سؤال مهم

يا اللى أنت بتبيع كليتك                    ياللى أنت بتبيع جتتك
إيه السبب فى المشكلة؟                    إيه حجتك إيه حكمتك؟
الدولة إدّت لك حقوقك كلها                ومغرّقاك فى الخير فإيه بأه حجتك؟
اللحمة فى السوق بالهبل وملطلطة        والعيش لحدّ البيت بتوّصل حصّتك
 
خضار وفاكهة كتير رخيصة وجيّدة        وعلاج بأحسن مستوى فى دولتك
نائب يدوّر عن مصالح دايرته              بالعكس عن كل الدواير حضرتك
ومافيش أراضى بتتسرق أو تتنهب         دا كلام مزوّر شوّشرة على سمعتك
تموين يجيلك كل شهر ومحترم             والزيت نضيف والرزّ كامل حصتك
ولا فيه ضرايب تشغلك أو تقرفك           والأمن فى الشارع تملّلى ف خدمتك
يبقى افترا منّك وظلم وغطرسة               كونك تفكر أو تبيع كده كليتك
حمدى المزين
سيدى جابر - إسكندرية