الكوتة والبسكوتة

■ ياللا يا بت انتى وهى.. خلصوا اللى ف ايديكوا عشان الاجتماع.. مش مهم دلوقتى الغسيل.. ابقى اغسلى يوم الاتنين بعد الهوجة ما تخلص.. اندهى عالولية التخينة اللى قاعدة عالفرشة فوق السطوح دى.. ما حوبوكش تفليلى العيال دلوقت.. قمل إيه اللى حايسرح من دماغتهم؟؟.. ده هى دماغها بتشغى لواحدها.. قال قمل قال.. ده مربية ف دماغها جواميس وتتدعى عالعيال.. خليها بس تُحبك قمطة دماغها أصل حاتعدينا.. رصوا بقى الكراسى صف كده قبال اللى حايقعدوا قدامنا.. ما يقعدوا عالأرض.. أهم يبقوا أوطى مننا إعزنهم هما الشيعب وإحنا المجلس.. يخرب بيوتكوا.. مالقيتوش غير كراسى الحمام دى؟؟.. ياللا ماشى أهم برضك أعلى م الأرض.. اترصوا بقى جتكوا داهية خلينا نبتدئ الاجتماع.. ورانا طبيخ..
■ يا نسوان الدايرة الكرام.. انتخبونى بونى بونى.. دنا والختمة أديكوا عيونى.. حاروقكوا فى المجلس لو نجحتونى.. أى والنيعمة.. شوفوا كافة طلبات عايزينها من رجالة الدايرة وولاد الدايرة دول.. واللى ماعرفناش نجيبه منهم الجمعية اللى فاتت.. حاجيبهولكوا من بظاظى عينيهم.. وزعى عليهم البورنامج الانتخابى يا بت..
■ أقرا إيه؟؟.. البورنامج؟؟.. ماهو ف إيديكوا اهه.. يييه.. إندهى عالبت نعمات ما هى اللى كاتباه.. نسيت إنهم كلهم زى حالاتى.. ساقطين كى جى وان محو أمية.. تعا يابت يا نعمات.. سيبك م الدرس الخصوصى دلوقت.. بلا أستاذ بلا نيلة.. انتى حاتميسى علينا؟؟؟.. فيه مدرس ألعاب يدى دروس فى الفيزيا؟؟.. حطيله بس سنجوتش المفتقة اللى جاى يطفحه وهو حايسيبك ولا يسأل فى أهلك.. وتعالى استقرى البورنامج..
■ شوفوا بقى.. استجوابات وطلبات تحويطة وحانقدم.. البت نعمات غاشة كل التحاويط اللى اتقدمت قبل كده وكتبوا عليها فى الجرانيل.. حانغير الأسامى ونقيف الاستحواط ونشيعه عالبيه رئيس المجلس.. تنكيس بيوت م اللى قايلة للسقوط حانجيب.. عقود عمل ف ليبيا للعيال العواطلية ولادكوا حانجيب.. وسايط فى جميع الوزارات حاضرين.. اللى عايز يمسك موقف سيارات يقلب منه زباين المصالح الحكومية على عينى.. واللى طمعان يمسك حاجب فى محكمة ما يفكرش.. صرف صحى ومجارى وكده تسليك كده توليع.. أنابيب بوتوجاز وحاخليها ببلاش.. اللى عايزة تتطلق واللى رايدة تخلع الراجل واللى عايزة تلبس أى واحد عيل مش بتاعه واللى مش صارفة النفقة.. النسوان اللى عاوزة تضرب رجالتها بالجزمة وخايفة م الحكومة ما تخافش.. اضربى ياختى ولا يهمك.. نسلى الشبشب على نافوخه.. وراكى نايبة بعون الله تخش ف الحديد.. طلوع فى التيفسيون حانطلع.. الراديو ما احبوش إكمن مش بيبين التقاطيع.. وقايف م اللى بيروحوا يقفوها على سلم البتاعة بتاعة الصحافة دى حانقف.. ويحرم عليا القعاد وأحلق مقاصيصى بالموس لو ما جبتلكوا حقوقكوا.. شوفوا كافة برامج حانطلع فيها.. الست منى والأوستاذ معتز والنبى حارسه محمود سعد.. مافيش مذيع فيكى يا مصر إلا وحالبدله لحد ما يزهق من أمى ويطلعنى.. علاج على نفقة الدولة وحانسلك.. جمعيات تعاونية وحانعمل.. قوطة وحانرخص.. فياجرا وحاجيبلكوا.. عشان الرجالة تتلهى ف حاجة تهد حيلها بالليل ويتخمدوا يناموا ونشوف إحنا مصالحنا بالنهار.. وحتى لو عاوزين تنيلوهم خالص.. أدينا حايبقى معانا التحصينة.. يعنى جاهزين من كافة شىء.. حشيش بانجو كله.. قماش وماتقولوش لعدوكم عليه.. اتواب اتواب.. تاخدوهم بعد ما تنزل اليفط تعملوهم لِبسة للعيال.. حفاضات.. لحاف قصاقيص.. اللى يلد عليكوا..
