرعوا فيها
ويعملوا مشروعات لتربية الدواجن والأرانب
أفضل ألف مرة من بيع سينا للأجانب
قال شهاداتك إيه قلت شهادة الميلاد ومحو الأمية
ابتسم وضرب كف على كف وقال مريض
اللى يقول على الصعيدى قفل ويستحق العلاج
سوهاج- حاصل على شهادة محو الأمية
ahmed_khalel_elsohagy@yahoo.com