مواطنون فى محطات القطارات: اتبهدلنا آخر بهدلة

«قاعدين هنا من الصبح بدرى، مش عارفين نركب القطار وكل ما نيجى ناحيته نلاقى ناس كتير أوى بتهجم على الباب، جدتى كانت ماسكانى من إيدى لكن من كتر الزحمة وقعت منها وكانوا هايخنقونى».. هذه قصة «حبيبة»، البالغة من العمر 4 سنوات فى محطة مصر للقطارات، جاءت مع أسرتها إلى المحطة لتلحق بقطار يأخذها إلى بلدتها الصغيرة فى أسوان، لكن معاناتهم تكررت مع مئات من راكبى قطارات الصعيد قبيل عيد الأضحى المبارك.
تقول جدة حبيبة، وهى سيدة عجوز جلست على أرضية رصيف 11 للقطارات المتوجهة إلى الصعيد، إنها وباقى أفراد أسرتها السبعة جاءوا للقاهرة فى زيارة استمرت شهرا وكانوا يريدون العودة لحضور العيد فى قريتهم بأسوان لكنهم لم يتخيلوا حالة القطارات قبل العيد.
كانت هذه الأسرة تفترش أرضية المحطة لعدم وجود كراسٍ كافية أمام المئات ممن ينتظرون مواعيد قيام رحلاتهم، تقول جدة حبيبة: «أنا جيت الساعة 7 الصبح عشان نركب أى قطار، وجوه نحجز بالغرامة، لكن لقينا مصر كلها بتركب، رحنا نحاول نحجز من شباك التذاكر معرفناش خالص وإحنا حريم لوحدنا والطوابير طويلة وجماهير كتير عايزة تركب القطار، حاولنا تانى نركب فى قطار الساعة 3:30 العصر لاقينا هجوم من بشر كتير جداً، لدرجة إن البنت كانت فى إيدى وقعت وكانت هاتتخنق رحت زعقت بعلو صوتى وقلت ياريت حسنى مبارك ييجى يشوف اللى بيحصلنّا واحنا بنتبهدل البهدلة دى».
وأضافت: «دة مش حالنا إحنا لوحدنا، ده حال آلاف من الناس اللى عايزة تسافر وتلحق العيد فى بلادها، إحنا اضطرينا نكلم زوج بنتى ييجى يحجزلنا، ولما جه فضل واقف أمام شباك التذاكر ساعتين والله فى الآخر حجز لنا فى قطار الساعة 12 بالليل، يعنى يرضى مين نيجى نقعد على الأرض فى المحطة من الساعة 7 الصبح لحد 12 بالليل، ده حتى المحطة مفيهاش حمام سيدات خالص وحمامات الرجال معفنة».
تقول شادية، إحدى أفراد تلك العائلة الأسوانية، التى ظلت تفترش أرضية رصيف المحطة ما يقرب من يوم واحد انتظارا ل«الفرج»: «همَّ المسؤولين لو شافوا المعاناة اللى إحنا شفناها النهارده هانصعب عليهم، لكن همَّ فى وادى وإحنا فى وادى، عمالين يقولوا زودنا القطارات وفعليا مفيش تغيير وكل سنة بنعانى المعاناة دى قبل العيد الصغير وقبل العيد الكبير، وكلام المسؤولين عن السكة الحديد مالوش علاقة بالواقع».
وتضيف: «المسؤولين دول بيصرفوا ملايين على تطوير السكة الحديد كل سنة تقريبا، كل ما نيجى المحطة نلاقيهم بيصلحوا ويشيلوا من هنا يحطوا هنا، مش قادرين يعملوا حمام للسيدات فى المحطة، عاملين حمامات للرجال وزى الزفت طيب اللى بيركب القطار ده مش ستات ورجالة، ده حتى مش قادرين يزودوا عدد الكراسى اللى على كل رصيف ولو اتأخر القطار خليك واقف على رجلك ومعاك الشنط والكراتين، ربنا يعينا والله».
أثناء سيرنا على أرصفة محطة قطارات رمسيس شاهدنا أعدادا كبيرة من المسافرين أغلبهم افترش أرضية المحطة والباقى جلس على الكراسى، أو وقف على قدميه ينتظر قطاره، سألنا المواطنين هناك عن حال المحطة قبيل العيد، أجابت منال إحدى المسافرات: «أنا حجزت من أسبوعين بالظبط، ولولا كده ماكنتش لقيت تذاكر عشان أسافر أنا واخواتى بلدنا، واللى راح بعدنا بيوم وقف فى طابور طويل عريض وبرضه مالقاش فى الآخر».
أما نورة فتقول: «أنا من أسبوعين جيت أحجز فى المجرى أو الدرجة الأولى مالقيتش أى حاجة، بالصدفة لقيت تذكرة قطار نوم بترجع اشتريتها فورا على الرغم من إن سعرها ضعف سعر قطار الدرجة الأولى، بس هاعمل إيه اضطريت أجيب أى حاجة عشان أسافر بلدنا وأعيد مع أهلى». وفى محطة قطارات الجيزة حاولنا التعرف على طبيعة الوضع ربما يكون مختلفا عما شاهدناه فى محطة رمسيس باعتبار الجيزة محطة فرعية داخل القاهرة، إلا أن ما رأيناه كان مشابها فى درجة الازدحام على أرصفة المحطة، لكن أمام شباك التذاكر كان الوضع مختلفا.
يقول أحد عساكر المحطة، طلب عدم ذكر اسمه: «مفيش حد بيحجز تذاكر دلوقتى فى المحطة، عشان التذاكر خلصت واللى بيحجز فى نفس اليوم من محطة رمسيس، عشان يكون فيه تنظيم أكتر لعملية حجز عربات العلاوة».
وأضاف: «يوم الخميس والجمعة كانت المحطة قايمة قاعدة على بعضها والزحمة كانت بشعة جدا كأن مصر كلها قررت تسافر، وعربات العلاوة اللى عملتها هيئة السكك الحديدية مش عاملة تأثير بسبب زيادة أعداد المسافرين من طلبة ومغتربين وعاملين، وناس من القاهرة رايحة توصل الرحم فى العيد».