■ كوول ده لو شديتوا حيلكوا فى الدعاية ونزلتوا معايا فى الجولة.. واهو على عينك يا تاجر.. حلل اللحمة بتتسبك عالنار اهه.. وصوانى الفتة بتترص.. والدبايح جاهزة.. وحتى العيش بالفول النابت جاهز عشان البعدا النباتيين.. يعنى غذا وحاتتغذوا.. طفح وحاتطفحوا.. تموين وملو بطن وحاترجعوا محملين.. واطعم الفم تستحى العين وتنضرب بالبلغة كمان..
■ م الفجرية تاخدوا التصاوير والإعلانات توزعوها عالناس.. كل شوية حياخدوا حاجة.. علب الدوا واللبوس المزورة اللى جواها صورى.. كل الحاجات اللى عليها الشيعار والرمز بتاعى.. رمز الكابانيه.. الفانلات والبناطيل والشرازى.. الحلل والكسرولات.. البساتيل والقروانات.. الطرح والحجبة والنقبة.. أولويز بالأجنحة.. كله كله.. توزعوهم كلهم.. واللى ما ياخدش ويعمل نزيه.. ارقعى بالصوت وقولى اتحرش بيا ومد إيده.. لبسيه مصيبة يعنى..
■ نيجى بقى للاحتكاك.. عايزة نسوان يتفاتلها بلاد.. نسوان شرسة وعينها باكسة.. نسوان تدخل بصدرها وتعرف تقف للمقاطيع والبلطجية وقطاعين الطرق اللى مع المنيلين الرجالة دول.. ومايهمكوش من حد.. لا تقولى ده حزب وطنى ولا إخوان.. كله شايل ومحمل سنج وسيوف وما يتخيروش عن بعض.. وإحنا ياختى مستقلين.. ماحدش له علينا مسكة.. أما نبقى ننجح نبقى نغير جوه مع إخواننا..
■ سكسكة أم دومة.. إنتى عليكى الهوتاف المؤديب عشان لما التيفيسيون يصور.. وعندك الواد سيد مخاصى كاتبلك كام شيعار إنما يحننوا قلب الميت..
■ فوقية المهرية.. تردحى الردح اللى ما يجيبش قواضى.. يعنى ترصى لا تجرحيش.
■ فاتن تخشيبة.. الردح الواطى والسفالة م المنقى خيار.. يتعرضلك الراجل من دول تجيبى تاريخه وتتهميه فى شرفه ورجولته وحكاوى بقى.. ياللى نعتك وصفتك.. ياللى اتقفشت مع.. وأسامى.. ولو كان معروف والا مشهور ليطيله قضية آداب وشذوذ واللى كيفك فيه قوليه.. كله بيتصدق ويتكتب ف الجرانيل بعدها بساعة.
■ خالتى أطاليا وقوف متكرر.. توزعى على نسوانك البشل والبوانى الحديد.. وأهم حاجة بقى.. الرجالة ترفع السيوف والسنج.. كله حايبص فوق.. تيجى إنتى من تحت بقى.. قرص فى اللباليب ودوس عالرجلين وزغد مطرح ما تحبى.. حاينزلوا نسوانهم الشوارع.. أديكوا عارفين م النوبة اللى فاتت كنا بنعمل فيهم إيه.. تحرش وهتك عرض م اللى وصت عليه خالتكوا تأبيدة.. لقيتوا البوليس هجم.. الصويت يطلع والأمواس تشرطوا بيها نفسيكوا.. مافيش جناية ف تعوير النفس.. عايزة دمكوا يشلب.. أمال انا بانيالكوا مستوصف ليه؟؟.. مش عشان نعالج؟؟..
■ ياللا يا بت.. اصرفى المنحة.. وزعى بضمير.. ابتدوا الهتاف.. الاستهبال هو الحل.
zahqanin@gmail.com